ကျွန်တော့် အဖေ က အခြားအဆင့် စစ်သားကြီး တစ်ယောက်ပါ။
ကျွန်တော်တို့ မောင်နှမ တွေ ကလည်း အဖေ တာဝန်ကျရာ တပ်တွေလိုက်ပြောင်းပြီး
နေခဲ့ရသူတွေပါ။
ကျွန်တော့်ကို ပုသိမ် ကင်မလင်းကျွန်းမှာ မွေးပါသည်…။
ကျောင်းစတက်တဲ့ အချိန်အထိ ပုသိမ်မှာပဲ နေခဲ့ရပါ၏…။
သူငယ်တန်း နှစ်ဝက်လောက်မှာ အဖေ တပ်ပြောင်းရပါသည်…။
ခ.လ.ရ (၈၀) အင်းမမြို့ ကိုပါ…။
အဖေ နဲ့ အမေ က အင်းမ တပ်ကို အရင်သွားနှင့်ကြပြီး
ကျွန်တော် က အမေ့အစ်ကို အိမ်ရှိတဲ့ ကြည့်မြင်တိုင် သာဓုလမ်းထဲက
အ.မ.က ကျောင်း မှာ သူငယ်တန်း ဆက်တက်ပါသည်…။
သူငယ်တန်းအောင်တော့မှ အင်းမကို လိုက်ပြောင်းပြီး
တပ်တွင်းအ.မ.က မှာ ပထမတန်း စတက်ပါသည်…။
ကျွန်တော်တို့ မောင်နှမ ၄ ယောက်…။
ယောက်ျားလေး ၂ ယောက်…၊ မိန်းကလေး ၂ ယောက်…။
ကျွန်တော်က အငယ်ဆုံး…။
အဖေ ရယ် အမေရယ် ကျွန်တော်တို့ မောင်နှမ ၄ ယောက်ရယ်
မိသားစု ၆ ယောက်ရဲ့ စားအိုးက သေးလှတယ်တော့ မဟုတ်ပါ…။
ဒီကြားထဲ အစ်ကို နဲ့ အစ်မငယ်ကို ရန်ကုန်တက္ကသိုလ် မှာ ကျောင်းထားရတဲ့
စားရိတ်ပါပေါင်းလိုက်လျှင် အဖေ ထမ်းရသော ၀န်က လေးလံလွန်းလှပါသည်။
ဒုအရာခံဗိုလ် တစ်ယောက်ရဲ့ လစာလေး နဲ့ လောက်ငှအောင် စားရင်း
ကုန်စုံဆိုင်မှာ အငယ်ဆုံး ကျွန်တော်က မျက်နှာငယ်လေးနဲ့ အကြွေးယူရတဲ့
တာဝန်ကိုယူရပါ၏။
ဘဲဥဟင်းချက်ရင် တစ်ယောက် တစ်ခြမ်း…။
အစ်မကြီးဖြစ်သူက အနှစ် ကို ကြိုက်သည်…။
ကျွန်တော်က အကာ ကို ကြိုက်သည်…။
မောင်နှမ နှစ်ယောက် ဘဲဥဟင်းချက်ရင် ကျွန်တော်က အကာ
အစ်မကြီးက အနှစ်…၊
စာချုပ်…ချုပ်နေစရာ…မလို…။
အကျယ်အကျယ် အငြင်းပွားစရာ မလို…။
မနက်ခင်းတွေတိုင်းမှာ ကျွန်တော်က အိမ်ရဲ့ ဈေးအ၀ယ်တော်…။
မှတ်မိပါသေးတယ်…။
ကျွန်တော့် လက်ထဲမှာ ဈေးခြင်းလေး ကိုင်ပြီး လက်ထဲမှာ ပါတာက
ကျပ်တန်နွမ်းနွမ်း လေး နှစ်ရွက်…။
အမဲသား တစ်ပိသာ ၁၂ ကျပ်…ဈေး…။
အမဲသားသည် ဆီက အမဲသား ၁၀ ကျပ်သား ၁ ကျပ် ပြား ၂၀ ဖိုး ၀ယ်ဖို့
အမေက အမိန့်ချထားပြီးဖြစ်သည်…။
ကျန်တဲ့ ပြား ၈၀ က အားလူး…ငပိရည် နှင့် တို့စရာ ၀ယ်ရန်…။
ဒါ…ကျွန်တော့် ရဲ့ မနက်ခင်း တိုင်း နီးပါး ထမ်းဆောင်ရတဲ့ တာဝန်…။
ဈေးက ပြန်လာရင် ၇ နာရီ ၁၅ ခန့် ရှိပြီ…။
အိမ်နောက်က အုတ်ကန်မှာ တပ်ရင်း ရေစက်က ရေလာပြီ…။
ပုံး ကိုယ်စီဖြင့် ကျွန်တော်တို့ ရေခံကြသည်…။
အိမ်က တိုင်ကီ ရေပြည့်လျှင် ရေကပိတ်သွားပြီ…။
အစ်မကြီး တို့ မိန်းကလေးတွေ ရေချိုးဖို့ ကျွန်တော်တို့က ငဲ့ညှာရပါသည်…။
တပ်ရင်းရုံး အုတ်ကန်မှာ ရေ အလွန်ပေါပါသည်…။
ကျွန်တော်တို့ သူငယ်ချင်းတွေ မနီးမဝေးလေးမှာ ရှိနေတဲ့
တပ်ရင်းရုံးအုတ်ကန်မှာပဲ ရေသွားချိုး ကြပါသည်။
ရေချိုးပြီး ကျောင်းဝတ်စုံ ၀တ်…၊ အမေ ကြော်ပေးသည့်
ထမင်းကြမ်းကြော် ကို ရေနွေးကြမ်းဖြင့် မျှောချ…။
အဲဒီတုန်းက ကော်ဖီမစ် ဆိုတာ မပေါ်သေးပါ…။
ရိက္ခာရသည့် အချိုခြောက်နှင့် လဖက်ရည်လေးတော့
တစ်လ တစ်ခါ လောက်တော့ သောက်ရပါသည် ခင်ဗျား…။
အမေထည့်ပေးသည့် ထမင်းချိုင့် လေး ဆွဲ…လွယ်အိတ်လေး လွယ်ပြီး
ကျောင်းကားရပ်မည့် တပ်ရင်းဆေးခန်း နားမှာ ကျောင်းကားစောင့်…။
ဒါက ကျွန်တော့် ရဲ့ ငယ်ဘ၀ နံနက်ခင်းပါ ဗျာ…။

ကျောင်းက တပ်နှင့် ၂ မိုင်ခန့်ဝေးသော အင်းမမြို့မှာ တည်ရှိပါသည်။
ညနေ ၃ နာရီ ကျောင်းဆင်းလျှင် တပ်မှ လာကြိုပေးသော ကျောင်းကားဖြင့်
ပြန်ကြရပါသည်။
အိမ်ရောက်သည်နှင့် အ၀တ်အစားလဲ ပြီး
ဘောလုံး သို့မဟုတ် ဘော်လီဘော တစ်ခုခုတော့ အမြဲ ကစားဖြစ်ကြသည်။
ကျွန်တော်တို့ အင်းမမြို့မှာ အဲဒီတုန်းက တပ်ရင်း ၃ ရင်း ရှိပါသည်။
ခ.မ.ရ (၄)…၊ ခ.မ.ရ (၅)…၊ ခ.လ.ရ (၈၀)…။
တစ်တပ် နှင့် တစ်တပ် ဘောလုံး ချိန်းကန်ကြ…ရတာ အတော်ပျော်စရာ ကောင်းခဲ့ပါသည်။
ဘောလုံးကန် ရေမိုးချိုးပြီး သည်နှင့် မိသားစု ထမင်းဝိုင်း…။
ကျွန်တော်တို့ ငယ်ငယ် က ထမင်းကို မိသားစု အားလုံး တပြိုင်တည်းသာ
စားရလေ့ရှိပါသည်။
တပြိုင်တည်း စားမှလည်း အဆင်ပြေနိုင်မည့် အခြေအနေမျိုး ကြောင့်လည်း ဖြစ်မည်…။
ထမင်းစားပြီး ခဏတဖြုတ် နားပြီး စာကျက်ရပါသည်။
အနည်းဆုံးတော့ ၄၅ မိနစ်လောက် ၇ အိမ်ကြား ၈ အိမ်ကြား
အသံပြဲ ကြီးဖြင့် အော်ကျက်လိုက်လျှင် အဖေ နဲ့ အမေ ကျေနပ်သွားပြီ…။
၈ နာရီ လောက်ဆို တပ်ရင်း တီဗီရုံမှာ သတင်းနားထောင်ပါသည်…။
သတင်းအပြီး မှာ အစီအစဉ်ကောင်းလျှင်လည်း ဆက်ကြည့်လို့ ရပါသည်…။
Hard To Hard တို့ Six Million Dollars Man တို့ Bionic Woman တို့
Little House on The Prairie (စာလုံးပေါင်းမှားရင် ဆောရီး)
တို့လို ဇာတ်လမ်းတွဲများ နှင့်
ဗုဒ္ဓဟူးညများတွင် အငြိမ့် အစီအစဉ်…။
ပြီးလျှင်အိပ်…။
ဒါပဲ…။ ဒါပါပဲ…။
ကျွန်တော်တို့ ငယ်ဘ၀ ရဲ့ တစ်နေ့တာ အစီအစဉ် က ဒါပါပဲဗျာ…။
ဖျော်ဖြေရေး ဆိုတာကလည်း တပ်ရင်းတီဗီရုံ မှာ ပြတဲ့ မြန်မာ့ရုပ်သံ တစ်ခုတည်း…။
အဲ…တစ်ခုတော့ ရှိတာပေါ့လေ။
တစ်လ တစ်ခါလောက်တော့ နယ်လှည့်ဆက်ဆံရေးတပ်က လာပြတဲ့
ရုပ်ရှင်တွေတော့ ကြည့်ရပါတယ်ခင်ဗျာ…။
ပြောစရာ တစ်ခု ကျန်သွားပါတယ်…။
အဲဒါကလည်း အတော် အရေးကြီးတဲ့ ကိစ္စပါ…။
တပ်ရင်းမှူး က (ဗိုလ်မှူးကြီး အမ်မ်ဇော်ယော ထင်ပါရဲ့)
တပ်ထဲက မိသားစုတွေဆီက စာအုပ်တွေ အလှူခံပြီး
စာကြည့်တိုက်လေး ဖွင့်ပေးထားပါတယ်ဗျာ…။
လစဉ်ထုတ် စာအုပ်တွေကိုလည်း ပုံမှန်ဝယ်ထည့်ပေးထားတော့
ကျွန်တော့် အကြိုက်ပါပဲ ခင်ဗျာ…။
ပေဖူးလွှာ…၊ သွေးသောက်…၊ မြ၀တီ…၊ ငွေတာရီ…၊ သပြေ…၊ စာပေလုပ်သား…၊
ရုပ်ရှင်မျက်မှန် မဂ္ဂဇင်း တွေကို ကျွန်တော် ငယ်ငယ်က လစဉ်ဖတ်ခဲ့ရပါတယ်ဗျာ…။
စာကြည့်တိုက် မှူး လို့ ပြောရမယ့် သူက ကျွန်တော့် ကို အလွန်ချစ်ပါသည်။
အစ်မကြီး မျက်နှာလည်း ပါပါတယ် ခင်ဗျာ…။
မဂ္ဂဇင်းတွေ ၀ယ်လာပြီ ဆိုရင်… ကျွန်တော်တို့ မောင်နှမ က အရင်ဖတ်ခွင့်ရပါသည်။
အဖုံးတောင် မဖုံးရသေး…။
ကျောင်းကအပြန် မဂ္ဂဇင်း အသစ်များ အိမ်မှာတွေ့ရတဲ့ အရသာက
ဘာနှင့်မှ လဲနိုင်လိမ့်မည် မထင်ပါ…။
အခု ပြန်ရေးနေရင်းတောင် လွမ်းမိပါတယ်ခင်ဗျာ…။
၂ ရက် ၃ ရက်လောက် စိမ်ပြေနပြေ ဖတ်ပြီးမှ
စာကြည့်တိုက် ကို စာအုပ်ရောက်ပါသည်…။
ဒါက…လစဉ်ပါခင်ဗျာ…။
စာကြည့်တိုက် နဲ့ ငယ်ငယ်ကတည်းက ရင်းနှီးခဲ့တာပါဗျာ…။
ရန်ကုန်ရောက်တော့လည်း အစ်မ အငယ်က ရန်ကုန်တက္ကသိုလ် ဗဟို စာကြည့်တိုက်မှာ
အလုပ်ဝင်နေသည့်အချိန်…။
အို…ဘာပြောကောင်းမလဲ…။ တက္ကသိုလ်မတက်ခင်ကတည်းက
ရန်ကုန်တက္ကသိုလ် ဗဟိုစာကြည့်တိုက်ကို အမြဲရောက်ဖြစ်နေခဲ့တာပါဗျာ…။
အခု အထိလည်း အားသည့်အချိန် စာကြည့်တိုက်ထဲသွားပြီး
ဟိုစာအုပ်ရှာ ဒီစာအုပ်ရှာ လုပ်နေတုန်းပါ…။
ရုံးပိတ်ရက်တွေမှာတော့ စာကြည့်တိုက်မှာ ရှိတဲ့ စားပွဲတင် တင်းနစ်စ် ရိုက်ကြပါသည်။
တခါတလေ အိမ်နီးခြင်း အစ်ကိုကြီး တစ်ယောက် နှင့် စစ်တုရင် ထိုး…။
တခါတလေ တပ်ရင်း UA ကြီး တို့နှင့် Scrabble ၀င်ကစား…။
ငယ်ငယ်က စစ်တုရင် လည်းစွဲဖူးပါတယ်…။
Scrabble လည်း စွဲဖူးပါတယ်ဗျာ…။

black chaw

About black chaw

black chaw has written 320 post in this Website..