အခုလို အေးစက်လာတဲ့ နှင်းတို့ရဲ့ရာသီထဲမှာပဲ

ကိုယ့်ရင်ခွင်အတွင်းမှာ အပြတ်ခုတ်ထွင်ရှင်းလင်းထားတဲ့

သစ်ပင်တချို့  ပြန် ပေါက်ဖွားလာတယ်။

 

 

ကောင်းကင်ပေါ်မှာ ကြယ်တွေ လတွေကို တင်းတင်းရင်းရင်း မြင်ရချိန်ဖြစ်နေလို့ပဲလား ?

 

ဒါမှမဟုတ် နွေးထွေးစွာ ရင်ခုန်လှုပ်ရှားစေတဲ့ အထိနဲ့ အတွေ့တွေကို အရေးတကြီးလိုအပ်လာချိန်မို့လို့များလား ?

 

သေချာတာကတော့ သေသေချာချာ အငုတ်တွေ အမြစ်တွေကိုပါ ဆွဲနှုတ်ခဲ့ပြီးပြီလို့ ယုံကြည်ထားတဲ့ အရာတွေ

ဘွားခနဲ ပြန် ပေါ်ပေါက်လာခဲ့ပြီ။

 

စိတ်ရှုပ်ဖွယ် ကောင်းလေစွ။

ထို့အပြင် တပြိုက်နက်ထဲမှာပဲ တပ်မက်သာယာဖွယ် ကောင်းလေစွ။

 

အေးလေ. . . ဘာဖြစ်လဲကွာ။

လူငယ်တစ်ယောက်က သူ ချစ်မြတ်တွယ်တာခဲ့ဖူးတဲ့ မိန်းမလှလေးတစ်ယောက်ကို ပြန် တမ်းတမိတဲ့အဖြစ်ဟာ ဘာများ ထူးဆန်းလို့လဲ။

 

ဒါပေမယ့် မလွမ်းသင့်တော့ဘူး။

 

ပြီးခဲ့သော နှစ်တွေတုန်းက အခုလို ဆောင်းဦးရာသီတွေမှာ အခုလို အလွမ်းကဲကဲနဲ့ နှင်းတဖွဲဖွဲရွာတာကို မခံစားမိခဲ့။

 

အဘယ်ကြောင့်ဆိုသော်. . .

ထိုစဉ်ဆောင်းတွင်းမှာ သူမ ပေးထားရစ်ခဲ့သော တဆစ်ဆစ်နာကျင်မှုနဲ့ အတူတူ အိပ်စက်ခဲ့ရ၍ ဖြစ်သည်။

 

အခုတော့ ဒဏ်ရာတွေ ကျက်ခဲ့ပြီလား။

 

အသည်းကွဲတယ်ဆိုတာ သွေးမထွက်ပေမယ့် ဘာနဲ့မှမတူအောင် နာတဲ့ဒဏ်ရာတို့. . .

 

အလွမ်းဆိုတာ သီချင်းလေးတွေ ဆိုညည်းရင်းက ထိရှခဲ့သော ဒဏ်ချက်ကို ပြန်ကျက်အောင် ကုစားခြင်းတို့. . .

 အဲ့ဒီလိုတွေ ခံယူဖူးတယ်။

 

အခုတော့. . .အလွမ်းကို ပြန်လွမ်းတတ်လောက်အောင်ပဲ နှလုံးသားက ခံစားမှုပြင်းထန်လေပြီလား။

 

ရင်ထဲမှ ဖြစ်နေတဲ့ ခံစားမှုတွေကို တစ်စုံချင်းစီသာ ဖြုတ်လဲပစ်ပြီး အခြားအရာတွေနဲ့ အစားထိုးလို့သာ ရကြေးဆိုလျှင်

”လွမ်းခဲ့ဖူးသောအလွမ်းကို ပြန်လွမ်းခြင်း”

အဲ့ဒါကို ဘာနဲ့ အစားထိုး လဲလှယ်ပစ်သင့်သလဲ ?

 

တောက်!!! မေးခွန်းတွေကို ဖြေဖို့ . . .

တိကျသေချာသော အဖြေဆိုတာ ရင်ထဲမှာပဲ ရှိသတဲ့။

 

ဒါပေမယ့် ကိုယ်နဖူးစာဆိုတာကြီးကိုတောင် ဖတ်ချင်တဲ့အချိန် မဖတ်ရ မမြင်ရဘူး။

 

ဘယ်လိုလုပ်ပြီးတော့များ ဖြေရခက်တဲ့ ပုစ္ဆာတွေရဲ့အဖြေကို ရှာတွေ့နိုင်ဦးမလဲ ?

 

ကွာာာာ!!!!!!

စိတ်မောတယ်။

စိတ်မောလွန်းပါတယ်ဆိုတဲ့ လူမောကြီးတွေထက်တောင် ပိုမောတယ်။

 

မဟာဘုတ်တိုင်ကြားမှာ ”ကန်ရာသီပုတိဖွား”အဖြစ် ကျပ်ကျပ်ညပ်ညပ် ရပ်တည်နေရလို့ သူများကြားသလို မကြားဘူး။

 

သူများတွေ တဟားဟားရယ်နေချိန်မှာ ကိုယ်က မရနိုင်မှန်းသိလျက်နဲ့ တဖွဲဖွဲကျဆင်းနေတဲ့ နှင်းစက်တွေကို

လက်နဲ့ ဝှေ့ယမ်းပြီး ဖမ်းမိဖို့ကြိုးစားနေမိသူ။

 

ဖြစ်နိုင်ရင်တော့ ကိုယ့်သမိုင်း ကိုယ်ရေးခဲ့သမျှ ကိုယ့်သမိုင်းတစ်အုပ်လုံးကို အုန်းခနဲ ကန်ပစ်လိုက်ချင်တယ်။

ပြီးမှ ပြန်ကောက် ဖုန်ခါပြီး

တုန်တုန်ရီရီနဲ့ ”ကိုယ်မှားပါပြီကွယ်” လို့ ရေရွတ်. . .

အဲဒီ သရုပ်ဆောင်ခြင်းက လက်ရှိ ”ငါကြီး” ပျောက်ပြီး ”မင်းလောင်း”တစ်ယောက် တောက်ပလင်းလက်လာသလိုများ ယတြာ ကျေလေမလား?

 

ကြည့်စမ်း။

ဘယ်တုန်းကမှ မယုံကြည်ခဲ့ဖူးတဲ့ ဗေဒင်တွေ ယတြာတွေအကြောင်း စဉ်းစားမိပြန်ပြီ။ ပြောတော့ဖြင့် ဂေါတမ မလုပ်တာ မှန်သမျှ လိုက်မလုပ်ဖို့. . .

ဂေါတမ လုပ်ခိုင်းတာ မှန်သမျှ လိုက်လုပ်ဖို့တို့ ကြိုးစားမယ်ဆိုတဲ့လူက . . .

 

အခုတော့ သူများ ချမှတ်ပေးတဲ့ ဘောင်ကွက်ထဲ အသားတကျနေလာပြီးမှ ခုန်ထွက်ချင်နေပြန်ပြီလား။

 

ကိုယ့် ကိုယ်ကို ပြန် တည်ဆောက်ဖို့အတွက်

ခဏလေးဖြစ်ဖြစ် အနားယူချိန်ရောက်ပြီ။

 

ဒါဟာ. . .

စိတ်ကူးယဉ်ဆန်တဲ့တိုင်းပြည်မဟုတ်ဘူးလို့ မှတ်ထားစမ်း။

 

ဒါဟာ. . . နိုင်ငံရေးလုပ်ရင် အဖမ်းခံရတဲ့တိုင်းပြည်။

လွမ်းရေးတွေ ဝမ်းရေးတွေထက် အဖမ်းမခံရရေး ပိုခက်တဲ့တိုင်းပြည်။

 

 

စိတ်ကူးယဉ်ဆန်နေလို့လည်းဘာမှမထူးဘူး။

 

 

အပြင်မှာ ကျနေတဲ့ ဒီဇင်ဘာရဲ့ နှင်းမှုန် မြူလွှတွေအကြောင်းလည်း မစဉ်းစားနဲ့တော့။

 

ရင်ထဲမှာဝေနေတဲ့ အလွမ်းရာသီ မှုန်ဝေရီတဲ့ တမ်းတမှုတွေကိုလည်း ဖယ်ထုတ်ပစ်တော့။

 

ထစမ်း။

ကိုယ့် ကိုယ်ကို ပြန်တည်ဆောက်ဖို့. . .

အချိန်နာရီနဲ့ ထပ်တူ စည်းချက်ကျကျ. . .

ကြွကြွရွရွ လမ်းလျှောက်ကြည့်လိုက်။

 

ကိုယ့် ကိုယ်ကို ထိန်းနိုင်ပြီလားးးး

မတ်မတ် ရပ်နိုင်ပြီလားးးး

မယိမ်းမယိုင်တော့ပြီလားးးးး

 

စမ်းသပ်ခြင်းများနဲ့ အနားယူရဦးမယ်။

 

~~~~~~~

 

 

အလင်းဆက်@မောင်သူရ

 

 

 

 

 

Thint Aye Yeik

About Thint Aye Yeik

Thint Aye Yeik has written 599 post in this Website..

Maung Thura @ သင့်အေးရိပ် CJ #5222013