ဆရာ တင်နိုင်တိုး နဲ့ ကျွန်တော် နဲ့ လုံးဝ မရင်းနှီးပါဘူး။
ဒါပေမယ့် ရန်ကုန်တက္ကသိုလ် ဗဟို စာကြည့်တိုက် ကို သုံးကြသူချင်း
မျက်မှန်းတန်းမိနေကြပါတယ်။
ဆရာက အင်္ဂါ နေ့တိုင်း စာကြည့်တိုက်ကို လာတတ်ပါတယ်။
စာကြည့်တိုက်မှာက သတင်းဂျာနယ်တွေက
သတင်းထောက် ကောင်လေးတွေ ကောင်မလေးတွေ
သတင်းစာအဟောင်းတွေထဲက သူတို့လိုချင်တာတွေကို
လာ ရှာတတ်ကြတာကို ကျွန်တော် သိထားပါတယ်။

ဆရာ့ ကိုလည်း ဂျာနယ်တစ်ခုခုက အယ်ဒီတာ တစ်ယောက်ယောက်လို့ပဲ

ကျွန်တော်က ထင်ထားမိခဲ့ပါတယ်။
တစ်ရက်တော့ ကျွန်တော်က ရောက်အသွား
ဆရာက ရောက်နှင့်နေသူမို့ မျက်လုံးလှန်ကြည့်ပြီး
ပြုံးပြပါတယ်။
ကျွန်တော်ကလည်း ပြန်ပြုံးပြပြီး
“ဆရာ ဘယ်ဂျာနယ်ကလဲ ခင်ဗျ “
လို့ စပ်စုလိုက်မိပါတယ်။
ဆရာက
“ကျွန်တော် တင်နိုင်တိုး ပါ” တဲ့။
ဝိုး…ဆရာ့ ရဲ့ သမိုင်း ဆောင်းပါးတွေ အကြိုက်တွေ့ သူမို့
ဝမ်းသာ သွားမိပါတယ်။
ဆရာက ကျွန်တော့်ကို ပြန်မေးပါတယ်။
“ဆရာက ရော ဘာတွေလာရှာနေတာလဲ” တဲ့။
“မကြာမကြာ တွေ့မိတယ်နော်” တဲ့။
ကျွန်တော် က
“စာနယ်ဇင်း သမားတော့ မဟုတ်ပါဘူး။
အွန်လိုင်းပေါ်က မန္တလေး ဂဇက် ဆိုတဲ့ ၀က်ဆိုက်မှာ
စာတိုပေစ တွေ အပျော်တမ်း ရေးနေသူ ပါ” လို့ ပြန်ပြောပါတယ်။
အဲဒီနေ့ကစ ကျွန်တော်တို့ တွေ့ရင် ပြုံးပြ နှုတ်ဆက် အလာပ သလာပ
စကားတချို့ပြောကြတဲ့ အဆင့်ကို ရောက်ပါတယ်။
ကျွန်တော့် ဖုန်းနံပတ်လည်း ပေး ဆရာဖုန်းနံပတ်လည်း ယူ ပေါ့ဗျာ။
တစ်နေ့မှာ ကျွန်တော်က
“ဆရာ့ ရဲ့ ဂျာနယ်မှာ ဖေါ်ပြပြီးသား သမိုင်းဆောင်းပါး တစ်ပုဒ်လောက်
မန္တလေး ဂဇက် မှာ ဖေါ်ပြချင်ပါတယ်။ ခွင့်ပြုလို့ ရမလား ဆရာ”
လို့ ခွင့်တောင်းကြည့်ပါတယ်။
ဆရာက
“ဟာ အဟောင်းကြီးတော့ မလုပ်ပါနဲ့ဗျာ။
ကျွန်တော် အသစ်တစ်ပုဒ် ရေးပေးပါ့မယ်။
စာမူခ ပေးစရာ မလိုပါဘူး။
နောက်တစ်ပတ် အင်္ဂါ နေ့ ယူပေါ့”
လို့ ပြန်ပြောပါတယ်။
ဖြစ်ချင်တော့ အဲဒီ အင်္ဂါ နေ့က ခရီးတစ်ခုထွက်နေလို့
စာကြည့်တိုက် မရောက်ဖြစ်လိုက်ပါ။
နောက် ပိုင်းလည်း စာကြည့်တိုက်ကို ရောက်ပေမယ့်
ဆရာ နဲ့ မဆုံဖြစ်ကြတော့ပါ။
ဆရာ ကွယ်လွန်သည် အထိပါပဲ။
မန္တလေး ဂဇက် ၀က်ဆိုက်အတွက် ဆရာတင်နိုင်တိုးက
စာမူတစ်ပုဒ် မေတ္တာဖြင့် ရေးထုတ်ပေးခဲ့တယ် ဆိုတဲ့
သမိုင်းကို ကျွန်တော် မရေးနိုင်ခဲ့တော့ပါ။
ဘယ်လောက် နှမြောစရာ ကောင်းလိုက်ပါသလဲ။
အခု ဆရာကွယ်လွန်ခြင်း တစ်နှစ် ပြည့်တော့မည်ဆိုလား။
ဆရာတင်နိုင်တိုး ကောင်းရာ သုဂတိ မှာ ပျော်ရွှင် နိုင်ပါစေဗျာ။

အဲဒီ မတိုင်မီက ဆရာကြီး ဦးအောင်သင်း နဲ့ ဇာတ်လမ်းလေးလည်း တစ်ခါတည်း

ဆက်လိုက်ပါရစေဦး။

မန်းဂဇက် စာပေဆုရ စာမူတွေ အတွက် ဂုဏ်ပြုသည့်အနေဖြင့်

ဆရာကြီးဦးအောင်သင်း ၏ မှတ်ချက် ရနိုင်လျှင် ပို ခန့်ညားမည်ဟု ကျွန်တော် တွေးမိပါသည်။

ဟိုတုန်းက သဘင်မဂ္ဂဇင်းမှာ ဆရာကြီးရေးခဲ့ဖူးသည့် ဒီလ အကြိုက်ဆုံး ၀တ္ထုတို ပုံစံမျိုးလေး လို့လည်း

စိတ်ကူးယဉ်မိတာလည်း ပါပါ၏။

ထို့ကြောင့် ဆရာကြီး နေထိုင်ရာ ဓမ္မိက၀တီလမ်း အိမ်သို့ ကျွန်တော် ရောက်အောင်သွားခဲ့ပါသည်။

ဆရာကြီးက အိပ်ရာ ထက်မှာ စောင်ခြုံလေး နှင့် ပက်လက်ကလေး။

ရှည်ရှည်ဝေးဝေးတွေ ပြောနေစရာ မလိုပဲ ဆရာကြီးက စာမူတွေကို ဖတ်ပေးမယ်

အချိန် ၂ ပတ်ခန့်ပေးဟု ဆိုပါသည်။

ထို့အတွက် ဆရာကြီးလက်ထဲ ကြိုတင် ပြင်ဆင်လာခဲ့သည့် ဆုရ စာမူတွေကို ဖိုင်တွဲဖြင့် ပေးအပ်ခဲ့ပါသည်။

ချိန်းသည့်နေ့တွင် ဆရာကြီးထံမှ စာမူ ကို လက်ခံရရှိခဲ့ပါသည်။

စာမူခ ဘယ်လောက်ကန်တော့ရမလဲ ခင်ဗျ 

ဆိုသည့် ကျွန်တော့် အမေးကို ဆရာကြီးက

တစ်ပြားမှ ကန်တော့စရာ မလိုဘူး၊

မျိုးဆက်သစ် လူငယ်တွေ အားတက်သွားဖို့ အဓိကပဲ

ဟု ဆိုပါသည်။

ထို့ကြောင့် ကျွန်တော်မှ ကျပ် သုံးသောင်း ကို စာအိတ်ထဲထည့်ပြီး ထိုင်ကန်တော့ ခဲ့လိုက်ပါသည်။

အဆိုပါ ဆရာကြီး၏ မှတ်ချက်ကို ကျွန်တော် ရွာထဲမှာ တင်ပေးခဲ့ပြီး ဖြစ်ပါသည်။

ကျွန်တော် တို့ သူကြီးက ဆရာကြီး ဆီက စာမူ အတောင်းခိုင်းသဖြင့်

တောင်းရပြန်ပါသည်။

ဆရာကြီးက ရေးပေးမယ်။

စာမူခ တစ်ပြားမှ ပေးစရာမလိုဘူး ဟု ပြန်ပြောပါသည်။

စာမူယူရန် ချိန်းသည့်နေ့တွင် ဆရာကြီးအိမ်သို့ ကျွန်တော် ရောက်သွားရာ

ဆရာကြီးအတော် နေမကောင်း ဖြစ်နေသဖြင့် စာမူမပြီးသေးကြောင်း သိရပါသည်။

ဆရာကြီး ကွယ်လွန်သွားသည် အထိ မန်းဂဇက် သတင်းစာအတွက် စာမူ ကို မရရှိခဲ့တော့ပါ။

နောက်တစ်ခါ စာရေးဆရာ များထံမှ ကျွန်တော် စာမူ မတောင်းရဲတော့ပါဘူးခင်ဗျာ…။

ချစ်ခင်လေးစားတဲ့

ဘလက်ချော…။

 

 

black chaw

About black chaw

black chaw has written 320 post in this Website..