image-internet(http://www.trocadero.com/stores/auermaf/items/577318/item577318.html)

image-internet(http://www.trocadero.com/stores/auermaf/items/577318/item577318.html)

 

 

 

 

 

 

 

 

 

ဖြစ်စဉ်(၁)

ညီရင်းအစ်ကိုလို ခင်မင်တွယ်တာနေသူတစ်ယောက်၏ မင်္ဂလာဦးညတွင်ဖြစ်သည်။

ထိုညမှာ သတို့သားဖြစ်သူက သူငယ်ချင်းမိတ်ဆွေများကို ညစာစားပွဲတစ်ခုနှင့် ဧည့်ခံသည်။

ဖွယ်ဖွယ်ရာရာ စားသောက်ရယ်မောနေကြဆဲမှာပဲ
ကိုယ်က စကားတစ်ခွန်းကို အလေးအနက် ပြောလိုက်သည်။

”အင်းးး ဒီညဟာ. . . ဟောဒီက သတို့သား မောင်ထွန်းအောင်ရဲ့ နောက်ဆုံးညတစ်ညဖြစ်တယ်. . .
ကျုပ်တို့သူငယ်ချင်းရဲ့
လူပျိုဘဝ. . .”

ကိုယ့်စကားမဆုံးလိုက်ချေ။

.မောင်ထွန်းအောင်က
”ဘာာာာ. . . နောက်ဆုံးည ဟုတ်လားးး” ဆိုပြီး ရှုးရှုးရှဲရှဲ ဖြစ်သွားသည်။

ထိုညသည် သတို့သားဖြစ်သူက စိတ်ဆိုးမာန်ဆိုးဖြင့် စားပွဲဝိုင်းမှ ထွက်ခွါသွားသည့်ည ဖြစ်သည်။

မင်္ဂလာယူနေတဲ့အချိန်မျိုးမှာ နောက်ဆုံးည ဆိုသောစကားက နိမိတ်မကောင်းသော စကားအရိပ်အယောင် ဖြစ်နေသောကြောင့် မပြောသင့်ဘူးလို့ သူက ယူဆခဲ့သည်။
(မင်္ဂလာရှိစွာ ဝိုင်းဖွဲ့ရယ်ရွှင်နေရာမှ ဒေါသတလူလူဖြင့် သူကထွက်ခွါပြီး  ကိုယ်တို့ကတော့  တိတ်ဆိတ်စွာကျန်ရစ်သည်။)

တကယ်တော့ ထိုညသည် ထိုသတို့သား၏ လူပျိုဘဝ နောက်ဆုံးညပဲ. . .လို့

ဧည့်ခံပွဲမှာ ရှိနေသည့်

ကိုယ်တို့  အားလုံးက (အမှန်တရားတစ်ခုအဖြစ်)ကိုယ်စီ လက်ခံထားပြီးသား  ဖြစ်သည်။

********************

ဖြစ်စဉ်(၂)

ရပ်ကွက်ထဲမှ သိပ်မရင်းနှီးသော တစ်ရပ်ကွက်သားချင်းတို့ မင်္ဂလာဆောင် ထိမ်းမြားလက်ထပ်ကြသည်။

ဆင်းရဲနွမ်းပါးသူတို့ ရပ်ကွက်မှာ မရှိရှားပါးစွာ အကျဉ်းရုံး ဆောင်ရသော မင်္ဂလာအခမ်းအနားဖြစ်ပြီး       ကိုယ်. . .အသိအမှတ်ပြုရန် လာခဲ့သည်။

လာရောက်သူ (နွမ်းနွမ်းပါးပါး)အတော်များများက လက်ဖွဲ့ပစ္စည်းများကို ပါကင်လှလှထုပ်ပိုး၍ ပေးကြသည်။

ကိုယ်ကတော့ ငွေစအနည်းငယ်ကို စာအိတ်ဖြူဖြူလေးထဲ ထည့်ကာ ပေးလိုက်သည်။

ဤငွေသားသည် ပါကင်လှလှ ထုပ်ထားသော ပစ္စည်းပစ္စယအပေါစားတွေထက် သူတို့ဇနီးမောင်နှံအား ပို၍ အသုံးဝင်ပါစေသား။

မထင်မှတ်ပဲ ကိုယ်နှုတ်က လွှတ်ခနဲ ပြောမိသွားသည်။
”ရော့ အိမ်ထောင်စု အသစ်တစ်ခုအတွက် ”ကူငွေ” ”

ကိုယ့်နှုတ်မှ ထွက်သွားသော ”ကူငွေ”ဆိုသည့် စကားလုံးလေးကြောင့် ထိုမင်္ဂလာပွဲအတွင်းမှာ အုန်းအုန်းကြွက်ကြွက်ဖြစ်ခဲ့သည်။

မင်္ဂလာမောင်နှံအပါအဝင် နှစ်ဖက်ဆွေမျိုးများနှင့် တစ်ရပ်ကွက်သားချင်းအတော်များများက ကိုယ်ပြောသော ကူငွေဆိုသည်ကို နာနာကျည်းကျည်း
ဖြစ်ကုန်ကြသည်။

သူများ မင်္ဂလာဆောင်ကိုများ ကူငွေ လာပေးသတဲ့. . .ဆိုပြီး တောက်တခတ်ခတ် ဖြစ်သူက ဖြစ်၊ ရင်ထု မနာဖြစ်သူက ဖြစ်ကုန်၏။

ဘာပဲဖြစ်ဖြစ် ကိုယ်ပေးသော ကူငွေသည် နိမိတ်မကောင်းဘူးဟု ယူဆ၍ ”ကူငွေ”အဖြစ် သုံးသည်ဖြစ်စေ
တကယ့်ကို အကူအညီအထောက်အပံ့ရသည့် ”လက်ဖွဲ့ငွေ”ဟု ယူဆ၍ သုံးသည်ဖြစ်စေ သုံးလို့တော့ဖြင့် ရပါလိမ့်မည်။

ငွေသည် ငွေအဖြစ်ရှိနေသ၍ အသုံးတော့ဖြင့် ဝင်ပါလိမ့်မည်။

********************

ဖြစ်စဉ်(၃)

ကိုယ် ခရီးထွက်ရမည်။
၇ ရက်လည်း ကြာနိုင်သည်။
၁၀ ရက်လည်း ဖြစ်သွားနိုင်သည်။

သွားရမည့် ခရီးက ကြမ်းသည်။

ေ.တောတောင် သဘာဝအကြား အရဲစွှန့်ကာ သွားရမည်။

မသွားခင်မှာ လုပ်လက်စ အလုပ်များ လက်စသတ်ရန်  အင်တာနက်ဆိုင်ထဲ ဝင်လိုက်သည်။

E-mail ပို့စရာ ရှိသည်များပို့ဖို့နှင့် အခြား လုပ်စရာရှိသည်တို့ကို အင်တာနက်သုံးပြီး လုပ်ရမည်ဖြစ်သည်။

ရင်းနှီးနေသော အင်တာနက်ဆိုင်ပိုင်ရှင်က ကိုယ့်လက်ထဲက အထုပ်အပိုးများကို ကြည့်ပြီး မေးသည်။

”ဘာတွေလဲဗျ”

”ခရီးသွားရင် ယူသွားဖို့. . . လိုအပ်တဲ့ပစ္စည်းတွေ ဝယ်လာတာပါ”

”အော်. . .ခရီးထွက်မလို့လား။     အခု အင်တာနက် သုံးမှာလား’

” အင်းး သုံးမယ်။
ခရီးမသွားခင် နောက်ဆုံး အနေနဲ့ အင်တာနက်သုံးရမှာ”

”ခရီးမသွားခင် နောက်ဆုံးအနေနဲ့” ဆိုသော စကားလုံးကို ကိုယ်ပြောဆိုလိုက်၍ ဆိုင်ပိုင်ရှင်က အထိတ်တလန့် ဟန်ပြုသည်။

”ခင်ဗျားဗျာ. . .ခရီးသွားခါနီး အဲ့လို မပြောကောင်းဘူးဗျ” ဟုလည်း ဂရုဏာဒေါသ ထွက်ပြသည်။

ကိစ္စ မရှိပါ။
ကိုယ်. . .ဘာမှ ပြန်မပြောပါ။
ထိုသူ၏ ရှေးရိုးဆန်သော အယူသီးမှုကို ကိုယ်က ရင်မခုန်။
ကိုယ်လုပ်စရာရှိတာ ဆက်လုပ်နေလိုက်သည်။

ကိုယ့်အတွက်တော့ ဒါဟာ ခရီးမထွက်ခင် . .. . . နောက်ဆုံးအဖြစ် အင်တာနက်သုံးခြင်းပဲ ဖြစ်သည်။
.တောထဲတောင်ပေါ်မှာ ဘာဆက်သွယ်မှု/ဘာအင်တာနက်လိုင်းမှ ရမည်မဟုတ်။

~~~~~~~~~~~~

ဆယ်ရက်ခန့်ကြားအပြီး
ခရီးမှ ပြန်ရောက်ချိန်မှာ
ထို အင်တာနက်ဆိုင်ပိုင်ရှင်နှင့်  ပြန်ဆုံသည်။

”အင်တာနက် ထပ်လာသုံးတာ” ဟူသော စကားမှလွဲ၍
ကိုယ်နှုတ်က တခြားစကား မပြောဖြစ်ပါ။

”မပြောကောင်းဘူး ဆိုသော စကားများ”ကို ပြောသည်ဖြစ်စေ ”ပြောကောင်းသည် ဆိုသော စကားများ”ကို ပြောသည်ဖြစ်စေ. . .
လုပ်စရာရှိတာ ဆက်လုပ်ရုံပဲဖြစ်သည်။

နိမိတ်များကို . . . .
ကိုယ်က ရင်မခုန်သော်လည်း နိမိတ်ကောက်သူများကတော့ အလိုလိုနေရင်း ထိတ်လန့်ရင်ခုန်နေကြသည်။

ကိုယ်ကတော့ . . .

နိမိတ်ထက်. . .

ဖြစ်စဉ်အတိုင်း ဖြစ်စရာရှိတာသာ . . . ဆက်ဖြစ်မြဲ ဖြစ်သည်။

*******************

ချစ်ခင်လေးစားလျက်. . .

Maung Thura

09/03/2015/ 1 :00 AM

Thint Aye Yeik

About Thint Aye Yeik

Thint Aye Yeik has written 599 post in this Website..

Maung Thura @ သင့်အေးရိပ် CJ #5222013