သူမရဲ့ဘ၀မှာ အားအကျဆုံးက ငယ်ငယ်ရွယ်ရွယ်နဲ့ Management ပိုင်းမှာ အလုပ်လုပ်နေနိုင် ကြတဲ့သူတွေပဲ။ တခါတလေကျတော့လည်း အဲလိုရာထူး အဲလိုနေရာမျိုး သူမအခုထိ ဘာလို့ မရောက် နိုင်လဲဆိုတာ စဉ်းစားနေမိတယ်။ သူမကပဲ အရည်အချင်း မပြည့်ဝခဲ့တာလား။ ဒါမှမဟုတ် သူမလုပ်ခဲ့တဲ့ လုပ်ငန်းတွေက အဆက်အစပ်မရှိလို့လားပေါ့လေ။ သေချာတာတခုကတော့ သူမ အလွန်ညံ့နေသေးတယ် ဆိုတာပါပဲ။ ဒီနှစ် 2016 ဆိုတော့ အလုပ်လုပ်ခဲ့တာ ဘာလိုလိုနဲ့ ဆယ်နှစ်ကျော်သွားခဲ့ပြီပေ့ါလေ။

ရပ်ကွက်ထဲက ဆေးခန်းလေး တစ်ခုမှာ အချိန်ပိုင်း ၀ိုင်းကူပြီးအလုပ် လုပ်နေတဲ့အချိန်၊ အမျိုးမကင်းတဲ့ အစ်မ တစ်ယောက်က သူမရဲ့အလုပ်မှာ အလုပ်ခေါ်တယ်။ အလုပ်လာလျှောက်ပါဆိုပြီး စာလွှာပါးလိုက်တော့ ၀မ်းသာအားရနဲ့ သွားလျှောက်ပါလေရော။ အလုပ်သာသွားလျှောက်တာ ဘာအလုပ်အတွက်ခေါ်မှန်း မသိ။ သူများတွေလိုလည်း လည်လည်ဝယ်ဝယ် မမေးတတ်။ အစ်မကတော့ ပြောပါတယ်။ ကွန်ပျူတာဆရာမအနေနဲ့ ခေါ်မယ်တဲ့။ အင်တာဗျူးခေါ်မယ့်အချိန်ကို ထိုင်စောင့်ရင်း စာသင်နေတဲ့ ကွန်ပျူတာခန်းမကြီးကို ငေးလို့။ ဟော နောက်ဆုံး အင်တာဗျူးစကြပါလေရော။ အဲဒီမှာ ပြဿနာစတက်တော့တာပါပဲ။

ဆရာ –ညည်းဘာလုပ်မှာလဲ

သူမ – အလုပ်လာလျှောက်တာလေ (အားရပါးရကိုဖြေချလိုက်တာ)

ဆရာ – ငါမေးတာ ညည်းဘာလုပ်မှာလဲလို့ မေးနေတာလေ။ (အသံက စိတ်မရှည်တဲ့အသံ)

သူမ – အစ်မက အလုပ်ခေါ်တယ်ဆိုလို့ လာလျှောက်တာပါ။ (အသံကပျော့သွားပြီး မျက်လုံးလေး ကလည်ကလည်ဖြင့်)

ဆရာ – အစ်မက ဘယ်လိုပြောတုန်း ညည်းကို (မျက်မှောင်ကြီး ကြုံ့ပြီး)

သူမ – အလုပ်ခေါ်တယ်ပြောလို့ (ဒီတခါတော့ မျက်ရည်ဝဲချင်ချင်ရယ်)

ဆရာ – ဒီမှာ ဘာလုပ်ရမယ်လို့ ပြောတုန်း

သူမ – ကွန်ပျူတာဆရာမလုပ်ရမယ်လို့ ပြောတာပဲ (အသံကသိပ်မထွက်ချင်တော့ဘူး)

ဆရာ – ဒီမှာ ဘာအလုပ်တွေခေါ်တယ်ဆိုတာကော ညည်းသိလား

သူမ – ဟင့်အင်း မသိဘူးဆရာ။

ဆရာ – သွား! အောက်ထပ်မှာ ဘာအလုပ်တွေခေါ်လဲဆိုရှာဖတ်လာခဲ့။ တွေ့မှ ပြန်တက်လာခဲ့။ (ခေါင်းကြီးကုတ်လို့)

သူမ – ဟုတ်ကဲ့။ ဟုတ်ကဲ့။

အောက်ထပ်ရောက်တော့ အစ်မက အနားကပ်လာပြီး အဆင်ပြေလားမေးတာတောင် မဖြေနိုင်။ အလုပ်ခေါ်ထားတဲ့စာရွက်တွေကို အသဲအသန်မျက်စိကစားပြီး ရှာနေရတာပေ့ါ။ လတ်စသတ်တော့ အလုပ်ခေါ်စာက သူမ အင်တာဗျူးဖြေဖို့စောင့်နေတုန်း ထိုင်တဲ့နေရာ သူမရဲ့ကျောမှီတဲ့နံရံဘက်မှာ ကပ်ထားတာကိုး။ ဘာအလုပ်တွေခေါ်လဲဆိုတာ အရင်ကြည့်ပြီးတော့မှ အစ်မကို စကားပြန်ပြောနိုင်တော့တယ်။ အစ်မကတော့ တုံးလိုက်တာလို့ မှတ်ချက်ချပါလေရော။

အဲဒီလိုနဲ့ အင်တာဗျူးခန်းထဲကို နောက်တခါပြန်ဝင်တော့

ဆရာ – ညည်းတွေ့ခဲ့ပြီလား။

သူမ – ဟုတ်ကဲ့ဆရာ။

ဆရာ- ဘာအလုပ်တွေခေါ်လဲ။

(အမှန်ဆို သူမေးတာမစောင့်ဘဲ သူမကအရင်ဖြေသင့်တာနော်)

သူမ- Reception နဲ့ ကွန်ပျူတာဆရာမ

ဆရာ- အဲဒီတော့ ညည်းဘာလုပ်မှာလဲ။

သူမ- မသိဘူးဆရာ။

ဆရာ – မဌေးကတော့ ဘယ်လိုကလေးကို ခေါ်လာလဲမသိဘူး။ ငါပြောတာက Reception ဆိုရင် သင်တန်းလာစုံစမ်းတဲ့သူတွေကို သင်တန်းနဲ့ ပတ်သက်သမျှရှင်းပြရမယ်။ ဖုန်းဆက်မေးရင်လည်း ဖြေနိုင်ရမယ်။ ကွန်ပျူတာဆရာမဆိုရင် ကွန်ပျူတာသင်ပေးရမယ်။ အဲဒီတော့ ညည်းဘာလုပ်ချင်လဲလို့မေးတာ။ သိပြီလား။

သူမ- (စိတ်ထဲမှ —- ဟွန်း စောစောထဲကအဲလိုရှင်းပြရင်ပြီးနေတာပဲကို။ reception ဆိုရင် သူမပုံစံနဲ့မဖြစ်၊ စကားကို လိပ်ပတ်လည်အောင်မပြောတတ်။ ကွန်ပျူတာဆရာမဆိုရင်တော့ မဆိုးဘူး။ ပညာလည်းရမယ်။) ကွန်ပျူတာဆရာမပဲလုပ်မယ်။

ဆရာ- အလုပ်ချိန်တွေကကော ဘယ်အချိန်လုပ်မလဲ။

သူမ- မသိဘူးဆရာ။

ဆရာ- ညည်းကတော့လေ။ ဒီမှာ နှစ်ချိန်ရှိတယ်။ မနက်ပိုင်းနဲ့ နေ့လည်ပိုင်း။ မနက်ပိုင်းဆင်းမယ်ဆိုရင် မနက် ခုနစ်နာရီကနေ ညနေသုံးနာရီအထိ။ နေ့လည်ပိုင်းဆင်းမယ်ဆိုရင် တစ်နာရီကနေ ရှစ်နာရီအထိ ရှိတယ်။ သောကြာတစ်ရက်ပိတ်တယ်။ (ဒီတခါတော့ ဆရာက အထာနပ်သွားပြီ)

သူမ- ဟုတ်။ အဲဒါဆို နေ့လည်ပိုင်းလုပ်မယ်ဆရာ။

ဆရာ- လစာကကော ဘယ်လောက်မှန်းထားသလဲ။

သူမ- အဲဒါလည်း မသိဘူးဆရာ။ ဆရာ အဆင်ပြေသလောက်သာပေးပါ။

ဆရာ – အဲဒါဆို ကိုးထောင်ကစပေးမယ်။ နောက်ကျရင်ထပ်တိုးပေးမယ်။ အလုပ်လုပ်မယ်ဆိုရင် မနက်ဖြန်ကစဆင်း။

ဒီလိုနဲ့ သူမရဲ့ ပထမဆုံး အင်တာဗျူးအောင်မြင်စွာပြီးဆုံးခဲ့ပါပြီ။ အဲဒီတုန်းက သူမရဲ့ အရည်အချင်းနဲ့သာဆို အလုပ်တောင်ရမယ့်ပုံမပေါ်။ ကွန်ပျူတာလည်း သင်ထားဖူးတာသာရှိပြီး မသုံးတတ်သေးသဖြင့် အစ်မက ပြောပေးထားလို့သာ အလုပ်ရသွားသည်ဟု ထင်မိပါကြောင်း။

(မနေ့က သဂျီးတင်တဲ့ပို့စ်ထဲက အကြောင်းအရာတခုတွေ့လို့ စာရေးဖို့ စိတ်ကူးရသွားလို့ တကယ်တန်း ရေးချင်တာက အဖေနဲ့ သူမအကြောင်း)

Tawwin Pan

About Tawwin Pan

Tawwin Pan has written 12 post in this Website..

တချိန်တုန်းက ကိုယ်မှန်တယ်ထင်လို့ လုပ်ခဲ့တာဖြစ်ပြီး အချိန်ကျော်လွန်သွားတဲ့အခါမှာတော့ နောင်တရနေတတ်တဲသူ တစ်ယောက်