ကိုယ်တိုင်ကတော့ ဗုဒ္ဓသာသာဝင်ပီပီ ဘယ်နေရာမဆို စိတ်ထားတတ်ရင် ကုသိုလ်ဖြစ်တယ်လို့ နှလုံးသွင်းထားခဲ့ပါတယ်။
ကောင်းတဲ့စိတ်စေတနာနဲ့ လုပ်ရင် ဘယ်ဘာသာဝင်မဆို၊
ဘယ်လူမျိုးမဆို ကောင်းသောအကျိုးကို ခံစားရမှာပဲဆိုတဲ့ အသိရှိခဲ့ပါတယ်။
ဒါပေမယ့် ကိုယ့်ရဲ့အမှန်တကယ် လက်တွေ့လိုက်နာမှုနဲ့ ယှဉ်ထိုးကြည့်မိခဲ့ရတဲ့ အဖြစ်အပျက်လေး၂ခု မျှဝေပေးချင်ပါတယ်။
ပထမဇာတ်လမ်းတစ်ပုဒ်က……..
ကျမတို့ဖွင့်ထားတဲ့ Motel မှာ လှေကား၊ စင်္ကြန်လမ်းနဲ့ အခန်းတွင်းမှာ သစ်သားတွေကိုအသုံးပြုထားပါတယ်။
လာသမျှဧည့်သည်တိုင်း Motel အတွင်းမှာ ဖိနပ်စီးကြပါတယ်။
ကျမတို့ဆီကို ဂျာမန်လူမျိုးဧည့်သည်တွေ လာတည်းပါတယ်။
လှေကားမှာ သစ်သားခင်းထားတာမြင်တော့ စီးလာတဲ့ဖိနပ်ကို ချွတ်၊ လက်နဲ့ကိုင်ပြီး အပေါ်ထပ်ကိုတက်ပါတယ်။
ကိုယ့်ဆီလာတည်းတဲ့ ဧည့်သည်တွေ ဖိနပ်ချွတ်ရတာ အဆင်မပြေမှာစိုးလို့ ကျမတို့အနေနဲ့ ဖိနပ်စီးခွင့်ပြုထားပါတယ်လို့ ပြောပေမယ့် ……..
အဲဒီဂျာမန်ဧည့်သည်က ကျမတို့ဆီမှာ တည်းသမျှကာလပတ်လုံး သူ့ထုံးစံအတိုင်း ဖိနပ်ကို အမြဲချွတ်ပါတယ်။
ပိုပြီးထူးခြားစေတာက နောက်ထပ်ဂျာမန်ဧည့်သည်ထပ်ရောက်လာတော့လည်း ပထမဂျာမန်ဧည့်သည်လိုပဲ ဖိနပ်ချွတ်တာတွေ့ရတော့………..
စကားကြုံတဲ့အခါတိုင်း ဂျာမန်တွေ သိပ်ယဉ်ကျေးတာပဲလို့ ပြောမိတဲ့အပြင်………..
ကျမရဲ့စိတ်ထဲမှာ တစ်သက်လုံးစွဲနေခဲ့တဲ့ နာဇီဂျာမဏီဆိုပြီး ခက်ထန်ကြမ်းတမ်းလိမ့်မယ်လို့ ထင်နေခဲ့တဲ့ ပုံရိပ်ကို ချေဖျက်နိုင်ခဲ့ပါတော့တယ်။
နိုင်ငံသားတစ်ယောက်ရဲ့ အပြုအမူအပြောအဆိုဟာ ကမ္ဘာ့အလယ်မှာ ကိုယ့်နိုင်ငံကို ဂုဏ်တက်စေ၊ ဂုဏ်ပျက်စေနိုင်တယ်ဆိုတဲ့ အသိတရားကိုလည်း ရစေခဲ့တယ်။
နောက်ထပ်ကြုံရတဲ့အဖြစ်အပျက်ကတော့………
ကျမတို့ Motel မှာ ဖွင့်ထားတဲ့ စတိုးဆိုင်မှာ ဂျပန်လူမျိုးတစ်ယောက် အထည်လာဝယ်ပါတယ်။
ပထမဆုံးတွေ့တဲ့အထည်ကို ယူမယ် ခေါက်ပေးပါဆိုလို့ ခေါက်ပေးပြီးကာမှ…….
ဆိုင်ထဲထပ်ဝင်တော့ ထပ်မြင်တဲ့အထည်ကို ကြိုက်သွားပြန်ပါတယ်။
အဲဒါနဲ့ ဒီအထည်ကို ခေါက်ပေးပါဆိုတော့ ကိုယ့်စိတ်ထဲ ၂ထည် ၀ယ်မယ်လို့ ထင်မိသွားပြီး ထပ်ခေါက်ပေးလိုက်ပါတယ်။
နောက်ထပ်အထည်တွေ့တော့ ဘယ်ဟာယူရမှန်းမသိဖြစ်ပြီး နောက်ဆုံးတစ်ထည်ကို ခေါက်ပေးပါ။
အဲဒီအထည်ကိုပဲ ယူတော့မယ်။
ရှေ့က၂ထည်ကို မယူဖြစ်တော့ဘူး။
တောင်းပန်ပါတယ်လို့ ခြေဟန်လက်ဟန်နဲ့ ပြောတယ်။
ကိုယ်ကလည်း ဈေးသည်ဆိုတော့ စိတ်ရှည်ရတာပေ့ါ။
စိတ်ထဲက အောင့်သက်သက်နဲ့ပဲ ရပါတယ်လို့ ပြောမိပါတယ်။
အဲဒီဂျပန်လူမျိုး ဈေးဝယ်ဟာ သူဝယ်တဲ့အထည်ကို ပြောတဲ့အတိုင်း ဈေးမဆစ်ပဲ ငွေချေပြီး ထွက်သွားပါတယ်။။
စစ်လိုက်တဲ့အခါ သူပေးချေသွားတဲ့ငွေက ၁၀၀၀ကျပ် ပိုနေတာနဲ့ လှမ်းခေါ်ပြီး ပြန်လိုက်ပေးတော့………..
သူက အထည်တွေကို တစ်ထည်ပြီး တစ်ထည် ယူမယ်ဆိုပြီး အလုပ်ရှုပ်ပေးမိတဲ့အတွက် အပိုပေးတာလို့ ဆိုပါတယ်။
ကိစ္စမရှိဘူး အပိုပေးဖို့ မလိုပါဘူးလို့ ပြောတာကို ယူပါဆိုပြီး အတင်းပေးပြီး ထွက်သွားတယ်။
ဒီလို ဈေးဝယ်မျိုးတစ်ခါမှ မတွေ့ဖူးလို့ စိတ်ထဲမှာ ထူးဆန်းနေမိတယ်။
နိုင်ငံကြီးသားစိတ်ဓာတ်လို့ ပြောရမလား၊ လူသားဆန်တဲ့ စိတ်ဓာတ်လို့ ပြောရမလား၊
ကြီးကျယ်မြင့်မြတ်တဲ့စိတ်ထားလို့ ပြောရမလား ဆိုတဲ့ အတွေးတွေနဲ့အတူ…….
ကိုယ်တိုင် မထားတတ်ခဲ့တဲ့၊
ကိုယ်တိုင် မထားဖူးခဲ့တဲ့၊
ကိုယ်တိုင် မထားနိုင်ခဲ့တဲ့ ………….. စိတ်ထားလှလှလေးတွေ ထားတတ်လိုက်ကြတာလို့ ချီးကျူးမိပါတော့တယ်။
Ma Ma

About Ma Ma

Ma Ma has written 143 post in this Website..

ဗေဒင်ဆရာ မမေးပဲ နာမည်ပေးလိုက်မယ်။ သိပ္ပံမောင်ဝရဲ့ ခေတ်ဆန်းစာပေကို အားကျပြီး ရေးမိရေးရာ ရေးထားတဲ့ လက်စမ်းစာပေလို့။ THAKHIN CJ #8212010 ( 5/2/2016)