. ပြီးခဲ့တဲ့ အပါတ်တုန်းက မဟာပုရိသ မင်းယောကျာင်္းကြီး များ အတွက် လက်ချာပြီး တော့
ဒီတစ်ပါတ် ချစ်သော လုံမ တို့ အတွက် လက်ချာပါ။
အမှန်လို့တော့ မပြောပါဘူး။ အပျော်နည်းပေါ့။
(ဒါကြောင့် အတည်ကြံပြီးကြကုန် သော မွန်မွန် the လုံမတို့၊ တုံတုံ the လုံမ တို့ မဖတ်ရ။)

လက်ချာ ကို နိဒါန်းချီမနေဘဲ ဒဲ့ စရမယ် ဆိုရင်တော့
“အိမ်ထောင်မပြု ခင် ဘယ်သူ့ အတုတ်အနှောင် ကိုမှ မခံကြဖို့ပါဘဲ”။
. ရှေးလူကြီးများ ပြောစကား “လင်စံရွေး လင်ခွေး နဲ့ညား” ဆိုတာ ဘာသဘောလဲတော့မသိ။
သို့ပေမဲ့ ကိုယ့်တစ်သက်လုံးပေါင်းရမဲ့ သူ (ဒီတစ်ယောက်မကောင်း နောက်တစ်ယောက်ပေါင်း ဆိုတဲ့ စိတ်မထားရင်) ကိုတော့ ကိုယ်နဲ့ စိတ်တူရာလူ ကို စိတ်ရှည်ရှည်ထား ရှာဖို့ သင့်ပါတယ်။

စိတ်တူရာလို့ ဆိုတာမှာ ကိုယ် ကြိုက်တဲ့ အစားအသောက် နဲ့ သူကြိုက်တဲ့ အစားအသောက် ၊ ကိုယ်ကြိုက်တဲ့ ရုပ်ရှင် နဲ့ သူကြိုက် တဲ့ ရုပ်ရှင် တူတာမျိုးတွေ က စိတ်တူတာလို့ မပြောနိုင်ဘူး။
ဘာလို့လဲ ဆိုတော့ ကွကိုယ်တောင် ဒီနေ့ကြိုက်တဲ့ အစားအသောက် ကို နောက်နေ့ မှာ ကြိုက်ချင်မှ ကြိုက်တော့တာမဟုတ်လား။
တစ်ချို့ မတူတာတွေက ညှိလို့ ရတာ အသေအချာပါ။
အဲဒီအတွက် ညှိနှိုင်းတတ်တဲ့ စိတ်ရှိသူ ဖြစ်ဖို့ နဲနဲ အရေးကြီးလာတယ်။
သူများ ကို ညှိခိုင်း တဲ့ ကိုယ်တိုင်ကလဲ flexible  ဖြစ်နေသင့်တာပေါ့။

. ကြုံ တုန်း ဒီရက် FB ထဲ ကိုယ်တို့မိန်းမများ ရဲ့ တောင်းဆိုချက် စာလွှာ တွေ ဖတ်နေရင်း စိတ်ပျက်မိတာ တွေ ကို ပြောလိုက်ဦးမယ်။
တစ်ချို့ မိန်းကလေး များ ဟာ ကိုယ်ကချည်း အသာစီး လိုချင်တယ်။
ကိုယ်တော်တွေကလဲ မရခင်ချစ်စိတ်မွှန် နေချိန် လျှော့ပြကြမှာပါ။
. နောက်ပိုင်း အိမ်ထောင်ပြုပြီး ကြာရှည်မှာတော့ အဲဒီ အနိုင်ယူချင်စိတ် က ကိုယ့် ကို စိတ်ပျက်စေမဲ့ အကြောင်းဖြစ်လာလိမ့်မယ်။
တစ်ချို့ မိန်းကလေးများ က မဟုတ်တာပြောတဲ့ အလိမ်အညာတွေမှာ သာယာတတ်တယ်။
မညာဘဲ တဲ့တိုးပြောတဲ့ အမှန်ဆို စိတ်ဆိုး ကြတယ်။
ကိုယ့် မိန်းကလေး စိတ်ဆိုးမှာကြောက်လို့ ညာတဲ့  ကိုယ်တော်များ ရဲ့ စကားတွေ ကို အဟုတ်မှတ် နေရော။
ဒီတော့ အဲဒီ ချွတ်ယွင်းမှု ကို မပြင်ဘဲ မသိသလို နေရင်း တကယ်ပေါင်းဖက်ချိန်ကျ အပြစ်ဖို့စရာ အကြောင်းဖြစ် သွားတတ်ပါတယ်။

ထားပါတော့။
ဒါတွေ ဆွဲပြောနေရင် လိုရင်းမရောက်ဘဲ နေတော့မယ်။
စိတ်တူရာ ရွေး ဆိုတော့ ကိုယ်ကြိုက်တာတွေ  နဲ့တူ တာ ရွေးတာမျိုး မဟုတ်ဘူး။
ကိုယ် စရိုက် နဲ့ ကွဲကွဲပြားပြား မတူဖြစ်နေတဲ့၊ ကိုယ့်အနေ နဲ့ မညှိနိုင်တဲ့ ဟာမျိုး တွေ မရှိမှ ကိုယ်နဲ့ စိတ်တူတယ် ခေါ်နိုင်တာ။
အဲဒါမျိုး စရိုက်မတူတာ မရှိမှ ရွေးသင့်တာ လို့ ထင်မိတယ်။

အဲလို အတွင်းကျကျ သိနိုင်ဖို့ အတွက် သမီးရီးစားဘဝ က နေ ဆို သိဖို့ အင်မတန်ခက်သွားပါတယ်။
. နှစ်ဖက်လုံး က ပင်ကိုယ်မဟုတ်တဲ့ စရိုက် မျိုးတွေ နဲ့ အကောင်းဆုံးလိုဖြစ်နေ ဟန်ဆောင် နေပြကြတော့တာ မဟုတ်လား။
. နောက်ပြီး ချစ်သလိုလို နဲ့ သဝန်တိုစိတ်တွေ ရှေ့ထားပြီး မောင်ပိုင်/မယ်ပိုင် စီးထားဖို့ လိုင်စင်ရသွားပါလိမ့်မယ်။
အကြောင်းသိလွန်း သဝန်တို တတ်ကြသလို အကြောင်းမသိ လို့ လဲ သဝန်တိုရပါတယ်။
ဒါကို ရေတိုမှာ ပီတိဖြစ်သလို နဲ့ ခံနိုင်ပေမဲ့ ရေရှည်ဘဝ မှာ အတော်စိတ်ကုန် ဖို့ကောင်းလာမှာ မဟုတ်လား။

တစ်ချို့မိန်းကလေးများ က ရီးစားဖြစ်သွားရင် ကိုယ့်ကို ပိုချစ်လိမ့်မယ်လို့ ထင်ကြတယ်။
လူ့သဘောအရ ကြည့်ရင်ဘဲ အဲဒါ မှားပါတယ်။
. မယုံရင် ထိုထိုသော မဟာပုရိသများ ကို မေးကြည့်ပါ။
မိန်းကလေး တစ်ယောက်ကို ရပြီးချိန်မှာ မရခင် က လောက် ဈေးကြီး တယ် မထင်တော့ဘူး။
မရခင် က သာ ဒီမိန်းကလေး ဘဲ ကိုယ့်မျက်စိထဲ စွဲနေတာ၊
ရပြီးချိန်မှာတော့ တစ်ခြား ပုံရိပ် တွေ ကို မြင်တတ်သွားတယ်။
အိမ်ထောင်ကျပြီးချိန် ပိုဆိုးပါတယ်။
ဒါဟာ သဘာဝ တစ်ခု လိုမို့ အဲဒီ သဘာဝတရားကို မိန်းကလေးများ လက်ခံ တတ်ရမှာပါ။
အဲဒီ အချက် ကြောင့်လဲ ဖြစ်နိုင်သမျှ ကိုယ့် ဘဝကို သူများလက်ထဲ အလွယ် ထိုးမအပ် လိုက်ကြပါနဲ့။
ပိုပိုပြီး တန်ဖိုးရှိ အောင် တနည်း ဈေးမကျအောင် ကိုယ့်ကိုယ်ကို မြှင့်ဖို့သာ ကြိုးစားပါ။
အဓိကကတော့ စိတ်ဓာတ်ရေးရာပိုင်းမှာပေါ့။

ရုပ်ခန္တာ ဆိုတာ ရိုးအီလွယ်ပါတယ်။
ဘယ်လောက် လှလှ တစ်ယောက် ထဲ ကိုချည်း နေ့တိုင်း ကြည့်နေရင် ကြာတော့ သာမာန်လိုဘဲ ဖြစ်သွားမှာ အသေအချာပေါ့။
ဝက်သားသုံးထပ်သား ဟင်း က တစ်ခါတစ်လေတော့ ကောင်း ပေမဲ့ ကြာရင် အီလာသလိုပေါ့။
. ရေရှည် မှာ  ကိုယ့် ကို အမြဲတမ်း စိတ်ဝင်စား နေမှာက ကိုယ့်ရဲ့ စိတ်ဓာတ်၊အတွေးအခေါ်၊ အပြော အဆို အပြုအမူ တွေ ပါဘဲ။
ဒါတွေ နဲ့ ဘဲ ထို မင်းယောကျာင်္းများ ကို ရေရှည် ကြိုးဆွဲနိုင်လိမ့်မယ်။
ရုပ်ရည်ဘယ်လောက်ဘဲ တင့်တယ် တင့်တယ် စိတ်ဓာတ်အားကောင်းကောင်း မရှိရင် ရေရှည် မှာ အဲဒီ အရေပြားအလှ က နောက်ကျန်သွားမှာဘဲ။
တစ်ခြား ရွက်ကြမ်းရေကြို ကတောင် သူ့ထက် ပိုပြီး စိတ်လှုပ်ရှားစရာ ကောင်းသွားမဲ့ အခြေပေါ့။

ဒါကြောင့် ကိုယ်ချစ်သော မိန်းကလေးများ ရေ
အတိုချုပ် ရရင်တော့ ……
သမီးရီးစား အဖြစ် မကူးခင် သူငယ်ချင်းဘဝ နဲ့ ခပ်ကြာကြာ နေကြည့်ပါ။
သူငယ်ချင်းဘဝ မှာလဲနှစ်ဦးနှစ်ဖက် လွတ်လပ်နေပါစေ။
သူလဲ ကိုယ့်အပြင် တစ်ခြား သူ ကို လေ့လာရင်လဲ လေ့လာဖို့ အခွင့်ပေးလိုက်ပါ။
ကိုယ်ကလဲ တစ်ခြားသူ ကို လေ့လာနိုင်ဖို့ အခွင့်ယူပါ။
ဘဝ မှာ တစ်ယောက်ထဲဆီကို မြန်မြန်ကြီး လောင်းကြေး မထပ်လိုက်ပါနဲ့။
လွန်ပြီးချိန် ပြန်ပြင်ဖို့အကြောင်းက အလွန်ခက်ပြီး ကိုယ့်အတွက် ပိုပြီး နစ်နာပါတယ်။

အခု နားဦးတည့်လိုက်တဲ့ သီချင်းထဲက အဆိုကျော်ကြီး များ အော်ပြီး သတိပေးနေကြသလို ဒသဘီလူး လို့ ခေါ်ချင်လဲ ခေါ်ပါစေ။
တစ်ချိန် အိမ်ထောင်ပြုမယ် မှန်းရင် ရီးစားမဟုတ် တဲ့ အနီးကပ် သူငယ်ချင်းများများထားပြီး ဘဝ ဖော်ကို ရှာကြည့်ကြပါ။
ရီးစား ဖြစ်ဖို့သာ ခက်မှာပါ။ ( ပြောသာပြောရ ဒီ ခေတ်က တော့ အားလုံး လွယ်နေပါပြီ)

သူငယ်ချင်း ကတော့ အလွယ်ဖြစ်နိုင်ကြတာဘဲ။  လေ့လာစဉ် ကာလထဲ ကိုယ့် အရည်အချင်းကို ကိုယ် မြင့်သည်ထက် မြင့်အောင်၊ ရေရှည်မှာ တစ်ပါးသူက ကိုယ့်ကိုပျင်းမသွားနိုင်အောင် ကြိုးစားကြပါ။
. နောက်မှလဲ အမေပေးစားတာ ကို ကောက်ယူချင်လဲယူ ပေါ့။
ဒါမှမဟုတ် ဘာကိုမှ စိတ်တိုင်းမကျလဲ အပျိုကြီးဘွက ပိုပြီး နေပျော်ပါလိမ့်မယ်။ ကလေးမွေးနှုန်းကျတာ အပျိုကြီး တွေများလို့ ဆိုပြီး စွပ်စွဲချင်လဲ စွဲပါစေ။ ကိုယ်မွေးတာ ကို သူတို့ လာထိန်းပေး ပြီး ကျွေးမွေးမှာ မဟုတ်။ ကွကိုယ် ဘဲ လုပ်ရမှာ။
(အစိုးရကောင်း ဖြစ်လို့ စီမံတတ်ရင် ဒီလို သူများ လွတ်လပ်ခွင့် ကို ထိပါး စရာမရှိ –  စကားချပ်)

ဤတွင် မဟာတစ် ၏ လက်ချာ ပြီးပါပြီ။
မဟာကွန်ဆားဗေးတစ် မှန်း ပီသစေရန်တော့ အချက်တစ်ချက် ထည့်လိုက်ပါသည်။
“အပေါင်းအသင်း ကာလ အတွင်း ကိုယ့်ကို ဘယ်သူမှ မထိစေပါနဲ့။”

+++++++++++++++++++++++++++++++++
. ဇော်ဝင်းထွဋ်  နှင့် အဖွဲ့ – မယ်သီတာခိုးတာဘယ်သူလဲ

စာအုပ်ထဲမှာသင်တဲ့ မယ်သီတာခိုးတာဘယ်သူလဲ
သူငယ်ချင်း ငယ်ရီးစားက ကမေးတယ်
ဒီလိုပါ မောင့်ချစ်တဲ့ ချစ်သူမေရယ်
ဒသဂီရိ ဘီလူး ဘီလူးတဲ့ကွယ်။

ရီးစားများများ ထားတဲ့သူကို
ဒသဂီရိ ဘီလူး နဲ့ တူသလို မျက်နှာများကြတာကို ဆိုသတဲ့
စဉ်းစဉ်းစားစား တွေးကြည့်ပါကွယ်။
ဒသမင်း နဲ့ တူမယ် မျက်နှာမများနဲ့ နော်ကွယ်။

ဒီလိုမဖြစ်ပါစေနဲ့၊ ဒီလိုမဖြစ်အောင်နေကွဲ့
သူငယ်ချင်း ငယ်ရီးစားကလေးရယ်
လိမ္မာပါ နောက်တစ်ယောက် နဲ့ မတွေ့စေချင်တယ်
သစ္စာတွေပျက် ဖျက်မသွားနဲ့ကွယ်။

+++++++++++++++++++++++++++++++++

မြစပဲရိုး

About မြစပဲရိုး

Khin Latt has written 240 post in this Website..