ဒီရက်ပိုင်းတွေအတွင်း အရမ်းကို ပျင်းနေခဲ့ပါတယ် ။
ပျင်းလွန်းလို့ ဂေဇက်လာတော့လဲ အပျင်းအားလုံး မပြေခဲ့ဘူး ။
ဒါနဲ့ အပျင်းပြေမလားဆိုပြီး အပတ်စဉ် ဝယ်ဖတ်နေကြ ဂျာနယ်တွေ
ရွှေမန်းတလေး
ဟဲဒိုင်ဂျက်စ်
ဝီးကလီး အီလဲဗင်း
နံနက်ခင်း
ကုမုဒြာ
မော်ဒန်
ယူရိုစပေါ့
ဂျာနယ်တွေ ကောက်ကိုင်ဖတ်လိုက်တော့လည်း အပျင်းကမပြေသေးဘူး ။
ဒါနဲ့ အပျင်းပြေအောင် ဆိုပြီး ၊ အပြင်ထွက်ပြီး ပတ်ဝန်းကျင်ကို လေ့လာကြည့်မိတော့ စုံစီနဖာ ဇါတ်လမ်းတချို့ ကို ကာယကံရှင်တွေနဲ့ အတူ ပြောဆိုရင်း အပျင်းနဲနဲ ပြေသွားခဲ့တယ် ။ ထိတ်လန့် စရာ အကြောင်းတွေလဲ တွေ့ ရပါတယ် ။
ဂေဇက်ကိုလာနေတဲ့ ကျုပ်လိုမျိုး ပျင်းနေတဲ့လူတွေများရှိခဲ့ရင် အပျင်းပြေလို့ ပြေငြား ၊ ဖတ်စရာ ဖြစ်လို့ ဖြစ်ငြား ပြန်ဇါတ်ဆင်ရေးလိုက်တယ်ဗျာ..
ဂျာနယ်ထဲပါတဲ့ဟာတွေကို ပြန်ရေးထားတာတော့ မဟုတ်ပါဘူး ။
ကျုပ် ကြုံတွေ့ ခဲ့ရတဲ့ ၊ ကျုပ် ကို ထိတ်လန့် စေခဲ့တဲ့ ၊ အံ့သြစေခဲ့တဲ့ ၊ အပျင်းပြေစေခဲ့တဲ့ ဇါတ်လမ်းလေးတွေထဲက တစ်ခုချင်းစီကို ရေးတင်ပေးပါမယ် ။ ( မှတ်ချက် ကျုပ် တင်ပါးကို မပေးပါ ထို့ အတူ မည်သူ့ တင်ပါးကိုမှ မပေးပါ )
ဒီလိုပါ
ကျုပ်က မန်းတလေးသားဆိုတော့ မန်းတလေးက အကြောင်းအရာတွေကိုဘဲ ရေးမှာပါ။
*** ဆိုင်ကယ်စီးရင် သတိထား ***
အခုရက်ပိုင်းအတွင်း မန်းတလေးမြို့ မှာ ယာဉ်ထိန်းရဲတွေ ရှောင်တခင် စစ်ဆေးလာတာကို ပြန်တွေ့ လာရပါတယ် ။ ပြီးခဲ့တဲ့ ၂လ ၃လ အတွင်းကဆို စစ်ဆေးတာတွေ သိပ်မတွေ့ ခဲ့ရပါဘူး ။
အခုခါ မြန်မာတစ်နိုင်ငံလုံးမှာ လိုင်စင်မဲ့ ဆိုင်ကယ်တွေ ကို လိုင်စင်လုပ်ပေးနေပါတယ်။
အဲဒါနဲ့ ပတ်သက်ပြီး ၊ ဆိုင်ကယ်ဈေးတွေ ၃သိန်း ၄သိန်း ပြုတ်ကျကုန်တာ ဝမ်းသာစရာပါ ။
တစ်ခုဆိုးတာက ၊ ဆိုင်ကယ်တွေ ပေါများလာခြင်း ၊ ပိုက်ဆံအနဲငယ်သုံးရုံနဲ့ သွားရေးလာရေး အဆင်ပြေတယ် ဆိုပေမယ့် ၊ ဆိုင်ကယ်မောင်းတဲ့သူတွေဟာ ယဉ်စည်းကမ်း လမ်းစည်းကမ်း ကို တစ်လုံးမှ မသိဘဲ ၊ တက်စီး တက်မောင်းနေကြတာပါဘဲ ။
တချို့ ဆိုင်ကားသမားတွေလဲ ဆိုက်ကားနင်းရတာ ပင်ပန်းတယ်ဆိုပြီး တပတ်ရစ် ဆိုင်ကယ်.. ဒါမှမဟုတ် ဆိုင်ကယ်အသစ်တစ်စီး ကောက်ဝယ်ပြီး ဆိုင်ကယ်တက္ကစီပြေးကြပါတယ် ။
ဆိုင်ကယ်တက္ကစီပြေးတယ်ဆိုလို့ သူရို့ မှာ ယာဉ်စည်းကမ်းလမ်းစည်းကမ်းမပြောနဲ့ ဦး ၊ ယာဉ်မောင်းလိုင်စင်တောင် မရှိကြဘူး ။ တစ်ကယ်ပါ ၁၀ ယောက် ကို သွားမေးကြည့် ၃ ယောက်လောက် က လိုင်စင်မရှိဘဲ မောင်းနေကြတာ ။
လိုင်စင်မရှိ ၊ ယာဉ်စည်းကမ်းလမ်းစည်းကမ်း မသိဘဲ မောင်းတော့ ဘာဖြစ်လဲ ဆိုတော့ ၊ ယာဉ်တိုက်မှုတွေ ဖြစ်ပါတယ် ၊ ကားကို ဝင်တိုက်တယ် ၊ ကားက ဝင်တိုက်တယ် ၊ လူကို တိုက်တယ် ၊ မှောက်တယ် ၊ တစ်ရက်ကို ဆေးရုံကြီး အရေးပေါ်လူနာဌာန ကို ယာဉ်တိုက်မှုကြောင့် လူဘယ်နှစ်ယောက်ရောက်သလဲ ဆိုတာ ဆရာဝန်တွေ ၊ အလုပ်သင်ဆရာဝန်တွေ ၊ သူနာပြုတွေ ၊ ဆေးရုံဝန်ထမ်းတွေ အသိဆုံးပါ ။ သူရို့ ဘာလို့ မပြောကြလဲ ၊ အသံထွက်မလာလဲ မပြောတတ်ပါဘူး ။ ကျုပ်ကတော့ အသိတစ်ယောက်က နာရေးလူမှုကူညီမှု အသင်းတစ်ခုမှာ ကားမောင်းတဲ့သူ ဆိုတော့ ၊ ဖြစ်သမျှ အကုန်ပြန်ကြားရလို့ သိရပါတယ် ။ ကျုပ်အသိ ကားမောင်းတဲ့ သူခဗျာလဲ တစ်ပတ်မှာ ၇ရက် ၇ည အပြည့်နီးပါး နေ့ မရှောင် ညမရှောင် အရေးပေါ်ကားမောင်းနေရပါတယ် ။ နာရေးတော့ နာရေးပါဘဲ ။ ဘာနာရေးလဲ ဆိုရင် ယာဉ်တိုက်မှုကြောင့် ဖြစ်တဲ့ အရေးပေါ် လူနာ ဆေးရုံ ပို့ ပေးရေးပါ။
ပြီးခဲ့တဲ့ ၃ပတ်ကျော်လောက်က ကျုပ်ကိုယ်တိုင်ကို ယာဉ်တိုက်မှု တစ်ခု ကို မျက်ဝါးထင်ထင် မြင်တွေ့ လိုက်ရပါသေးတယ် ။ ဒီလိုပါ
တစ်ည.. ဘီယာဆိုင်တစ်ဆိုင်မှာ ဆိုင်အပြင်ဘက်တန်း ပလက်ဖောင်းပေါ်မှာ ၊ ဘော်ဒါတစ်ယောက် နဲ့  ဘီယာအတူထိုင်သောက်ရင်း စကားပြောဖြစ်ခဲ့ပါတယ် ။
ကျုပ်တို့ ထိုင်တဲ့ ဘီယာဆိုင်ရဲ့ ဘေးကပ်ရပ်၂အိမ်ခြားလောက်မှာ နောက်ထပ် ဘီယာဆိုင် တစ်ဆိုင် ရှိပါသေးတယ် ။ ဇါတ်လမ်းက… အဲဒီဘက် ဆိုင်ကနေ စတာပါ ။
ကျုပ်တို့ ဘီယာထိုင်သောက်နေတုန်းပေါ့… ဆိုင်အပြင်ဘက် လမ်းမဘေး ပလက်ဖောင်းပေါ်မှာ ထိုင်သောက်နေတာဆိုတော့ ၊ လမ်းမပေါ်သွားလာနေတဲ့ သူအားလုံးနဲ့ ဘေးပတ်ဝန်းကျင် မြင်ကွင်းအားလုံးကို မြင်နေရပါတယ် ။ ကျုပ်တို့ ထိုင်တဲ့ဆိုင်ဘေးနားက ဆိုင်ထဲကနေ လူအုပ်စုလိုက်ကြီး တစ်အုပ် ခပ်သုတ်သုတ် နဲ့ ပြေးထွက်လာကြပါတယ် ။ အားလုံး အယောက်၂၀ ခန့် ရှိပါမယ် ။ ဆိုင်ကယ်ကတော့ ဘယ်နှစ်စီး ပါလဲ မသိပါ ။ ပါဂျဲရိုး ကားတစ်စီး နဲ့ စလွန်းကားတစ်စီး ပါပါတယ် ။ သူရို့ တွေဟာ ကားတွေစီကို ခပ်သွက်သွက်ပြေးပြီး ကားနောက်ဖုံးများကို ဖွင့်ကာ ၊ ပိုက်လုံးများ ၊ ဓါးများ ဆွဲထုတ်ယူလိုက်ကြပြီး ၊ ဘီယာဆိုင်ထဲကို စောင့်ကြည့်နေကြပါတယ် ။ ရန်တော့ဖြစ်တော့မယ်ပေါ့ဗျာ ။ ဒါနဲ့ ကျုပ်နဲ့ ကျုပ်ဘော်ဒါ လဲ အဲဒီဘက် ကို မျက်နှာလှည့်ထိုင်လိုက်ပြီး ၊ ဘာဆက်ဖြစ်မလဲ ဆိုတာ ကို ဘီယာသောက်ရင်း စောင့်ကြည့်နေပါတယ် ။
ခဏနေလောက်ကြ ဘီယာဆိုင်ထဲကနေ အသက်၂၀ကျော်လောက် ယောက်ျားတစ်ယောက် ထွက်လာတော့ ၊ ဟိုအယောက်၂၀ အုပ်စု က ချက်ချင်းဆိုသလို ၊ အဲဒီ ယောက်ျားဆီကို ပြေးကပ်သွားကြပါတယ် ။ ဝိုင်းလိုက်ကြတယ် ။ အယောက်၂၀ ၁ယောက် ဆိုတော့ ပွဲကတော့ လုံးဝ ကြည့်မကောင်းတော့ပါဘူး ဆိုပြီး ကျုပ်တို့ လဲ မျက်နှာချင်းဆိုင် ပြန်ထိုင်ကာ ဘီယာဆက်သောက်ကြပါတယ် ။ ၁ယောက်ထဲသမားက ပြေပြေလည်လည် တောင်းပန် လိုက်နိုင်တယ်လို့ ထင်ပါတယ် ။ ရန်ပွဲက မဖြစ်လိုက်ပါဘူး ။
သူရို့ တွေသာ ရန်မဖြစ်သာ ၊ ရန်ဖြစ်ပြီ မှတ်ပြီး စောင့်ကြည့်ကြတဲ့ ဘေးနားက လူတွေကလဲ မနဲပါဘူး ။
ပြီးလဲပြီးရော အယောက်၂၀ အဖွဲ့ ဟာ ဆိုင်ကယ်တွေ ကားတွေပေါ် အမြန်အမြန် ပြန်တက်ပြီး မောင်းထွက်သွားကြပါတယ် ။ အဲဒီမှာ မန်းတလေးအခေါ် ကျားစီးဘီး လို့ ခေါ်တဲ့ အင်ဂျင်ပါဝါ၂၅၀ နဲ့ ဆိုင်ကယ်တစ်စီးဟာ အထွက်မှာတင် ၊ မောင်းတဲ့လူက တော်တော်မူးနေတယ် ထင်တယ် ၊ မောင်းအထွက်မှာ မှောက်လဲသွားပါတယ် ။ စောန က ရန်ဖြစ်မလို ဖြစ်သွားတော့ ဘေးပတ်ဝန်းကျင် မှာ ရပ်ကြည့်တဲ့ လူတွေအများကြီး ရှိနေတာ ဆိုတော့ ဆိုင်ကယ်မှောက် သွားတဲ့လူဟာ ချက်ချင်း ဆိုင်ကယ်ကို ပြန်ထူပြီး တရကြမ်း မောင်းထွက်သွားပါတယ် ။ အဲဒီမှာ သူ မောင်းတဲ့လမ်းပေါ်မှာ ၊ မျက်နှာချင်းဆိုင် တစ်ဘက်လမ်းကြောကနေ ဆိုင်ကယ်တစ်စီးဟာ သူ့ ရှေ့ ကနေဖြတ်ကွေ့ ဖို့ အတွက် အချက်ပြမီး ပြထားပါတယ် ။ သူ တရကြမ်းမောင်းလာတာ မြင်တော့ အဲဒီဆိုင်ကယ်ဟာ မကွေ့ သေးဘဲ ကွေ့ ဖို့ လမ်းယူထားပြီး သူ မောင်းကျော်အသွားကို စောင့်နေပါတယ် ။ အဲဒီဆိုင်ကယ်က တရုတ်ဆိုင်ကယ် စူပါကပ် ဖြစ်ပြီး ယောက်ျားကမောင်းကာ နောက်က မိန်းမ တစ်ယောက်ပါပါတယ် ။ အဲဒီမှာ အင်ဂျင်ပါဝါ၂၅၀ ဆိုင်ကယ်သမားဟာ ၊ သူ့ ဆိုင်ကယ်အသွားကို ရပ်စောင့်ပေးနေတဲ့ စူပါကပ်ဆိုင်ကယ် ကို ဝင်တိုက်လိုက်ပါတော့တယ် ။ တိုက်တာမှ အရှိန်တော်တော်ပြင်းပါတယ် ။ သူက လူအများရှေ့ မှာ ဆိုင်ကယ်မှောက်ထားတာလို့ ရှက်ရှက်နဲ့ တရမ်းကြမ်း အရှိန်မြှင့်မောင်းသွားတာရယ် ၊ မူးနေတာရယ်နဲ့ ပေါင်းလိုက်တော့ တစ်ဘက် အတိုက်ခံလိုက်ရတဲ့ စူပါကပ် ဆိုင်ကယ်မှာ စုတ်ပြတ်သွားပါတယ် ။ ဘယ်လောက် အရှိန်ပြင်းလဲ ဆိုရင် တိုက်ခံရတဲ့ ဆိုင်ကယ်မောင်းတဲ့ယောက်ျားကတော့ ပွန်းရုံ ပဲ့ရုံ လောက်ပဲ ဖြစ်ခဲ့ပေမယ့် ၊ အနောက်က ထိုင်စီးလိုက်လာတဲ့ မိန်းမကတော့ ခြေတစ်ဘက် ကျိုးသွားပါတယ် ။ ခြေသလုံးကျိုးတာဖြစ်ပါလိမ့်မယ် ။ တိုက်တဲ့ကောင်က ဘာမှ မဖြစ်ပါဘူး ။ မဖြစ်တာမှ ဆိုင်ကယ်တောင် မလဲမမှောက်ပါဘူး ၊ တိုက်လဲပြီးရော ဆရာသမား က သူတိုက်လိုက်တဲ့ ယောက်ျားနဲ့ မိန်းမ ကို ဆင်းကူပေးဖို့ နေနေသာသာ ၊ ဆင်းပြီး ဆဲပါတော့တယ် ။ ဒီနေရာမှာ စောနက ရန်ပွဲဖြစ်မလို ဖြစ်တုန်းက စောင့်ကြည့်နေတဲ့ လူအုပ်က ၊ ဆိုင်ကယ်တိုက်တဲ့အထိ လိုက်ကြည့်ကြတယ် ဆိုပေမယ့် ၊ ဆိုင်ကယ်တိုက်တာကို တစ်ယောက်တစ်လေမှ လုံးဝ ဝင်အကူအညီမပေးကြပါဘူး ။ ဘေးကကြည့်ရုံဘဲ ကြည့်နေကြပါတယ် ။ ကျုပ်ကတော့ ၁၉၉ ကို ဖုန်းဆက်လိုက်ပါတယ် ။ ဒါပေမယ့် မမှီလိုက်ပါဘူး ။ ဆိုက်ကယ်နဲ့ တိုက်တဲ့ ဆရာသမားဟာ သူတိုက်လိုက်တဲ့ ဆိုင်ကယ်နဲ့ ၂ယောက် ကို ဘာအကူအညီမှ မပေးဘဲ ၊ ဆဲရုံသာဆဲပြီး ၊ ချက်ချင်းမောင်းပြေးသွားပါတယ် ။ သူ့ ဆိုင်ကယ် က အင်ဂျင်ပါဝါ၂၅၀လဲ ဖြစ်တော့ လိုက်လို့ လဲ မမှီပါဘူး ။ အတိုက်ခံရတဲ့၂ယောက်ခဗျာလဲ လမ်းပေါ်မှာ လဲနေကြတာဆိုတော့ လိုက်ဖို့ လဲ မဖြစ်နိုင်ပါဘူး ။ တိုက်တဲ့ကောင်မောင်းသွားပြီဆိုမှ ဘေးကဝိုင်းကြည့်နေတဲ့ လူအုပ်က ဝင်လာပြီး ၊ အတိုက်ခံရတဲ့ ၂ယောက် ကို ဝိုင်းဝန်းထပ်ကြည့်ကြပါတော့တယ် ။ အဲဒီအထဲက တစ်ယောက် က ဖုန်းထုတ်ပြီး နာရေးကူညီမှု အသင်းတစ်ခုကို ဖုန်းလှမ်းဆက်လိုက်တော့မှ ၊ နောက် ၁၀မိနစ်လောက်အကြာမှ နာရေးအသင်းက ကားတစ်စီးရောက်လာကာ ၊ ၂ယောက်စလုံးကို တင်ပြီး ဆေးရုံကြီးကို ခေါ်သွားပါတယ် ။ ရဲကိုကိုတို့ ကတော့ ၊ တိုက်ခံရတဲ့ ၂ယောက် ကားနဲ့ ဆေးရုံတင်သွားချိန်မှ ရောက်လာကြပြီး ၊ ဝိုင်းအုံကြည့်နေကြတဲ့ လူတွေကို “ မင်းပါလား သူပါလား ” လိုက်မေးရှာပါတယ် ။
ကျုပ်နဲ့ ကျုပ်ဘော်ဒါလဲ … တိုက်ခံရတဲ့၂ယောက်နေရာမှာ ငါတို့ ဖြစ်ခဲ့ရင် ဆိုပြီး ၊ ဘီယာသောက်နေရင်းတန်းလန်း သွေးပျက်မိပါတယ် ။ အတိုက်ခံရတဲ့၂ယောက်အတွက်လဲ စိတ်မကောင်း ဖြစ်သွားတယ် ။ တိုက်တဲ့ကောင်က မောင်းပြေးသွားတာကိုး ။
နောက်နေ့ ကြတော့… အဲဒီရန်ဖြစ်မလို ဖြစ်ခဲ့တဲ့ ဘီယာဆိုင်က ဝန်ထမ်းတစ်ယောက် ကို ခေါ်မေးကြည့်တော့ ၊ သူရို့ ဆိုင်ကို ရဲတွေ လာစုံစမ်းပါတယ်တဲ့ ။ ဒါပေမယ့် ဆိုင်ကယ်တိုက်သွားတဲ့ကောင် ပါတဲ့ အဖွဲ့ ကို ဘယ်သူဘယ်ဝါဆိုတာ ဘယ်သူမှ မပြောနိုင်ကြပါဘူးတဲ့ ။ ဆိုင်ကယ်က နံပါတ်ပြားလဲ တပ်မထားဘူး ။ ရဲတွေမှာ ဘယ်လိုက်လို့ လိုက်ရမှန်းမသိကြဘူးတဲ့ ။ ကောင်းရောဗျာ… ။
ကဲဗျာ… ရေးနေရင်းနဲ့ ၊ ရေငတ်လာလို့ ဘီယာဆိုင်ပြေးလိုက်ဦးမယ်ဗျာ…
နောက်ရက်တွေကြမှ… နောက်ထပ်ဇါတ်လမ်းလေးတွေ ကို ရေးပါဦးမယ်…
……. အားလုံးကို ကျေးဇူးတင်ပါသည် …….

မောင် ပေ

About မောင် ပေ

မောင် ပေ has written 396 post in this Website..