ပဒုမ္မာရဲ့ ဆွေမျိုးတော်ခွင့် ရရပါလို၏ဆိုတဲ့ပိုစ့်ကို ဖတ်ပြီး အတွေးပေါ်လာလို့။

ပဏ္ဍိတာရာမဆရာတော်ကြီးက သူ့ကျောင်းကို ရောက်လာတဲ့ ဘယ်သူကိုမဆို တရားအားထုတ်ဖို့ အမြဲတမ်း တိုက်တွန်းနှိုးဆော်လေ့ရှိပါတယ်။

အလှူဒါနနဲ့တင် အားရကျေနပ်မနေပဲ သံသရာက လွတ်မြောက်ရေးအတွက် လူ့ဘ၀ကိုရတုန်း၊ သာသာနာနဲ့တွေ့တုန်း ရခဲလှတဲ့ အခြေအနေတွေကို တန်ဖိုးထားတတ်အောင် ပြောဆိုဆုံးမလေ့ရှိပြီး သွေးသားဆွေမျိုးထက် ဓမ္မဆွေမျိုးတော်ချင်တယ်လို့ ပြောကြားလေ့ရှိပါတယ်။

 

ဆရာတော်က ဒကာ ဒကာမတွေကို လောကုတ္တရာအကျိုးရစေချင်တဲ့ ဆန္ဒအလွန်ကြီးမားပါတယ်။

အဲဒီရည်ရွယ်ချက်နဲ့ပဲ တရားအားထုတ်ပြီး ဓမ္မဆွေမျိုးတော်ချင်တယ်ဆိုတာကို ပြောခြင်းဖြစ်ပါတယ်။

 
ဓမ္မဆွေမျိုးတော်တာနဲ့ ပတ်သက်ပြီး သဂျီးက

  လယ်ဗယ်တူအလွှာထဲက…သူကိုအလိုလိုသိနားလည်သွားတယ်…. လို့ထင်မိတယ်..။

လို့ ဆိုပါတယ်။

အဲဒါကို မလတ်က ………..

ဘယ်လို အယူအဆ ဘယ်လို အမူအကျင့် ဖြစ်စေ ကိုယ်နဲ့ ပေါင်းသင်း ဆက်ဆံ ရမှတော့ ကိုယ့် ဆွေမျိုး ကြီးပါဘဲ

တဲ့။
 

ကမ္ဘာဆိုတဲ့ ရွာကြီးထဲမှာ လူသားအချင်းချင်း ဆွေမျိုးတွေလို သဘောထားကြီးကြီးထားနိုင်စေချင်တဲ့ မလတ်ရဲ့ သဘောထားကို ထောက်ခံပါတယ်။
 

သဂျီးပြောသလို လယ်ဗယ်တူအလွှာထဲက…သူကိုအလိုလိုသိနားလည်သွားတယ်ဆိုတာနဲ့ပတ်သက်ပြီး ကိုယ်သိသလောက်ပြောရရင် ……..

 

၁။ ကောသလမင်းကြီးက  အသက်အရွယ်တူ၊ မျိုးရိုးဂုဏ်ရည်တူ စသဖြင့် တူတာတွေများလို့  မြတ်စွာဘုရားကို ကြည်ညိုလေးစားတာထက်ကို အလွန်ခင်မင်နှစ်သက်တယ်လို့ ကြားနာဖူးပါတယ်။

 

၂။ အခုသင်တန်းတစ်ခုတက်နေတာမှာလည်း လာသင်ပေးတဲ့ ဆရာတွေအလှည့်ဆိုရင် ကမကထပြု ကြတဲ့ အဖွဲ့သားတွေက လက်ဖက်ရည်ဆိုင်ခေါ်သွားပြီး ရင်းရင်းနှီးနှီး လွတ်လွတ်လပ်လပ် ပြောဆိုကျွေးမွေးပြုစု ကြတယ်။

ဆရာမဆိုရင်တော့ အမျိုးသမီးဖြစ်လို့ လက်ဖက်ရည်ဆိုင်ခေါ်သွားလို့မကောင်းတော့ မုန့်နဲ့လက်ဖက်ရည်ကို ယူလာပြီးကျွေးမွေးရတယ်။
ဆရာမကို ရိုရိုသေသေဆက်ဆံကြပေမယ့် ဆရာတွေနဲ့လိုတော့ ရင်းရင်းနှီးနှီး မဆက်ဆံနိုင်ကြဘူး။

 

၃။ အဖေမဆုံးခင်က ဇာတိမြို့ကို အလည်ပြန်တော့ သူနဲ့ရွယ်တူတွေ မရှိသလောက်ဖြစ်ပြီး စကားပြောဖော်မရှိလို့ စိတ်မကောင်းဖြစ်သွားတာ သတိရမိတယ်။
ကြီးပြင်းလာတဲ့ခေတ်ကာလအခြေအနေတူသူတွေအချင်းချင်းမှ သဂျီးပြောသလို သူ့အလိုလိုသိနားလည်သွားတတ်ကြတာကိုး။

 

သွားလာနေထိုင်လုပ်ကိုင်ကြတဲ့အခါမှာ ပညာတူတာ၊ အသက်အရွယ်တူတာ၊ ကျား/မ တူတာ၊ လူမျိုးဘာသာတူတာ၊ အရပ်ဒေသတူတာတွေကြောင့် အတွေးအမြင်ချင်းနီးကပ်စေပြီး ခင်မင်ရင်းနှီးလွတ်လပ်မှုကို အလွယ်တကူ ပေးနိုင်တယ်လို့ ထင်မိတယ်။

 

လွန်ခဲ့တဲ့ အနှစ် ၂၀- ၃၀ တုန်းက ကမ္ဘာလောကကြီး သာယာလှပဖို့အတွက် ငြိမ်းချမ်းစွာအတူယှဉ်တွဲနေထိုင်ရေးမူ ကို ကမ္ဘာ့နိုင်ငံတွေအချင်းချင်းဆက်ဆံရေးမှာ ကျင့်သုံးဖို့ တိုက်တွန်းထားတာကို ဖတ်ပြီး သဘောကျခဲ့ဖူးတယ်။

 

ဒါပေမယ့် အခုလက်ရှိအချိန်မှာတော့ ဘာသာရေး၊ လူမျိုးရေး၊ နိုင်ငံရေးတွေမှာ အကြမ်းဖက်မှုတွေ သွေးသံတရဲရဲတွေ မြင်နေ ကြားနေ တွေ့နေရတာ စိတ်မချမ်းသာစရာပါ။
 

နောက်ဆုံးတော့လည်း လူဟာ လူပါပဲ။

လောဘ၊ ဒေါသ၊ မောဟ ဆိုတာ လူတွေရဲ့ အဆင်တန်ဆာပဲ လို့တောင် တွေးမိပါတယ်။ :p:
 

ဆွေမျိုးတော်ခွင့် ရရပါလို၏ ပိုစ့်မှာ မလတ်ရဲ့

ပညာမှာ ဘွဲ့ တွေ ထပ်နေ သူချင်း ရဲ့ အတွေးအခေါ် ကရော လယ်ဗယ်တူ ရာ ဖြစ်တာလား

ဆိုတဲ့ မေးခွန်းအတွက်

ပါမောက္ခချုပ်ဆရာတော်ကြီးရဲ့ လူ့အဆင့်အတန်းကို ကိုယ်ကျင့်သီလနဲ့ တိုင်းတယ်လို့ ဆိုတဲ့ အဖြေပေးချင်ပါတယ်။

 
တရားတကယ်ကျင့်မကျင့်၊ ရှိမရှိဆိုတာအတွက်ကတော့ ပဒုမ္မာရဲ့ အဖြေကို ကျေနပ်လိမ့်မယ် ထင်ပါတယ်။
 

လောကကြီးမှာ ကိုယ့်ပတ်ဝန်းကျင် ကိုယ်တဲ့တွေ့ထိဆက်ဆံနေရသူ အားလုံးကို တစ်တန်းထဲထားပြီး ဆက်ဆံနိုင်ကြပြီး လောကကြီးတစ်ခုလုံး မေတ္တာလွှမ်းခြုံပြီး ငြိမ်းချမ်းသာယာစေချင်ပါတယ်။ :)

 

Ma Ma

About Ma Ma

Ma Ma has written 143 post in this Website..

ဗေဒင်ဆရာ မမေးပဲ နာမည်ပေးလိုက်မယ်။ သိပ္ပံမောင်ဝရဲ့ ခေတ်ဆန်းစာပေကို အားကျပြီး ရေးမိရေးရာ ရေးထားတဲ့ လက်စမ်းစာပေလို့။ THAKHIN CJ #8212010 ( 5/2/2016)