https://www.facebook.com/tin.nyunt.338?fref=ts

ပလေတိုပြောသွားဖူးတဲ့ စကားတစ်ခွန်းကို ပြန်ပြီးတော့ ကိုးကားချင်ပါတယ်။

“ကလေးသည် မသင်ယူချင်လျှင် သင်ကြား၍မရ” ဆိုတဲ့ စကားပါ။
ခု ဆရာတို့ ဆရာမတို့ သင်ကြားနေတဲ့ ကလေးတွေဟာ တကယ်သင်ယူချင်လို့ သင်နေကြတာလား၊ မိဘတွေက အတင်းလာပို့ထားလို့ သင်ကြားပေး နေကြရတာလား။ ပြန်စဉ်းစား ဖူးပါသလား။

ကျောင်းဆိုတာ လေးဘက်နံရံကာထားပြီး၊ ကျောင်းတက်လျှင် ၀င်းဝတံခါးကိုပါ ပိတ်ထားကာ ပတ်ဝန်းကျင်နဲ့ အဆက်ဖြတ်လိုက်သော နေရာကို ကျောင်း လို့ ထင်ထားစဲဆိုရင်တော့ ကျွန်တော်တို့ ခေတ်ကို မမြင်တော့ဘူးလို့ ဆိုရမယ်ထင်တယ်။

ဆိုဗီယက်ရုရှားခေတ်က သတင်းကားတိုလေးတစ်ခုကိုကြည့်ဖူးတယ်။ ပါမောက္ခကြီးတစ်ယောက်က မူလတန်း ကလေးတွေကို စာသင်တာ။ ကလေးတွေကို သစ်တောထဲခေါ်သွားတယ်။ စမ်းချောင်းလေးတွေကို ဖြတ်ကြ တယ်။ ပန်းလေးတွေ ခူးကြတယ်။ ခူးလာတဲ့ ပန်းလေးတွေကို အမည်ရွတ်စေတယ်။ စာလုံးပေါင်း ခိုင်းတယ်။ စမ်းချောင်းထဲက ကျောက်တုံးလေးတွေ ကောက်လာခိုင်းတယ်။
မင်းကောက်လာတာ ဘယ်နှတုံးလဲ။ တစ်..နှစ်..သုံး၊ ဟုတ်ပြီ …
သမီးကောက်လာတာကရော ဘယ်နှခုလဲ။ နှစ်ခု .. ဟုတ်ပြီ၊
မင်းတို့ နှစ်ယောက် ကျောက်တုံးလေးတွေ ဒီမှာ ပုံလိုက်၊ အားလုံး ဘယ်နှစ်ခုလဲ၊ တစ် .. နှစ် .. သုံး .. လေး .. ငါး၊ ဟုတ်ပြီ အဲဒါ ငါးခု။

ပါမောက္ခကြီးက ကလေးတွေကို သင်္ချာ သင်နေတာ။

ဟို တောင်ကုန်းပေါ်မှာ ရပ်နေတာ ဘာကောင်ကြီးလဲ။ သိုး တစ်ကောင်။ သိုးကို ဘယ်လို ပေါင်းသလဲ။
ကလေးတွေ အလုအယက် အော်ကြ၊ ပျော်ကြ။ ဘာကျောက်သင်ပုန်းမှ မလို၊ မြေဖြူမလို၊ စာအုပ်မလို၊ ခဲတံ မလို။ သဘာဝစာသင်ခန်း။ ပတ်ဝန်းကျင်ကျောင်း။ ကြည်နူးစရာ ကောင်းလိုက်တာ။

ရာသီဥတု မကောင်းတဲ့အချိန် ကျောင်းခန်းထဲမှာ ကလေးတွေ ထည့်ထားတယ်။ ကျောင်းခန်းက ဆူညံနေ တယ်။
ရွှံ့တွေနယ်တဲ့ကလေး၊
ဒရမ်တီးနေတဲ့ကလေး၊
ပန်းချီဆေးတွေကို လိုက်သုတ်နေတဲ့ ကလေး၊
စာရွက်တွေကို ကတ်ကြေးနဲ့ ညှပ်ပြီး အရုပ်တွေ လုပ်နေတဲ့ကလေး။
ပါမောက္ခကြီးက စန္ဒရားတီးနေတာကို သီချင်းလိုက်ဆိုနေတဲ့ကလေး။
အဲဒါကျောင်းဗျာ။ စာသင်နေတာဗျာ။ မူလတန်းကလေးကို ပါမောက္ခကိုယ်တိုင် သင်နေတာဗျာ။

အစဉ်အလာ ပညာရေးစနစ်ထဲမှာ နစ်မြောနေတဲ့ ဆရာတွေ ဆရာမတွေကို ကျွန်တော် မေးခွန်းလေး ငါးခုလောက် မေးကြည့်ချင်ပါတယ်။

– ဘယ်သူ့ကို သင်ကြမှာလဲ (WHO)
– ဘာကို သင်ကြမှာလဲ (WHAT)
– ဘယ်မှာ သင်ကြမှာလဲ (WHERE)
– ဘယ်အချိန်မှာ သင်ကြမှာလဲ (WHEN)
– ဘာကြောင့် သင်ကြမှာလဲ (WHY)

ဖြေကြည့်စမ်းပါ ဆရာတို့ ဆရာမတို့ခင်ဗျား။
မိဘတွေလည်း ဖြေကြည့်ကြစေချင်ပါတယ်။
သတင်းလောကမှာ သာမဟုတ်ပါဘူးဗျာ။

ပညာရေး လောကမှာလည်း “ဘ ငါးလုံး” သို့မဟုတ် “5W” ဆိုတာ ရှိပါတယ်။

ကျွန်တော် အားတဲ့အချိန် ဖြေပေးပါ့မယ်။ ဆရာ ဆရာမတို့ အမြင်တွေနဲ့ တူ၊ မတူဆိုတာကို တိုက်ကြည့်ချင်ပါ တယ်။

တစ်ခုတော့ သတိပေးချင်ပါတယ်။
စာသင်တာ လေးဘက်နံရံကာ ထောင်ထဲမှာ ပိတ်လှောင်ထားဖို့ဆိုတဲ့ အမြင်နဲ့ သင်ချင်တဲ့ ဆရာတွေဆိုရင်လည်း မဖြေချင်နေနိုင်ပါတယ်။
အဲဒီလို ထင်နေတဲ့ မိဘတွေလည်း မဖြေချင်ရင် ရပါတယ်။

Tin Nyunt
၁၈.၄.၂၀၁၅

About Travis Zaw

Travis Zaw has written 11 post in this Website..