မင်္ဂလာပါခင်ဗျား…

မြန်မာ့ဂဇက်တွေ့ဆုံပွဲနဲ့ သဘာဝရိပ်သာရှိ သက်ကြီးရွယ်အို ဂီလာနများ အရေးပေါ်ဋ္ဌာနအတွက် စုပေါင်းအလှူတော်မင်္ဂလာလည်း အောင်အောင်မြင်မြင် ပြီးဆုံးခဲ့ပါပြီ… ။ ဦးကျောက်ခဲကို လူချင်းမသိကြသော်လည်း ရပ်ဝေးရပ်နီး ပြည်ပနိုင်ငံပေါင်းစုံကနေ သဒ္ဓါတတ်အားသရွေ့ ပူးပေါင်းပါဝင်ခဲ့ကြတဲ့ အလှူတော်ရှင်များကိုရော ၊ ဝိုင်းဝန်းကူညီခဲ့ကြတဲ့ ဂဇက်ညီအစ်ကို မောင်နှမများကိုရော ကျေးဇူးအထူးတင်ရှိပါတယ် ။ ဦးကျောက်ခဲ ပကာသနမပါ ရေစက်မချပဲလှူခဲ့တာပါ ။ အလှူခံပို့စ်မှာ ရေးခဲ့သလိုပါပဲ ရေများရာ မိုးမရွာဘဲ တကယ်လိုအပ်နေတဲ့နေရာမှာ ကွက်ကြားမိုးရွာခွင့်ရလို့လည်း ဝမ်းသာပီတိဖြစ်မိပါတယ်ခင်ဗျ ။ သာဓု ခေါ် ၊ အာမင် ရွတ်ပြီး သက်ကြီးရွယ်အို ဂီလာနများအတွက် အလှူတော်ကို ကုသိုလ် ၊ ကောင်းချီးမင်္ဂလာ ယူနိုင်ကြပါပြီခင်ဗျား… ။

 

ပြန်ပြောရရင် ဒီအလှူကို စတင်မတည်ခဲ့တဲ့ နာမည်ကျော် ရွာသားတစ်ဦးနဲ့ ဦးကျောက်ခဲ သဘာဝရိပ်သာကို လှူဖို့ရည်ရွယ်ပြီး တိုင်ပင်နေကြတာ အချိန်အတော်ကြာကြာထဲကပါ ။ ပထမတော့ ကိုယ့်အစီအစဉ်နဲ့ကိုယ် လှူဖို့ပါပဲ ၊ ဒါပေမယ့်…. စို့စို့ပို့ပို့ အမှတ်တရဖြစ်အောင် လှူနိုင်ရင်ပိုကောင်းမယ်ဆိုပြီး ဂဇက်မိသားစုနဲ့ အများကို အကူအညီတောင်းခဲ့တာပါ ။ အလှူငွေကိုလည်း ဒီလောက်မမျှော်လင့်ထားခဲ့ပါဘူး ။ အောက်ထပ် တစ်ဆောင်အတွက် သိန်း-၆၀ ၊ လိုတာကို ထပ်ဖြည့်ကြမယ်ဆိုပြီး အလှူခံခဲ့တာပါ ။ အခုတော့ အတိုင်းထက်အလွန် ၈,၀၄၀,၀၀၀ ကျပ် (သိန်းရှစ်ဆယ် နဲ့ လေးသောင်းကျပ် တိတိ) ကောက်ခံရရှိတာမို့ လိုအပ်နေတဲ့ အတွင်းပရိဘောဂလေးတွေကိုလည်း လှူနိုင်ခဲ့ရလို့ အတော်လေးပီတိဖြစ်ရပါတယ်ခင်ဗျ ။ နောက်ထပ်ပြီး ရိပ်သာက အကျိုးတော်ဆောင်များရဲ့ လောကီလူ့ဘောင် စွန့်လွှတ်ခဲ့တာတွေကို သိလိုက်ရတော့ သီလ ၊ သိက္ခာတွေကို မချီးကျူးဘဲ မနေနိုင်ခဲ့တာမို့ အလှူတော်ငွေအတွက် အတော်စိတ်ချသွားပါတယ် ။

 

ကိုင်း … အလှူတော်မှာ ငွေစာရင်း အမှတ်မှားတာလေးတွေရှိခဲ့ရင် ဒီပို့စ် သက်ကြီးရွယ်အိုများခိုကိုးရာ သဘာဝရိပ်သာအတွက် အလှုတော်ဒါန က အလှူရှင်စာရင်းလေးကိုဖတ် ၊ အားမနာဘဲ ဝေဖန်ထောက်ပြပြီး ပကာသနမပါ ရေစက်မချတဲ့ အလှူတော်မင်္ဂလာလေးကို ရှူစားပေးပါဦး….

 

နတ် လူ သာဓု ကောင်းချီးပေးစေသောဝ်...

နတ် လူ သာဓု ကောင်းချီးပေးစေသောဝ်…

စကားစပ်မိလို့ အလှူဒါနနဲ့ပတ်သက်တဲ့ ဦးကျောက်ခဲရဲ့အတိတ်ကို ဆောင်ပါရစေ…
ဦးကျောက်ခဲ လူ့ဘောင်လောက ဒုက္ခရောက်နေသူတွေကို ကြုံတိုင်းကူညီတတ်ပေမည့် ဘာသာရေးနဲ့ ပတ်သက်တဲ့နေရာတွေမှာ အတော်လှူခဲလှပါတယ် ။ ဘုရားတည် ကျောင်းဆောက် နာမည်ကြီးဆရာတော်တွေကို လှူဖို့ဆိုရင် အတော်ပဲ လက်တွန့်တယ်ခင်ဗျ ။ ဘာသာမဲ့ဆန်တယ်လို့ ဆိုချင်ဆို ၊ ကိုယ်တိုင်က လက်ငင်းအကျိုးကိုပဲ ရှေးရှူတာကိုး … ။ ဒါပေသည့် မိစ္ဆာဒိဋ္ဌိဆိုပြီး ဦးကျောက်ခဲကို အထင်မသေးပါနဲ့… ဦးကျောက်ခဲ ဓမ္မာရုံဒါယိကာပါခင်ဗျ ။ အဟိ… အဲသည့်အကြောင်းကို ပြန်ပြောရရင်တော့ မွေးသဖခင်နဲ့ မွေးသမိခင် မပါလို့မဖြစ်ဘူး…. ။

 

လွန်ခဲ့သော ၁၃-နှစ်ကျော် ၂၀၀၂ ကပေါ့ခင်ဗျာ…
အဲ့သည်တုန်းက ဦးကျောက်ခဲ အိမ်ထောင်ပြုဖို့ရည်ရွယ်တာမို့ ၊ စင်္ကာပူမှာ ကျွဲလိုနွားလိုကုန်းရုန်းပြီး သမ္မာအာဇီဝ ပိုက်ဆံရမည့်အလုပ်ဆို အကုန်လုပ်ခဲ့တဲ့အချိန်ပေါ့ဗျာ ။ အလုပ်မှာလည်း ညပိုင်းရော၊ ပိတ်ရက်တွေပါ အချိန်ပိုဆင်း အလုပ်လုပ်ခဲ့ပြီး ၊ လွှမ်းမိုးရဲ့ ကိုပေါသီချင်းထဲကလို ပိုက်ဆံလေးလက်ထဲစုမိလို့ ရည်ရွယ်ထားသူကလေးကို ဆက်သွယ်လိုက်တော့မှ ၊ သင်းကလေးက ကိုယ့်လို မြန်မာငမွဲကိုစွန့်ပြီး ဂျာမန်နောက်ကို ကောက်ကောက်ပါအောင် လိုက်သွားဖို့ အထုပ်ပြင်ပြီးသားဖြစ်နေပါပြီတဲ့ ။ အဲသည့်တော့ ဦးကျောက်ခဲလည်း လောကကြီးကိုစိတ်နာ ၊ အလုပ်ပင်ပန်းလွန်းလို့ နားချင်တာလည်းပါတာမို့ မိသားစုကိုလစဉ်ထောက်ပံ့ငွေအပြင် ၊ ကျစ်ကျစ်ပါအောင်စုထားတဲ့ မြန်မာငွေ သိန်းခုနှစ်ဆယ်လောက် အိမ်ကိုပို့လိုက်တာပေါ့ဗျာ… ။

 

ဒီလိုနဲ့ အလုပ်ထွက်စာတင် ၊ အခြားလိုအပ်တဲ့ စာရွက်စာတမ်းတွေပြင်ပြီး ၂၀၀၂ ခုနှစ် အကုန်ပိုင်းလောက်မှာ မိဘရင်ခွင်ကို အောင်ဖျာလိပ်တာပေါ့ ။ ခရီးဆိုက်ပြီး နောက်နေ့မနက်ခင်း မနက်စာစား ၊ ကော်ဖီသောက်နေချိန်မှာ မွေးသဖခင်က ဧရာဝတီတိုင်း လပွတ္တာမြို့နယ်ထဲက သူ့ရဲ့ဇာတိ ဇနပုဒ်ရွာငယ်ကလေးဆီကို ခရီးဆက်ဖို့ အထုပ်အပိုးပြင်ခိုင်းပါတယ် ။ ဦးကျောက်ခဲကလည်း အသဲကွဲတိုးရစ် မောင်ကျန်ရစ်ဆိုတော့ စိတ်ပြေလက်ပျောက် ခရီးထွက်ချင်နေတာ ရေကန်အသင့်ကြာအသင့်ပေါ့ခင်ဗျာ ။ မိဘနှစ်ပါးနဲ့ သင်္ဘောတစ်တန် ပဲ့ထောင်တစ်တန်စီးပြီး ဆွေတော်မျိုးတော်တွေရှိရာအရပ်ကို ချီတက်ကြတာပေါ့ခင်ဗျာ ။

 

ဦးကျောက်ခဲ အရင်ပို့စ်တွေမှာ ရေးခဲ့သလိုပါပဲ ၊ မွေးသဖခင်ရဲ့ ဇာတိရွာကလေးမှာ တံငါနဲ့ လယ်သမားတွေချည်းနေတာဆိုတော့ ပျဉ်ထောင်အိမ်ဆိုတာ လက်ချိုးရေလို့ရလောက်အောင် အလွန်မွဲပါတယ် ။ ရွာကလေးကို ဦးကျောက်ခဲတို့ သားအမိ၊ သားအဖတွေရောက်သွားတော့ တစ်ရွာလုံးက သောင်းသောင်းဖြဖြ ကြိုဆိုကြတယ်ခင်ဗျ ။ ဦးကျောက်ခဲလည်း ရင်ထဲက ကိလေသာ အပူမီးတွေပျောက်ပြီး ဆွေတော်မျိုးတော်တွေနဲ့ ပျော်ပျော်ပါးပါးပေါ့ခင်ဗျာ ။ နောက်နေ့မနက်ခင်း ဦးဇင်းဦးမောင်ကြီးက ဦးကျောက်ခဲတို့မိသားစုကို အမှာတော်ရှိတယ်ဆိုလို့ ဘုန်းကြီးကျောင်းကို ချီတက်ကြတာ ဟိုရောက်တော့မှ ဦးကျောက်ခဲ… မျက်လုံးကို ပြူးသွားတာပဲ ။ မပြူး ခံနိုင်ရိုးလားခင်ဗျ … အနှီ ငမွဲရွာက ရွာဦးကျောင်းမှာ တိုက်ခံဓမ္မာရုံကြီး ဟီးထနေအောင် ဆောက်ထားလို့ပါ ။ စိတ်ထဲမှာတော့ ထုံးစံအတိုင်း “လူတွေမွဲတာ ဘုန်းကြီးတွေကို ဖို့နေရတာကိုး” လို့ ခပ်ရွတ်ရွတ်တွေးပြီး ပြုံးလိုက်မိပါသေးရဲ့…. ။

 

ဒါပေမယ်… ဒါပေမယ့်ပေါ့ခင်ဗျာ… ဓမ္မာရုံကြီးနားကိုသွားပြီး အလှူရှင်ကမ္ဗည်းကိုဖတ်လိုက်တော့မှ “ဟိုက်” ကနဲ ပါးစပ်ဟောင်းလောင်းဖြစ်သွားတာ ၊ ခဲလာတဲ့ စီးကရက်တောင် ရင်ဘတ်ပေါ် ပြုတ်ကျပါတယ်ခင်ဗျ … ။ ရှူစမ်းပါဦးမိတ်ဆွေ…
“မိဘနှစ်ပါးအား အမှူးထား၍ ဦးကျောက်ခဲ ကောင်းမှု ၊ နတ် လူ သာဓုခေါ်စေသောဝ်” တဲ့….
နားမလည်နိုင်လွန်းလို့ မွေးသဖခင်နဲ့ မွေးသမိခင်ကို လှည့်ကြည့်တော့ ၊ သူတို့က အောင်နိုင်သူအပြုံးနဲ့ မိန့်မိန့်ကြီး နှုတ်ခွန်းခြွေတာက…
“ငါ့သား အံ့ဩဝမ်းသာသွားအောင် ၊ သံသရာ အထောက်အပံ့ဖြစ်အောင် ၊ မင်း လွှဲပေးလိုက်တဲ့ သိန်း-၇၀ ထဲကနေ အဖေတို့ အမေတို့ လှူလိုက်တာ… သာဓုခေါ်ပေရော့… ” တဲ့…

 

တကယ်ပါဗျာ… မျက်ရည်တောင်ဝိုင်းတယ် ။ သေဟဲ့… နန္နိယ ၊ အဲသည့်ပိုက်ဆံလေးနဲ့ မြန်မာပြည်ပြန်ပြီး သင့်လျော်ရာစီးပွားရေးလေး လုပ်ကိုင်စားမလို့ ပို့ပေးလိုက်မိတာ ၊ မိဘနှစ်ပါးက မသိနိုးနား လှူချလိုက်တာမို့ ဦးကျောက်ခဲ စိတ်ထဲမှာ နိုင်ငံခြားကိုပြန်ပြီး သူတစ်ပါးဝန်ထမ်း ပြန်လုပ်ရပေဦးတော့မည်ဆိုပြီး ရင်ထဲမှာ ဆို့သွားတာပဲ ။ လွန်လည်းလွန်ခဲ့ပြီဆိုတော့ မိဘနှစ်ပါး စိတ်မကောင်းဖြစ်အောင် ဘာမှတော့မပြောမိပေမည့် ၊ အဲသည့် ဓမ္မာရုံကြီးကို ရေစက်ချချိန် ၊ တစ်ရွာလုံးနဲ့ မိဘနှစ်ပါး ဝမ်းသာပီတိ “နမောတဿ” ၃-ကြိမ်ရွတ်ဆိုကြတဲ့အခါ ၊ ဦးကျောက်ခဲတော့ “နှမြောတသ” ချည်း ရွတ်နေမိတော့တာပါပဲဗျာ ။ လုပ်ရက်လိုက်တာ ဘိုစိန် (အဖေကို ချစ်စနိုးနဲ့ခေါ်တာ) ရယ် ဆိုပြီး ကိုယ့်ရင်ဘတ်ကိုယ် တဘုံးဘုံးနဲ့ထု ၊ အားရပါးရ စိန်အောင်မင်းလို ငိုချင်းချလိုက်ချင်တာပါပဲခင်ဗျာ ။

 

နားမယ်လို့ ရည်ရွယ်ခဲ့တာ ရင်းနှီးစားဖို့ပိုက်ဆံ အလုံအလောက်မရှိတော့တာမို့ အလှူပြီးတော့ စိတ်နာနာနဲ့ အလုပ်ပြန်လုပ်ဖို့ နိုင်ငံခြားကိုပြန်ထွက်လာတာ ယနေ့ထက်တိုင်အောင်ပါပဲ ။ အဲသည့် ဓမ္မာရုံကြီးကိုလည်း သာဓုတောင်မခေါ်ပဲထားခဲ့တာ ၂၀၀၈ ခုနှစ် နာဂစ်ဖြစ်တော့မှပဲ ကျေးဇူးတင်စကားတွေကြားခဲ့ရလို့ သာဓု သုံးကြိမ်ခေါ်ပြီး အထူး ပီတိဖြစ်ရပါတော့တယ် ။ ဟုတ်ကဲ့ … နာဂစ်မုန်တိုင်းဝင်မွှေတော့ အဲသည့်နားကရွာတွေ ၊ တချို့ရွာလုံးကျွတ် သေကြေပျက်စီးကြပေမည့် ၊ အဲသည့်ရွာကလေးမှာတော့ လုံးဝအဖိတ်အစင် မရှိခဲ့ပါဘူး ။ တစ်ရွာလုံးမှာ အခိုင်အခံ့ရှိတဲ့ ဘုန်းကြီးကျောင်းနဲ့ အဲသည့် ဓမ္မာရုံကြီးမှာ အကုန် မုန်တိုင်းခိုကြရလို့ အသက်ဘေးကင်းခဲ့ရကြောင်းပါတဲ့ ခင်ဗျား….

 

 
ဪ… မရည်ရွယ်ထားသော်လည်း… အလှူအကျိုးပေးသည် ဆန်းကြယ်ပေစွ….

ဦးကျောက်ခဲ

About ဦးကျောက်ခဲ

ဦး ကျောက်ခဲ has written 49 post in this Website..