” ……?…… ကောင်းမယ်”

 

သူတောင်းစားကတွေးတယ် – တစ်နေ့တစ်နေ့နေပူထဲ ထိုင်လိုက်ထလိုက်ထမင်းစားဖို့အရေးတောင်းနေရတာ ငါ့ကို ပုံမှန်နေ့စဉ် ထမင်းတစ်နပ်ကျွေးတဲ့ အလှုရှင်များရှိရင် ကောင်းမယ်။

ဆိုက်ကားဆရာကတွေးတယ် – တစ်နေ့တစ်နေ့ငါ ဆိုက်ကားနင်းပြီးဝင်ငွေရှာရတာ မောပါ့ကွာ အဌားကားလေး တစ်စီးလောက် စပေါ်တင်ပြီး မောင်းနိုင်ရင်တော့ ပင်ပန်းသက်သာဝင်ငွေပိုရမှာဘဲလေ Taxiစပေါ်တင်နိုင်ရင် ကောင်းမယ်။

အုံနာခပေးအဌားယာဉ်မောင်းကတွေးတယ် – တစ်နေ့တစ်နေ့အဌားကားတွေများလာလေတော့ အုံနာခပြည့် အောင်မနည်းရှာနေရတယ် ကိုယ်ပိုင်Taxi သာဝယ်နိုင်ရင်တော့ အုံနာခက ကိုယ့်အတွက်မို့ ကိုယ်ပိုင်Taxi ကားလေးဝယ်နိုင်ရင်ကောင်းမယ်။

ရုံးစာရေးတစ်ယောက်ကတွေးတယ် – တစ်နေ့တစ်နေ့ လူကြီးကခိုင်းလိုက် အထက်အရာရှိကဟောက်လိုက်နဲ့ ဒီတစ်ခါရာထူးတိုးစာမေးပွဲကိုအောင်ဖို့ဖြေရမယ် အရာရှိလေးဖြစ်ရင်ကောင်းမယ်။

ရုံးအရာရှိတစ်ယောက်ကတွေးတယ် – တစ်နေ့တစ်နေ့ ရလိုက်တဲ့လက်ဆောင်တွေ ပနာတွေနဲ့ ညွန်မှုးတွေများ အဆင်ကိုပြေလို့ ငါတို့မှာတော့ သူစွန့်သလောက်လေးနဲ့ကျေနပ်ရတာ တစ်နေ့ညွန်မှုးဖြစ်ရင်ကောင်းမယ်။

ကျောင်းသားတစ်ယောက်ကတွေးတယ် – တစ်နေ့တစ်နေ့ကျက်လိုက်ရတဲ့စာတွေ ပိုက်ဆံလည်းမရဘူး နှစ်မြန်မြန်ကုန် ကျောင်းမြန်မြန်ပြီးရင် စာကျက်ရတဲ့ဒုက္ခလည်းလွတ်မယ် အလုပ်လုပ်တော့ငွေလည်းရမယ် ဘွဲ့မြန်မြန်ရရင်ကောင်းမယ်။

အလုပ်သမားတစ်ယောက်ကတွေးတယ် – တစ်နေ့တစ်နေ့ကုန်ဈေးနှုန်းကလည်း ရပ်နေတယ်မရှိဘူး တရိပ်ရိပ် တက်တက်လာသာ လုပ်ခလစာလေးတိုးပေးရင်ကောင်းမယ်။

သူဌေးတစ်ယောက်ကတွေးတယ် – တစ်နေ့တစ်နေ့ရောင်းနေရတာကလဲ ပုံမှန်လောက်ဘဲ ဒီထက်မက ဈေးကွက်ရပြီး ရောင်းရရင်တော့ ငါနောက်အလုပ်တစ်ခုရင်းလို့ရမယ် ဒီထက်မကရောင်းကောင်းရင် ကောင်းမယ်။

သီးနှံစပါးစိုက်သူတောင်သူကတွေးတယ် – တစ်နေ့တစ်နေ့ ရာသီဥတုတွေမမှန်လေတော့ ရာသီကိုမှီတဲ့ငါတို့ သီးနှံတွေအထွက်တိုးကျလိုက်တာ ဒီနှစ်တော့ မိုးလေးမှန်ရင်တော့ သီးနှံအထွက်တိုးရချည်ရဲ့ ရာသီဥတု မဖောက်ပြန်ရင်ကောင်းမယ်။

အဲဒီလို အဲဒီလို လူတန်းစားအလွှာအသီး ကိုယ်ကျင်လည်ရာ ကိုယ်လုပ်နေရတာထက် ပိုပြီးသက်သာမယ့် အဆင်ပြေမယ့် ကောင်းစားမယ့် နေရာကို လိုချင်တောင်းတ စိတ်ကူးကြတဲ့ ” ဘာဖြစ်ရင်ကောင်းမယ်” ဆို တာတွေကတော့ ကိုယ်ကျင်လည်ရာ ဘ၀တွေ အခြေအနေတွေပေါ်မူတည်ပြီး ကွဲပြားကြတယ်လေ။

ဒါဆို အဲဒီ အလွှာမတူတဲ့ သူတွေ အတော်များများမှာ တူညီတဲ့ ” ဘာဖြစ်ရင်ကောင်းမယ်” ဆိုတာမျိုး မရှိဘူးလားလို့ မေးစရာ တွေးစရာဖြစ်လာတယ်။ ဒါပေမယ့် အလွှာမတူတဲ့သူတွေမှာ အများဆုံး တူညီတဲ့ ကောင်းမယ်ဆိုသော မျှော်မှန်းမှုတစ်ခုတော့ တွေ့မိတယ်ဗျ။ အဲဒါကတော့…………..

“ဒို့ မြန်မာပြည်လဲ စစ်အာဏာရှင်မျိုးဆက်အုပ်ချုပ်မင်းမူနေတာချုပ်ငြိမ်းပြီး ဒီမိုကရေစီနိုင်ငံအစစ် ဖြစ်ရင် ကောင်းမယ် ”

 

 

 

ခင်ခ။

ခင်ခ

About ခင်ခ

ခင် ခ has written 454 post in this Website..