ငယ်ငယ်တုန်း က စာမေးပွဲပြီးတိုင်း အသံမထွက်သလောက် ဖြစ်ကျန်လေ့ရှိတယ်။
အသားကုန် အော်ကျက် လိုက်မှ စာရတယ် မှတ်တာကိုး။
အိမ်နီးချင်းတွေ က တော့ ကိုယ့်စာကျက်သံ ကို အပျင်းပြေတယ် တွေးမလား၊ နားညည်းတယ် ဆိုပြီးပြေးမလား မသိ။
အခုလို ပညာရေးစနစ်ကြီး ဇောက်ထိုးမှောက်နေချိန် အတွင်း လှောင်ပြောပြော နေ သလို ပြောရရင် “ကြက်တူရွေး” နှုတ်တိုက် ကျက်တယ် ပေါ့။
ကိုယ့်အချိန်တွေ တုန်းကလို အခုချိန် မှာရော စာအော် ကျက် ကြတဲ့ ဓလေ့ ရှိသေးလား သိချင်သား။

တွေးမိနေတယ်။
စာအော်ကျက် ခဲ့တာ က စာတွေကို နားမလည်ဘဲ နှုတ်တိုက် အလွတ်အော်ခဲ့တာလား လို့။
နားလည်တဲ့ စာ ကို နှုတ်တိုက်ရအောင် ပြန်ကျက်ခဲ့တာ လို့ ဘဲ ယုံကြည်ပါတယ်။
ဒါဆို “၏ သည် မရွေး” ဘာလို့ ကျက်နေခဲ့လဲ မေးဖို့ ရှိလာမှာပါ။
အဖြေ က “နားလည်ပြီးသား ကို စာမေးပွဲခန်းထဲ မှာ ရေးချချိန် တစ်ခါထဲ သွက်သွက်ချ ရေးနိုင်အောင် ကျက်ခဲ့တာလို့”။
သူငယ်ချင်း တစ်ချို့ က စာကျက်ပျင်းလို့ သိပ်ပြီးမကျက်ဘူး။ စာမေးပွဲခန်းထဲ ကျမှဘဲ နားလည်သလိုချရေးမယ် ဆိုပြီး အေးအေးဆေးဆေး နေကြတာ။
သူတို့လဲ အောင်တာပါဘဲ။
ပြောရရင် ကိုယ့်ကိုယ်ကို ယုံကြည်သူ ဆို သိပ်ပြီး ကျက်မနေကြပါဘူး။
ကိုယ့်လို စာမေးပွဲခန်းထဲ မေ့ကုန်ရင်ဒုက္ခ လို့တွေးကြောက် သူတွေ ကတော့ အလွတ် လိုရအောင် ကျက်ကြပါတယ်။
အဲလိုကျက်တဲ့နေရာမှာ တစ်ချို့ က အသံမထွက်ဘဲ ချရေးပြီး ကျက်ကြတယ်။
တစ်ချို့ က ချ ရေးရမှာ ပျင်းလို့ အသံထွက် ကျက်တယ်။
ကိုယ်ကျက်တာ ကိုပြန်ကြား ဖို့ အော်ရင်း အော်ရင်း အသံ မထွက်နိုင်အောင် ကို ဖြစ်တဲ့ အထိပါ။

အခုချိန် ဒီလို အာဖြဲ ပြီး နှုတ်တိုက် ရွတ် နေတာ ကြားကြရင် ကြက်တူရွေး စာကျက် လို့ ပြောခံရမှာ။
နားမလည်ဘဲ အော်နေရင်တော့ ကိုယ် အော်နေတဲ့ စာ တွေ ကို လက်တွေ့မှာ ပြန်မသုံးနိုင်ဘူးပေါ့။
နားလည်ပြီး အော်နေနိုင်ခဲ့ရင် (သို့) ပြန်ချရေးနိုင်ခဲ့ ရင် လက်တွေ့မှာ သုံးနိုင်မယ်ပေါ့။
ဒီမှာ အရေးကြီးလာတာက ဆရာမ တစ်ယောက်ဟာ သူ စာသင်တဲ့ အကြောင်း ကို ကလေး တွေ ခေါင်းထဲ မှတ်မိပြီး လက်တွေ့မှာ ဆက်စပ်နိုင်အောင် ဘယ်လောက် ရှင်းပြပေးနိုင်ခဲ့လဲ ပါ။
ကလေးတွေ စိတ်ထဲ တကယ်ဘဲ နားလည်ခဲ့ရင် အဲဒီနောက်မှာ သူ့ဟာသူဘဲ ရေးချချ၊ / အလွတ်နှုတ်တိုက်ကျက်ကျက် အဲဒါက အရေးမကြီး တော့ဘူး။
ဘာလို့လဲ ဆိုတော့ အဲဒါတွေ က နားလည်ပြီး သား ကို စာမေးပွဲခန်းထဲ ဘယ်လို တင်ပြမယ် ဆိုတဲ့ နည်းလမ်း ဖြစ်သွားပြီ လို့ ထင်လို့ပါ။
ကိုယ်ပိုင် အမြင် အတွေး ယူဆချက်မို့ မှားနိုင်ပါတယ်။

ဒါကြောင့် အနောက်တိုင်းတွေမှာ စာသင်ခန်းထဲ သင်တာ ကို နားလည် ဖို့ လိုရင်း မို့ စာမေးပွဲ ဆိုတာ မထားတော့ဘူး။
စာမေးပွဲ က နေ ကလေးတစ်ယောက် ရဲ့ အရည်အချင်း ကို အကဲမဖြတ်သင့်ဘူးပေါ့။
မှန်သင့်သလောက် မှန်ပါတယ်။
ဒါပေမဲ့ အဲဒီ စာမေးပွဲ နဲ့ မထိတွေ့ရတဲ့ ကလေး တွေ ဟာ တကယ်တော့ ကိုယ်ပိုင် ယုံကြည်မှု အရည်အသွေး အားနည်းကြတယ် လို့ ထင်မိတယ်။
အင်္ဂလန် မှာ အစိုးရကျောင်း တွေ က ကလေး တွေ ကို စာမေးပွဲ နှစ်တိုင်း မစစ်ဘူး။
ပုံမှန် နှစ် တွေ ဆို ဒီအတိုင်း သင် ပြီး အတန်းတက် ကြပါတယ်။
ပုံမှန်မဟုတ် တဲ့ နှစ်တန်း၊ ခြောက်တန်း၊ ဆယ့်တစ်တန်း (GCSE) တွေမှာ ကလေးအားလုံးအစိုးရစစ် စာမေးပွဲ ဖြေရပါတယ်။
ဒါပေမဲ့ အစိုးရ ကျောင်း မဟုတ်တဲ့ ပြင်ပကျောင်း တွေ မှာတက်ရင်တော့ နှစ်တိုင်း စာမေးပွဲ စစ်ပါတယ်။
ဒီမှာတင် ပြသနာ က တကဲ့ တက္ကသိုလ်ကျောင်းကောင်း တွေ အတွက် ဝင်ခွင့်မှာ အမှတ်ကောင်းပြီး ဝင်လို့ ရသူ တွေဟာ အစိုးရကျောင်းထက် အပြင်ကျောင်းကလေး တွေ က လူများစုပါဘဲ။
အစိုးရကျောင်းက လူနည်းစု ကလဲ ကျူရှင်လို တက်ပြီး ဝင်ခွင့် ကို ကြိုးစားရပါတယ်။
ဒါဟာ ဘာလို့လဲ ဆိုတော့ ကလေး တွေ ကို စာမေးပွဲ နဲ့ အမြဲ ထိတွေ့ပေးနေမှု၊ စာမေးပွဲ အတွက် လေ့ကျင့်ပေးနေမှု ပေါ်မှာ ကွာတာပါဘဲ။

တကယ်တော့ ပြောရရင် ကလေး တစ်ယောက် ရဲ့ အရည်အချင်း ကို စာမေးပွဲ က နေ အကဲ မဖြတ်နိုင်ပါဘူး။
ဒါပေမဲ့ အများ နဲ့ ဆုံးဖြတ် ရတဲ့ အခါမှာတော့ ယေဘူယျ သတ်မှတ်ချက် တွေ က နေ ကျောင်းသား တစ်ယောက် ဟာ မေးခွန်း ကို သူ ဘယ်လို နားလည်ပြီး အဖြေကို ဘယ်လို ပြန် ရှင်းပြ နိုင်လဲ ဆိုတာ နဲ့ အကဲဖြတ် ရတာပါဘဲ။
စာတိုင်း ကို နှုတ်တိုက် အလွတ် မကျက်သင့်တာ မှန်ပါတယ်။
ဒါပေမဲ့ တစ်ချို့ စာတွေ က စာသင်ခန်းမှာတင်မက တစ်သက်စာ အလွတ်ကျက်မှတ် ထားရတာ တွေ ရှိ တယ်။
အဲဒီဟာ တွေ ကို အသေမှတ် အလွတ်ကျက် မှ စာမေးပွဲခန်းမှာ အဲဒါတွေ ကို အချိန်ကုန်ပြီး စဉ်းစားဖို့မလိုဘဲ အမြန်ချရေးနိုင်မယ်။
ဒါမှ အဲဒီကနေ ထွက်လာတဲ့ အချိန်ပို မှာ ဉာဏ်စမ်းလို မေးခွန်း တွေ အတွက် စဉ်းစားဖို့  အချိန်ပိုယူနိုင်မယ်။
ဒီအတွက် ကြက်တူရွေးလို ကို နှုတ်တိုက်ကျက်ရပါတယ်။
ဒါကို နည်းလမ်းမှားတယ် ပြောမရနိုင်ဘူးထင်ရဲ့။
အရှေ့တိုင်းသားတွေဟာ အလီ တွေ ဂဏန်းပေါင်း တွေ ကို အနောက်တိုင်း က လူ တွေ ထက် ပိုမြန်မြန် ရတယ်။
ဒါဟာ အလွတ်ကျက်တတ်လို့ဘဲ။
ဒါပေမဲ့ စဉ်းစားပြီး တီထွင်ရေးသားရမဲ့ အကြောင်းတွေ ဆို အားနည်းတယ်။
အဲဒီ အတွက် အနောက်တိုင်းက အားသာချက် ကို ရှာပြီး ဖြည့်ပေးဖို့ ကြိုးစားရမယ်။

.  မြန်မာ ပြည်က ကလေး တွေ ရဲ့ ပညာရေး ကို များ ပြင် ကြရင် ဆုတောင်း ချင်ပါတယ်။
(ကိုယ်မှ ဝင်ပြီး မပြင်နိုင်တာကိုး)
ကိုယ့်မှာ ရှိပြီး အားသာချက်လေး တွေ ကို ဖယ်ပြီး သူများ ဆီက အားနည်းချက် တွေ နဲ့ အစားမထိုးလိုက်ပါစေနဲ့။
သူများဆီမှာ အမှားတွေကို မပြင်နိုင်လို့ အသာကြည့်နေရတာ တွေ ကို လိုက်ပြီး အတုမခိုးကြပါစေ နဲ့။
စိတ် စေတနာကောင်းကောင်း နဲ့ မြင်ကွင်းကျယ်ကျယ် ကို မြင်နိုင်အောင် ကြိုးစားကြည့်တတ်သူများ နေရာရပါစေ။
ဆုတောင်း ရုံ ကလွဲလို့ တစ်ခြားဘာများ တတ်နိုင်ဦးမှာလဲ။

လောလောဆယ် တတ်နိုင်တာကတော့ ကြက်တူရွေး နှုတ်တိုက် ကျက်တယ် ဆို ပေမဲ့ စာကို တတ်အောင် သင်ပေးခဲ့တဲ့ ဆရာကြီး/ဆရာမကြီး များ ကျေးဇူးကို ပူဇော်ကန်တော့ ရင်း ….
အသံနာအောင် စာအကျယ်ကြီး အော်ကျက်ခဲ့တဲ့ အချိန်တွေ မှာ ကိုယ့် ရေဒီယိုသံ မြန်မြန်တိတ် သွားအောင် ဒင်းစာမေးပွဲ အောင်မှ ဖြစ်မယ်တွေးပြီး ဆုတောင်းပေး မဲ့ သူများကို ပြန်လွမ်းရင်း …..
“ရေဒီယိုကမာရွတ်” ကို နားဦးတည့်ခဲ့ပါတယ်။
နားရွှင်လန်းချမ်းမြေ့ကြပါစေ။ :))

+ + + + + ++ + + + + ++ + + + + ++ + + + + ++ + + + + ++ + + + + ++ + + + + +

ရေဒီယိုကမာရွတ် (တေးရေး – စိုင်းခမ်းလိတ် ၊ တေးဆို-စိုင်းထီးဆိုင်)

ဟိုဘက်အိမ်က ညတိုင်း ညတိုင်း စာအကျယ်ကြီး ကျက်တတ်တဲ့ ဆယ်တန်းကျောင်းသူကို
ကျွန်တော်တို့ အဖွဲ့က ချစ်စနိုးလေးနဲ့ ရေဒီယိုကမာရွတ် လို့ မှည့်ထားတယ်။
အိုး ရေဒီယိုကမာရွတ်ရေ့ ကြိုးစားလိုက်စမ်းကွယ် ဒီတွေ နဲ့အောင်ဖို့ ဆုတောင်းပေးမဲ့သူတွေ ရှိတယ်
အိုး ရေဒီယိုကမာရွတ်ရေ့ ကြိုးစားလိုက်စမ်းကွယ် ဒီတွေ နဲ့အောင်ဖို့ ဆုတောင်းပေးမဲ့သူတွေ ရှိတယ်

စာအုပ်ကိုင်ကာ ကျက်ရင်း လျှောက်ရင်း တစ်ခါတစ်ခါ ပြူတင်းဝက ဖြတ်အလာချောင်းကြည့်သူ ရေ
ကိုယ်တို့ရှိလို့ အနှောက်အယှက် ဖြစ်ရင် အလည်လာတဲ့ တစ်ရပ်သားမို့ ခွင့်လွှတ်ကွယ်။
အိုး ရေဒီယိုကမာရွတ်ရေ့ စိတ်မဆိုးလိုက်နဲ့ကွယ် စာတွေ မကျက်နိုင်ရင် ဝမ်းနည်းရမဲ့သူတွေ ရှိတယ်
အိုး ရေဒီယိုကမာရွတ်ရေ့ စိတ်မဆိုးလိုက်နဲ့ကွယ် စာတွေ မကျက်နိုင်ရင် ဝမ်းနည်းရမဲ့သူတွေ ရှိတယ်

ဒီနေ့မှာတော့ တို့များရင်ထဲ ဟာနေရတဲ့  အကြောင်းရင်း စီစစ်လိုက်ရှာတော့
ဆယ်တန်းတွေစာမေးပွဲပြီးလို့ ရေဒီယိုကမာရွတ်ပိတ်ထားခြင်းဘဲ
အိုး ရေဒီယိုကမာရွတ်ရေ့ တိတ်ဆိတ်လွန်းလို့ကွယ် စာအံတဲ့ အသံလေးတောင့်တတဲ့သူတွေ ရှိတယ်
အိုး ရေဒီယိုကမာရွတ်ရေ့ တိတ်ဆိတ်လွန်းလို့ကွယ် စာအံတဲ့ အသံလေးတောင့်တတဲ့သူတွေ ရှိတယ်

မြစပဲရိုး

About မြစပဲရိုး

Khin Latt has written 240 post in this Website..