“မွေ့….ညီမလေး ကလေးတွေကို ကျွေးပြီးပြီလား….”

မနက်နိုးနိုးချင်း…အိမ်ပြင်က ငှက်တွေ အာဗြဲစိန်လုပ်နေတာ ပြတင်းပေါက်က လှမ်းကြည့်နေတဲ့…ကျမကို မြင်လိုက်လို့…အမြီးပြုတ်မတတ် လှုပ်ခါပြနေတဲ့ ခွေး လေးကောင်ကို မျက်နှာလွှဲလိုက်ပြီး မီးဖိုခန်းကို လျှောက်လာရင်း အိမ်က အမကို မေးလိုက်တာပါ…။

“အမလေး…ပြီးပါပြီတော်….လူတောင်မစားရသေးဘူး..သူတို့ကို ကျွေးပြီးပြီ….”

“များများကျွေးနော်…၊ ကိုယ့်သမီးချည်းပဲ မကျွေးနဲ့။ ညီမလေး ကလေးတွေက ဗိုက်အိုး ပိုကျယ်တယ်….”

“သိတယ်..သိတယ်…စားနိုင်တာကို သိတယ်…”

အိမ်က အမကလဲ မခံဘူး…၊ ပြန်အော်တယ်…။

ကျမ ၃နှစ်သမီးအရွယ်ကတည်းက သူက အိမ်ကို ရောက်နေတာ…။ အမေနဲ့ ဆွေမျိုးမကင်းဘူး..ပြောတာပဲ…၊ တစ်အိမ်လုံးကိစ္စ အမေက အဲ့ဒီအမကို စိတ်ချတယ်…၊ ကျမတို့နဲ့ကလဲ ညီအစ်မလိုပဲ…။ နာမည်က မမြင့်မြင့်ဝေတဲ့…။ ကာလရွေ့လျားလာတော့ မွေ့ဖြစ်သွားတယ်…။ နာမည်အပြည့်အစုံခေါ်ရမှာတောင် ပျင်းလို့..အဲ့ဒီအမခမျာမှာ…မွေ့တစ်လုံးနဲ့ ကျေနပ်လိုက်ရရှာတယ်….။

သူ့အသဲကျော်က အိမ်က ကြောင်မ…( ဒါကြောင့်လဲ အပျိုကြီး ဖြစ်နေတာ…) ( တော်ပါပြီလေ…. ပြောတော့ပါပုစ့်။ မတော် ရွာထဲက ကြောင်ချစ်သူတွေ ကျမကို ဆော်ပလော်တီးလိမ့်မယ်…)

အိမ်မှာက တိရိစ္ဆာန်ဆိုတာ မွေးစရာကို မလိုတာ…။ ရေချိုးခန်းဘေးမှာ…ခမ်းလု လို့နာမည်ပေးထားတဲ့ ဖားတစ်ကောင်ရှိသေးတယ်…။ ခမ်းလုဆိုတာ ဘာအဓိပ္ပါယ်လဲတော့ မသိဘူး..။ ပါးစပ်ထဲတွေ့တဲ့ ပေါက်ကရနာမည်အော်ရင်း သူ့နာမည် ဖြစ်သွားတာပဲ…၊ အထီးလား အမလားလဲ မသိဘူး…။ တခါတလေ မြွေတွေရောက်ရောက်လာပြီး ခမ်းလုကို ပတ်တနာရှာသေးတယ်….။

အဲ့လိုအချိန်မျိုးဆို..ကျမတို့ တစ်အိမ်လုံး ခမ်းလုဘက်ကချည်းပဲ….။

ကျမတို့အိမ်က ၀င်းကျယ်ကျယ်ထဲမှာ…အပင်ကြီးတွေလဲ အိမ်နား အတော်ပေါတယ်…။ မသိရင် တောထဲ ရောက်နေသလိုပဲ။ သွားလာရဝေးတာ၊ လူပြတ်တာ၊ ဘာဆိုင်မှ အနီးအပါးမရှိတာတွေ ဖယ်လိုက်ရင်…တိတ်တိတ်ဆိတ်ဆိတ်နဲ့ အတော်အေးတဲ့နေရာ….။ နွေရာသီဆို ပိုသိသာတယ်…။ တခြားနေရာတွေမှာ ဘယ်လောက်ပူလောင်နေနေ…၊ အိမ်ပေါ်တက်တဲ့ ကုန်းစောင်းလေးပေါ် လျှောက်လိုက်ရုံနဲ့ အေးသွားရော…။ နားအေးပါးအေး နေချင်တဲ့ လူကြီးတွေအကြိုက်ပေါ့….။ အပင်စိုက်တာ ၀ါသနာပါတဲ့ အမေ့အကြိုက်….။ ကျမတော့ မကြိုက်ပါဘူး…၊ အပင်လဲ ခုအရွယ်ထိ တစ်ခါ စိန်ပန်းပင်လေးတစ်ပင်လား…မှတ်မှတ်ရရစိုက်ဖူးတာ…။ ဘယ်လိုပဲ မကြိုက်မကြိုက် လူကြီးတွေက လူကြီးတွေ ဖြစ်နေလေတော့ ဘီဒိုအာဏာနဲ့ ခေါ်တဲ့အချိန်…ကျမတို့ကလေးတွေ ယက်ကန်ယက်ကန် ပါလာရတာပဲ…။ စရောက်ရောက်ချင်းတုန်းက မနေတတ်….။

“ကျွတ်”ဆိုတာ…အလွန့်အလွန်ကြောက်ပါတဲ့ အင်ဗာတီဗရိတ်တွေကို…အဲ့ဒီရောက်မှ စုံစုံလင်လင် မြင်ဖူးတာ….။ မိုးစကျပြီး ဆောင်းတွင်းအလယ်လောက်အထိက ဘယ်အချိန်များ ဒင်းတို့ကပ်လာမလဲဆိုပြီး တထိတ်ထိတ်နေခဲ့ရတဲ့ ရက်တွေပေါ့….။ မျက်စိဒေါက်ထောက်ပြီး အိမ်ထဲကတစ်နေရာသွားတော့မယ်ဆို..ပတ်ဝန်းကျင်ကို အရင်စေ့စေ့စပ်စပ် လေ့လာရတာ..။ တခါက ပုရွက်ဆိတ်အမဲကြီး ကျမခြေဖမိုးပေါ် ရောက်နေတာကို ရုတ်တရက်လှမ်းကြည့်လိုက်တော့ ကျွတ်ထင်ပြီး…ကျမခြေကားယားလက်ကားယားနဲ့ အိမ်ကလူတွေရှေ့မှာကာယအိနြေ္ဒ ပျက်ခဲ့ရသေးတယ်..။ ဒင်းတို့က အဲ့ဒီလိုလဲ ကျမကို အရှက်ခွဲခဲ့တာ…..။ တခါတလေ အိပ်မက်ထဲတောင် ထည့်မက်တဲ့အထိ….။ အိမ်ကကြောင်မက ထရန်စပိုတာမလေ…။ တခါတခါ သူ့လက်ချောင်းခြေချောင်းလေးတွေကြား ပါပါလာလို့ သူ့ကိုလဲ အိပ်ခန်းထဲမ၀င်အောင်….မျက်စိဒေါက်ထောက်ကြည့်ရသေးတယ်…။ ကျမခြေချောင်းတွေများ အရင်က စုစုလေး..၊ ခုတော့ ဒင်းတို့များ ခြေချောင်းကြားရောက်နေမလားဆိုပြီး အပြင်ကပြန်လာတိုင်း ခြေချောင်းတွေဖြဲဖြဲကြည့်ရတာနဲ့ပဲ…ကျမ ခြေချောင်းတွေ ကြဲကုန်တာလေ…ဒင်းတို့ကြောင့်…။

ပြောသလိုပဲ…။ အိမ်မှာက တိရိစ္ဆာန်ဆိုတာ မွေးစရာကို မလိုတာ….။ အပေါ်ကပြောတဲ့ ထရန်စပိုတာမရဲ့ အမေလဲ အိုက်လိုပဲ….။ အိမ်ကိုဘယ်ကမှန်းမသိရောက်လာ၊ ယောက်ယက်ခတ်ပြပြီး ပွတ်သီးပွတ်သပ်လုပ်လေတော့…ဟိုဟာလေးချကျွေး၊ ဒီဟာလေး ချကျွေးနဲ့…သူက ဟိုဘက်အိမ်ကူးလိုက်၊ ကိုယ့်အိမ်ကူးလိုက်လုပ်ပြီး… ဒီ နှစ်အိမ်က သူ့စားအိမ်သောက်အိမ်ကို ဖြစ်သွားတော့တာ…။ ဟော့…ဗိုက်ကလေးလဲပူလာရော.. အိမ်ကအမက သူဝင်မွေးဖို့ စက္ကူပုံးတွေ အခင်းတွေ အဆင်သင့်ပြင်ပြီးသွားပြီ….။

မွေးတော့လဲ တခြားကြောင်တွေများ လူမသိသူမသိတိုးတိုးတိတ်တိတ် ပြီးသွားခဲ့တာ..။ သူ့ကျမှ ညဘက်ကြီး မွေးချင်နေတာနဲ့ အိပ်နေတဲ့လူပေါက်စေ့လိုက်နှိုး၊ လူစုံမှ တစ်ယောက်က သူ့လက်ကို ကိုင်၊ တစ်ယောက်က သူ့ဗိုက်ကိုပွတ်၊ တစ်ယောက်က ဘုရားစာရွတ်နဲ့…အိုက်လို…ကြောင်ပါးဝခဲ့တာ…။ မွေးလဲမွေးရော…ထရန်စပိုတာမ တစ်ကောင်တည်း….။

ကင်းမြီးကောက်ကြီးတွေလား…ဟဲဗီးကြီးတွေရှိတယ်နော်..အိမ်မှာ…။ နွေအကူးဆို ထွက်ထွက်လာပြီ…။ အရက်ထဲ စိမ်သောက်ချင်သူများ…လာဖမ်းဂျဘာ…။

ခုနကပြောတဲ့…ခွေးလေးကောင်လေ…

အိမ်အပေါ်ကုန်းပေါ်က ခွေးသုံးကောင်ရယ်၊ အိမ်ပေါ်လမ်းကုန်းအတက်က ခွေးတစ်ကောင်ရယ်…ပေါင်း လေးကောင်။ ကုန်းပေါ်က ခွေးသုံးကောင်က ခွေးလင်မယားနှစ်ကောင်ရယ်၊ သူရို့သမီးလေး တစ်ကောင်ရယ်..။ အဖေအမေရုပ်လေးမဆိုးသလောက် သမီးလေးက ရုပ်လေး မဆိုစလောက်ဆိုးရှာတယ်….။ ဒါကိုပဲ အိမ်ကအမက သူ့ကို ရုပ်ဆိုးမလို့ခေါ်တယ်….။ ကျမ မကြိုက်မှန်းသိလို့…တမင် စ ပြီးခေါ်တာလေ…။

အဲ့ဒီခွေးလေးကောင်နဲ့…ဟိုကြောင်မ စားဖို့သောက်ဖို့ကို အမက ဈေးမှာ ငါးတွေ ကြက်ရိုးတွေဝယ်တယ်၊ ဆန်သပ်သပ်ဝယ်ပြီး တစ်အိုးသပ်သပ်ခွဲ သေချာချက်ကျွေးတာ…။ ကာကွယ်ဆေး ကာကွယ်ဆေးမို့၊ သန်ချဆေး သန်ချဆေးမို့…၊ ဟိုသားအမိ နှစ်ကောင်ကို ကလေးမရအောင်ဆိုလား အဲ့ဒီဆေးလဲထိုးသေးတယ်..။ အဲ့ဒါတွေအတွက်ကတော့ အဖေနဲ့ကျမက လကုန်တိုင်း နောက်လအတွက် ပိုက်ဆံထုတ်ပေးတယ်….။

စေတနာကြောင့်မို့ထင့်…၊ အဲ့ဒီနောက်ပိုင်း အဖေနဲ့ကျမ အလုပ်အကိုင်ပိုင်းမှာ အဆင်ပြေခဲ့တယ်…။

ဒီနေ့လဲ အိမ်ကအမနဲ့ အချီအချပြောရင်း မနက်စာစားဖို့ ထမင်းစားခန်းဘက်ကူးလာတော့ အမေက ပေါင်မုန့်ထောပတ်သုတ်နေပြီ…။

“အမေ့…သမီးလဲ စားမယ်….”

အမေက ပြန်ပြောတယ်..။ တစ်ခွန်းပဲ…

“ကွကိုယ်…သုတ်စား” တဲ့….

အွင်း…..ရဘာဒယ်..ဒီလောက်ကတော့…အရည်ထူနေပြီ…။

ပေါင်မုန့်တစ်ချပ်ကို ကျမကောက်ကိုင်လိုက်ရင်း…ခမ်းလုကို သတိရလို့….

“အမေ့…ဖားတွေက ဘာစားလဲဟင်…”

အမေကလဲ သဘောပေါက်ပါတယ်…၊ ကျမ ကြောင်ရေချိုးတော့မယ်ဆိုတာ…။

“ကွကိုယ် အသာနေပါဟယ်….၊ သွသူ ရှာစားပါလိမ့်မယ်…” တဲ့…

အဲ့ဒီအချိန်မှာပဲ..အိမ်က အမက ၀င်ပြောတယ်…။

“ဟယ်…ရုပ်ဆိုးမကတော့…ဘီစကစ်တော်တော်ကြိုက်တယ်….၊ မနေ့က ငါကျွေးတော့ စားလိုက်တာ အများကြီးပဲ…”တဲ့…

လုပ်ပြီ…သူများ သားသမီးကို နာမည်လာဖျက်နေပြီ…။ ဒါမျိုးတော့ ဘယ်ရမလဲ…။

“ညီမလေးရဲ့ မိကျားက ရုပ်မဆိုးဘူး…၊ မွေ့ရဲ့ ကြောင်မထက်တောင်…လှသေးတယ်…”

ဒါမျိုးက ပြောနေကျပါ….။ ကြားဖူးနေကျ မွေ့ကတော့ အရည်ထူပြီး ပြုံးဖြီးဖြီးလုပ်နေတယ်….။ တောင်ကြီး – ရန်ကုန် ကူးလိုက်သန်းလိုက်လုပ်နေတဲ့ အမေကသာ ကျမစကားကြောင့် ကျမကို မျက်လုံးကြီးပြူးပြီး..ပြန်ကြည့်ရင်းနဲ့ ပြောတယ်…။

 

“ကြောင်မက မိကျားထက်တော့ လှပါတယ်ဟယ်…” တဲ့…

“ဟင်…အမေကလဲ…မိကျားကမှ တစိမ့်စိမ့်ကြည့်လေ…ပိုလှလေ….”

ကျမလဲ အမေ့ကို စချင်တာနဲ့ နိုင်အောင်ပြောခဲ့ပြီး အလုပ်သွားဖို့ ထမင်းစားဝိုင်းက ထွက်လာခဲ့တယ်…။ ကိုယ့်ဟာကိုယ် ရှာဖွေစားသောက်နိုင်တဲ့ ခွေးတွေကို မချစ်ဘူးလို့ အတိအလင်းတရားဝင်ကြေငြာထားတဲ့ အမေကတော့ မျက်စောင်းကြီးတထိုးထိုးနဲ့ အိမ်မှာကျန်ခဲ့လေရဲ့…..။

ပြန်ရင်တော့…ဒီကိစ္စ အမေနဲ့ ဆက်ငြင်းရဦးမယ်…..

:)

 

 

ကောင်းကင်ပြာ

Kaung Kin Pyar

About Kaung Kin Pyar

Kaung Kin Pyar has written 44 post in this Website..