“မနေသူတွေကြားထဲမှာ နေရမယ်”တဲ့။

ရပ်ကွက်ဓမ္မာရုံမှ နက်ဖြန်မနက် ဘုံဆွမ်းလောင်းကြမည်ဖြစ် သောကြောင့် ချက်ကြ၊ ပြုတ်ကြစဉ် ဖွင့်ထားသော တရားခွေမှ လွင့်ပျံလာသော တရားသံတစ်ချက်။ အလုပ်လုပ် နေရင်း မသိမသာ နားစွင့်မိသည်။ ဘာတဲ့“မနေသူတွေကြားထဲမှာ နေပါ”ဆိုပါလား။ စိတ်ဝင်စားစရာပဲ။ ဘာကို ဆိုလိုချင်တာပါလိမ့်မယ်။ သိချင်စိတ်တွေ ယိုဖိတ်လာပေါ့။ ဒါနဲ့ ပြူတင်းပေါက်နား သွားလို့ နားစွင့်မိပါတယ်။

လောကကြီးက ဖြစ်သလိုနေ၊ အာရုံဆွဲရာနောက် ကောက်ကောက်ပါအောင် လိုက်နေကြတဲ့ လူတွေ အများသားနော်။ အပ္ပမာဒနဲ့ ဆန့်ကျင်ဘက်ဖြစ်တဲ့ ပမာဒနဲ့သာ နေနေကြတဲ့လောကမှာ အပ္ပမာဒ တရား လက်ကိုင်ထားပြီး နေနိုင်အောင် ကြိုးစားရမယ်။ အော ခုမှ သဘောပေါက်ပေါ့။ မနေသူတွေဆိုတာ သတိ လက်ကိုင်မထားပဲ ဖြစ်သလို အာရုံနောက်လိုက် ပျော်ပါးနေကြတဲ့သူများကို ဆိုလိုတာပေါ့။ အဲဒီကြားမှာ နေရင်းက သတိလက်ကိုင်ထားပြီး နေရမယ်လို့ ဆိုလိုတာပါလားဆိုတာ ရေးရေး ပေါ်လာပါပြီ။

နေခြင်းနဲ့ပတ်သက်လို့ ပြောကြတာရှိတယ်။ တို့က တိုက်နဲ့ ကားနဲ့၊ အသိုင်းအ၀ိုင်းနဲ့ ရွှေတွဲလွဲ၊ စိန်တွဲလွဲ တွေနဲ့ပေါ့။ နေပါလေ။ ဘယ်လိုနေနေ ကိစ္စမရှိပါ။ သို့သော် နေစဉ်မှာဖြစ်နေတဲ့ စိတ်ကလေးကိုတော့ အကဲခတ် စေချင်တယ်။ ဘယ်လိုစိတ်နဲ့ နေသလဲလို့ပေါ့။ ပြောရင်းနဲ့ ကိုယ့်စိတ်ကိုယ် ပြန်မေးမိပါတယ်။ ငါ ဘာစိတ်တွေနဲ့ အချိန်တွေကုန်နေခဲ့သလဲ? ဆိုတာ။ အော် ရှာရင်းနဲ့ ကုန်နေခဲ့တာပဲ။ ဘာလို့ရှာလဲ။ လိုချင်တာတွေက အတောမသတ်ဘူးလေ။ ဒါကြောင့် အတောမသတ်နိုင်သော လိုအင်ဆန္ဒများနောက်လိုက်ရင်းက ရတဲ့အခိုက် ယစ်မူးပျော်ပါးပြီး မရပြန်တော့ သောကတွေနဲ့ ဗလချာကိုနောက်နေလိုက်တာ။ ကိုယ့်စိတ်ကိုယ်ကြည့်ရင်း တော်တော် မျက်စိနောက်လာပေါ့။

အင်း ခုကစလို့တော့ ဒီတိုင်းသာဆို မလွယ်ရေးချမလွယ်ပြီ။ ဒီတော့ ဘယ်လိုနေရမလဲ။ သတိလက်လွတ်နေထိုင်နေကြတဲ့လောကကြီးထဲမှာ သတိတရားလက်ကိုင်ထားပြီး မိမိစိတ်ကို အတတ်နိုင်ဆုံး စောင့်ရှောက်ပေးရမှာပါလားလို့ ပေါ်လာပေါ့။ အော် တော်တော်လည်း တာဝန်မကျေလိုက်တဲ့ငါပါလား။ သူများ အပေါ် တာဝန်ကျေဖို့မပြောနဲ့ဦး။ ကိုယ့်စိတ်ကလေးကိုယ် ပစ်ထားလိုက်တာ။ ကိုယ့်တာဝန်ကိုယ်မယူနိုင်သူက အခြားဘာတာဝန်တွေကိုများ ယူနိုင်ဦးမှာလဲလို့။ စိတ်မကောင်းလိုက်တာ။ လောကမှာ တာဝန်မကျေသူအဖြစ် ရပ်တည်ရတဲ့ ဘ၀က အဆိုးဆုံးပဲလို့ ခံယူထားတဲ့ငါ။ ခုတော့ဖြင့် ဘယ့်နှယ့်ရှိစွ။ အင်း မဖြစ်ချေတော့ပြီ။ ခု နားစွန်နားဖျား ကြားနာလိုက်ရတဲ့ တရားသံကပဲ မိမိအတွက် ပြုပြင်ဖို့ တွန်းအားပေးနေလေပြီ။

ဒါကြောင့် အနှစ်ချုပ်ကြည့်တော့ ရန်များတဲ့လောကကြီးထဲမှာ ရန်ငြိမ်းအောင်နေမယ်။

ပမာဒတရားနဲ့ ပျော်မွေ့နေတဲ့လောကထဲမှာ အပ္ပမာဒတရား လက်ကိုင်ထားပြီး နေရမယ်။

ဒေါသမီးတွေ တောက်လောင်နေတဲ့ လောကကြီးထဲမှာ မေတ္တာဓါတ်နဲ့ နေနိုင်အောင် ကြိုးစားရမယ်။

တဏှာတွေအမျိုးစုံနဲ့ မီးဟုန်းဟုန်းတောက်ပြီး ဖြစ်ချင်တိုင်းဖြစ်နေကြတဲ့ လောကကြီးထဲမှာ လောဘတဏှာရဲ့ ကျေးကျွန်အဖြစ်မခံဖို့ ကြိုးစားနေထိုင်ရတော့မယ်။

ကိုယ်ချင်းစာစိတ်နည်းလာတဲ့လောကကြီးထဲမှာ ဗြဟ္မစိုရ်တရား လက်ကိုင်ထားနေနိုင်အောင် ကြိုးစား နေထိုင်ရမယ်။

အင်း နောက်ဆုံးတော့လည်း “မနေသူတွေကြားထဲမှာ နေပါ့မယ်” ။

who who

About who who

who who has written 95 post in this Website..

“အများအကျိုး ရွက်သယ်ပိုးက ခနိုးခနဲ့ ဆိုကဲ့ရဲ့လည်း မရွဲ့မစောင်း ကိုယ့်လမ်းကြောင်းကို စိတ်ကောင်းနှင့်ယှဉ် ရှေးရှုနှင်လော့”