မနေ့ညနေက လမ်းလျှောက်နေတုန်း….ဘေးက အသံတိုးတိုးကြားတယ်….

အင်္ဂလိပ်ကားကောင်းတွေရမယ်၊ ရုံတင်ကားတွေ ရမယ်၊ အသစ်ထွက်တဲ့အခွေတွေ ရှိတယ်….တဲ့

လှမ်းကြည့်လိုက်တော့….

လူတစ်ယောက်…ပလပ်စတစ်ထိုင်ခုံလေးပေါ်ထိုင်နေရင်း…..သူ့နားက ဖြတ်သွားတဲ့လူတွေကိုလဲ တစ်ယောက်ချင်းစီတိုင်းကို လိုက်အကဲခတ်ပြီး ခပ်တိုးတိုး အော်နေတယ်…။ သူကသာ အဲ့ဒီလိုအော်နေတယ်….၊ သူ့ဘေးမှာရော ရှေ့မှာပါ ဘာအခွေမှ မရှိဘူးရယ်…။

ကျမ သူ့ကိုလှမ်းကြည့်တာ မြင်တော့…ညီမ ဟိုဆိုင်းဘုတ်ရှိတဲ့ ဘေးလှေကားက တက်သွားပါလို့….ပြောတယ်…။

ဘေးမှာပါတဲ့ သူငယ်ချင်း ၂ ယောက်ကလဲ

အင်း…ငါတို့လဲ အခွေငတ်နေတာကြာပြီ…၊ Shopping Mall တွေမှာတောင် အခွေတွေ မရှိတော့ဘူး၊ ကြုံတုန်း သွားကြည့်ရအောင်တဲ့…

ကျမလဲ ကြည့်ချင်တဲ့ကားလေးတွေရှိနေတော့….သူညွှန်ပြတဲ့ ဘေးလှေကားကနေ တက်သွားတယ်….။

သိပ်မတက်လိုက်ရပါဘူး……။ ပထမလှေကားတစ်ဆစ်ချိုး နေရာလေးမှာတင်….အခွေထည့်ထားတဲ့ခြင်းလေးတွေကို ပလပ်စတစ်ခုံပေါ်တင်ပြီး…အဲ့ဒီဘေးမှာ အခွေရောင်းသူ လူတစ်ယောက်ရပ်နေတယ်…..။

ကျမတို့မေးသမျှ အခွေတွေကို အမြန်ပဲရှာနေတယ်….။

အဲ့ဒီအချိန်မှာပဲ…..

အသက် ၃၀ ကျော် ၄၀ နီးပါး လူတစ်ယောက်ရောက်လာပြီး မတ်တပ်ရပ်တယ်…

အခွေရောင်းနေတဲ့သူ ပျာယာတွေခတ်ပြီး…မျက်စိမျက်နှာ ပျက်ပါရောလား….၊ ရွေးလက်စ ကျမတို့အခွေကိုတောင် မရွေးနိုင်ဘဲ ဘေးနား ခပ်ရို့ရို့လေးရပ်ပြီး…ခုနက လူကြီးကို မျက်နှာငယ်လေးနဲ့ လိုက်ကြည့်နေတယ်….။

ဟိုလူကြီးက ပါလာတဲ့ ဘေးလွယ်အိတ်ထဲက တစ်စုံတစ်ခုကို ထုတ်ဖို့…လက်လှမ်းတယ်….၊ အခွေရောင်းတဲ့သူ မျက်နှာပျက်သထက် ပျက်လာပါရော….

တိုက်ခန်းလှေကားကလဲ ကျဉ်း၊ ကျမတို့မေးတဲ့ ရှာလက်စအခွေကိုလဲ ရှာတာရပ်ထားလေတော့ ကျမတို့ သူငယ်ချင်း ၃ ယောက်လဲ ဘာမှလုပ်စရာမရှိ၊ ထောင့်မှာရပ်နေရင်း အခွေရောင်းသူနဲ့ နောက်မှရောက်လာတဲ့လူကြီး ဘာလုပ်သလဲပဲ လိုက်ကြည့်နေမိတယ်…..။

ဟိုလူကြီး သူ့အိတ်ထဲက ဆွဲထုတ်လိုက်တာ ဘာများလဲလို့…အခွေရောင်းတဲ့သူနဲ့ ကျမတို့တစ်သိုက်ပါ လိုက်ကြည့်မိရက်သား ဖြစ်နေတာ….။

သူ့ကို စိတ်ဝင်တစားနဲ့ မျက်လုံး ၄စုံက လိုက်ကြည့်နေတော့ ဟိုလူကြီးလဲ ဖြစ်နေတဲ့အနေအထားကို သဘောပေါက်သွားသလိုနဲ့…ရယ်သွမ်းသွေးရင်း လှမ်းပြောတယ်…

စိတ်မပူပါနဲ့ကွ…..ငါက မျက်မှန်ထုတ်တာပါ တဲ့….

ဒီတော့မှ အခွေရောင်းတဲ့အကိုကြီးက သက်ပြင်းတစ်ချက်ကြိတ်ချရင်း စိတ်အေးသွားပုံဖြစ်သွားတယ်….။ ဒါတောင် သူလှမ်းမေးလိုက်တဲ့ အသံခပ်ယဲ့ယဲ့ကို ကြားလိုက်သေး….

အကိုကြီးက ရဲမဟုတ်ပါဘူးနော်….တဲ့…

(အဲ့ဒါ ဘယ်နားမှာလဲလို့တော့ … မမေးနဲ့….၊ လုံး ၀ မ ပြော ဘူး..)

:)

 

ကောင်းကင်ပြာ

 

Kaung Kin Pyar

About Kaung Kin Pyar

Kaung Kin Pyar has written 44 post in this Website..