မြ တစ်ယောက် ရောဂါ တစ်ခု ထ နေသည် ဟု ဆိုရမည်။
ချစ်သော တူမတော် ဇီကလေး လို ရှားလော့ဟုမ်း စင်ဒရုမ်း နဲ့ ဆင်တူသော စတော့ဟုမ်း စင်ဒရုမ်း ဖြစ်နိုင်သည် မှန်း၏။
ကိုယ့်ကိုဓားစားခံလုပ်ကာ ပြန်ပေးဆွဲ ဒုက္ခပေးသူကို သွားပြီး သနားကြင်နာ စာနာ ထောက်ထား မိသော စိတ်ဖြစ်သည်။

ထို အကြောင်းကို အစွဲပြုပြီး ရိုက်ထားသော ရုပ်ရှင်ကား များလဲ ရှေးပဝေသဏီ မှစလို့ ဒီနေ့ခေတ်ထိပင် မရိုးနိုင်အောင် ရိုက်ကြသည်။
ထိုရုပ်ရှင်များ တွင် မင်းသားများ သည် ပြန်ပေးဆွဲသမားများ ဖြစ်သည်။
သို့ရာတွင် ရုပ်ကြမ်းကြီး များ မဟုတ်။
ရုပ်ရည်ပြေပြစ်သော ပြန်ပေးသမား များ ဖြစ်သည်။
အဆုံးသတ်တွင် ပြန်ပေးဆွဲခံရသော လူများ ကို ကာကွယ်ပေးပြီး သူ၏ ကြင်နာတတ်သောစရိုက် ကို ထိုးပြသည်။
ထိုကြောင့် ထိုသူ၏ ဓားစာခံ များ မှာ သူတို့ကို ဒုက္ခပေးသူ အပေါ် သနားသော၊ ချစ်သော၊ ကျေးဇူး တင်သော စိတ်ဖြင့်ကျန်ခဲ့ရ လေတော့သည်။

မြတို့၏ ရွှေပြည်တွင်လည်း ထိုနည်းအတိုင်း ရုပ်ရှင်ကားပေါင်းများစွာရှိ၏။
အထင်ရှားဆုံးမှာ ဗိုလ်အောင်ဒင် ဖြစ်ပေသည်။
မင်းသမီး မြ တစ်ယောက် သူ့အချစ်ကြီး ကိုကိုချစ် ကို ပင် မထောက်ထားနိုင်တော့။
သူ့ကို နိုင်ထက်စီးနင်း ခေါ်ဆောင်ခဲ့သော အစ်ကိုကြီး ကိုကိုဒင် ကို အသနားကြီး သနား မိသွားသည် မဟုတ်လော။
အလကားတော့ မဟုတ်။
သူ့ကို ကြင်နာမှု၊ ညှာတာမှု၊ လုံခြုံမှုများ ပေးခဲ့၍ မေတ္တာရောင်ပြန်ဟပ်ခဲ့ခြင်း ဖြစ်သည်။

ဒီရက်ပိုင်းထဲမတော့ ထို စတော့ဟုမ်း စင်ဒရုမ်းဇာတ် ကို  မြကိုယ်တိုင် ဇာတ်ခုံပေါ်တက်က ရသလို ဖြစ်နေ၏။
မြ၏ လူဆိုးမင်းသားကြီး ခမျာ မတော့ အသက်ကြီး ရတဲ့ ကြားထဲ မင်းသားများ ကဲ့သို့ ရူပါမတင့်ရှာပေ။
အလံဖြူထောင်ပြလိုက်ခြင်း မှာလည်း မြတို့ အား အကာအကွယ် ပေးဖို့ထက် သူ့ဟာသူ အကာအကွယ် ယူ ခြင်း ကိုသာ မြင်ပါသည်။
ဘယ်နည်းနှင့်မှ ရုပ်ရှင်ထဲ ကလို စိတ်စေတနာကောင်းရှိ၍တော့ ဟုတ်ဟန် မရှိ။
ထို့ကြောင့် မြ သည် သူ့ ကို သနားစိတ် တစ်စိုးတစ်စိ မှ မရှိတာ သေချာသည်။
သို့သော် အင်မတန် တော့ ကျေးဇူးတင်ပါသည်။
အကြောင်းမှာ မြတို့ ဘဝ သည် ရုပ်ရှင်ထဲကလို ပြန်ပေးသမားတစ်ယောက်/တစ်ဖွဲ့ ထဲ မဟုတ်ချေ။
အလစ်၊ အငိုက် ကို စောင့်ကာ အမဲဖျက်သလို ဆွဲရန် စောင့်နေသော အခြားအခြား သော ပြန်ပေးသမား လူဆိုးများ အလျှို အလျှို စောင့်နေကြသည်။
နင့်နေသော စည်းစိမ်ပြုတ်မှာစိုး ၍ နည်းမျိုးစုံ ဉာဏ်နီ၊ ဉာဏ်နက် ထုတ်နေဆဲ အာဏာရူးများ အကွက်ချောင်းနေဆဲ ဆိုတာ မမြင်ကြ၊ မသိကြ လေရော့သလား။

မြတို့ သည် လက်နက်မဲ့ သည့်အပြင် ကြောက်တတ်သော ဓားစားခံ များဖြစ်ကြသည်။
မြတို့ ကို အင်အားကြီး လူစု မှ မည်သည့် အကြောင်းကြောင့် ဖြစ်စေ ပူးပေါင်းလာခြင်း ကို သွား၍ မူလကျီ လုပ်မရ။
သွားလုပ်လို့ ရမ်းခံရရင် သုညက ပြန်စရမည်။

မြတို့ လူများ ရဲ့ လက်သန်းလေးများ သည် အခြေအနေ တစ်ခု ထိသာ ပါဝါကြီး သည်။
အရေးကြုံလျှင် ထိုနေရာမှ သေနတ်ကျည်ဆံ မထွက်သည် ကို သတိပြုသင့်သည်။ ပုဒ်မ ၅၉(စ) ကို ပြင်နိုင်စွမ်းမရှိသည် ကို သတိပြုသင့်သည်။

တစ်ချို့က ပြောသည်။
မြတို့တွေသည် အမှတ်သည်းခြေမရှိ မေ့တတ်လွန်းသည် တဲ့။
အမှန်တော့ ထိုစကား ပြောသူများ ကိုယ်တိုင် “အမှတ်သည်းခြေမရှိ မေ့တတ်လွန်းသည်”ကို ထိုသူများ မသိရှာချေ။
တနည်းပြောရရင် “အောက်ခြေလွတ် ၍ သွေးနထင်ရောက်သွားခြင်း” လည်း ဖြစ်နိုင်ပေသည်။
ပန်းတိုင်မရောက်ခင် နိုင်ပြီ အမှတ် နှင့် တက်မထောင်သူများ ဟုမြင်မိသည်။
ဒီအခြေအနေ ရောက်မှ ဒင်းတို့ လက်ရှိ အာဏာပိုင် အစိုးရ ဘာမှ မလုပ်နိုင်တော့ ဟု တွေး ကာ တကယ် ဘဲ သွေးတိုးစမ်း လောင်းရဲထပ်နိုင်သည်တဲ့လား။
၂၆% နိုင်လျှင်ရပြီ ဟု ပေါ့ပေါ့တွေး ခဲ့သော ကိုယ့်ကိုယ်ကို အထင်ကြီးလွန် မင်းသားကြီး များ အဖြစ် ကို နမူနာယူကြပါ။

မြ ၏ တစ်ကိုယ် အတွေးကို မြချစ်သော ရွာသူ/သား များအား တိုးတိုးပြောပြမည်။
အကယ်၍များ
ပုဒ်မ ၅၉(စ) ကို ယာယီဖယ်ထားမည်ဟု သာ အတည်ဖြစ်ပြီး
ဒေါ်အောင်ဆန်းစုကြည် သာ သမ္မတ ဖြစ်ခွင့် ရခဲ့လျှင်
မြသည်
ထို အဘခေါင်ကြီး ကို အမှန်ပင် ကျေးဇူးတင်ရုံမက လှမ်းမျှော်၍ ရှိခိုး ဦးတင် ကန်တော့လိုက်မည် ဟု ပင် တွေးထား၏။
အကြောင်းမှာ ကိုယ် ကန်တော့ လိုက် ရတာ ဘာမှမဟုတ်။
ဒေါ်အောင်ဆန်းစုကြည် သမ္မတ ဖြစ်သွားလျှင် ရလာမည့် ကျေးဇူးသည် တိုင်းပြည်လူထု အတွက် တန်ဖိုး ဖြတ်မရ မဟုတ်ပါလား။
ဤသည်ကပင် ဒေါ်အောင်ဆန်းစုကြည် ၏ ကျေးဇူးကို တတ်နိုင်သမျှလေးဖြင့် ဆပ်ခြင်း ဖြစ်လိုက်ချင်၏။

မြ ၏ စတော့ဟုမ်း စင်ဒရုမ်း ရောဂါ ပိုသည်းလာနေပြီလားပင်မသိ။
လောလောဆယ် မတော့ ထိုရောဂါ ကို ကုစရာ ဆေး မမြင်နိုင်သေး။

သို့ပေသည့် မြ သည် ၁၁ကျပ်မကျ။
တန်ဖိုးမြင့်ပြီး အဆင့်ရှိ ရောဂါ တစ်ခု ဖြစ်၍သာ ရုပ်ရှင်များ၊ ပြဇာတ်များ၊ ဝတ္ထုများ ကို ထိုအကြောင်းနှင့် မပြတ် ဖန်တီး နေခြင်းဖြစ်ပေသည်။
နောက်ဆုံးမတော့ မြသည် ကိုယ့်ကျောကိုယ်သပ်ခါ ပြုံးပြုံးကြီး နှင့် ထို ရောဂါကိုမွေးနေလေတော့၏။

 

မြစပဲရိုး

About မြစပဲရိုး

Khin Latt has written 240 post in this Website..