အိမ်ဆိုလို့………..

လူတွေအတွက်လိုအပ်ချက်တွေလို့ပြောရင်

စားစရာ၊ဝတ်စရာ၊အိမ် (Food, Clothing and Shelter) ပေါ့။

(Basic Human Needs- BHNs )လို့ခေါ်ပါတယ်။

ကျနော်ခုတလော (Cost and Benefit) စရိတ်နဲ့ အမြတ်ကိုဘဲ တွက်နေတတ်တဲ့

စီးပွါးရေးသဘော တရားတွေကို မနှစ်မမြို့ ဖြစ်လာပါတယ်။

ဘာလို့လဲဆိုတော့ ချမ်းသာအောင်လုပ်တဲ့နည်းဗျူဟာတွေကို သိတဲ့လူကလုပ်တယ်။

အခွင့်အရေးကို”ဖော်”တတ်လို့လည်း ပူဖောင်းလေထိုးသလိုချမ်းသာလာကြရော။

ပြီးတော့အမြတ်ကိုကြည့်လွန်းလို့နဂိုမူလဂုဏ်(Identity)တွေတောင် ပျောက်ကုန်ပြီဗျ။

ငါချမ်းသာဘို့၊ငါလုပ်ငန်းချမ်းသာဖို့၊ငါနိုင်ငံချမ်းသာဖို့နဲ့ နောက်ဆုံးလဲကျရော၊

စီးပွါးပျက်ကပ်လဲဆိုက်ရော(ဒါမှမဟုတ်) အမှန်တရားလည်း ဦးနဲနဲမော့လာရော

“ယုတ်မာခဲ့ရင်ယုတ်မာခဲ့သလို” အဖတ်တင်ကျန်ခဲ့တာကမကောင်းမှုတွေ။

ဆက်တိုက်ကြီးမြတ်နေဘို့? နိုးပါ ။ဘာမှလုပ်လို့မရဘူး (Law of Diminishing Marginal Returns )

ဆိုတာရှိတယ်။လျှော့နည်းသွားအထွက်ဥပဒေသတဲ့ မြန်မာလို အနိစ္စ တရားဆိုတာနဲ့ သိပ်တူတာ။

သူ့ဆိုလိုချက်က ဘာလုပ်လုပ်အမြင့်ဆုံးအဆင့်ရောက်ပြီးရင်ပြန်ကိုကျတယ်။

တခုခုကပုံသေဖြစ်နေလို့တဲ့။

ဒီလိုဗျာ။

ကိုနိုဇိုးမိ မှိုစိုက်တယ်။ ခူးတာရော ဈေးသွားရောင်းတာရော တယောက်ထဲနဲ့လုပ်တယ်ဆိုပါစို့။

အဲ ..၂ယောက်ဆိုရင် ပိုရောင်းလို့ရလာမယ်။ နောက်ဈေးတခုသွားရောင်းလို့။

အဲ…..၃ ယောက်ဖြစ်သွားပြီ ဆိုပါစို့။ မှိုမှမရှိတာ ၃ယောက်စာ ရောင်းဘို့။

လူ “တိုး” တိုင်းရောင်းရတာမှမဟုတ်တာ။ အဲဒီတော့ ၂ယောက်က အမြင့်ဆုံးအမြတ်ပေါ့ဗျာ။

အဲဒီနောက်ပိုင်း မှိုထပ်စိုက်၊ထပ်လူတိုး လုပ်ကြည့်လေ။ ပြန်ရောက်သွားအုန်းမှာဘဲ။အဲဒီနေရာကို။

နည်းပညာခေတ်အစ အဲဒီဟာကြီးမရှိတော့ဘူးဆိုပြီး အော်ခဲ့တဲ့လူတွေ ခုငြိမ်သွားပြီ။ပြန်ကျနေပြီလေ။

နည်းပညာအသစ်ထွက်၊ပစ္စည်းအသစ်ထွက်တိုင်း ဘယ်မှာလည်း ဝယ်မဲ့သူ.။

အော် …ပိုက်ဆံလား။အေးရော့ ..ယူယူ(ခရက်ဒစ်ကာဒ်=အကြွေးဝယ်ကာဒ်တွေ) ၊

မြတ်ပါတယ် အွန်ပေပါ။ ငွေစင်ကမရှိတော့ လေထိုး လေရော်။ နိုင်ငံအချင်း၊ လုပ်ငန်းအချင်းချင်း

ဘီလီယမ်ချီပြီးကြွေးတင်။

(ကိုကြောင် အဲဒါရေးတာမဟုတ်သေးဘူးနော်။ ကြုံလို့ပါသွားတာ။ M ၁၊၂၊၃၊၄ တွေကိုရှင်းမှ ပိုကောင်းတာ

ကိုကြောင်ရဲ့ ရီကွက်စ်က)

အဲဒီတော့ ချမ်းသာတဲ့လူက အမြတ်အမြတ်နဲ့ အလုပ်သမားလဲလုပ်ခကောင်းကောင်းမပေးချင်၊

နောက်ဆုံးတော့၊ဘာဖြစ်ကုန်လဲ?

ကွာဟကုန်တယ်။ Middle Class လူလတ်တန်းစားမှာတောင် Upper အပေါ်နဲ့

lowerအောက်တော်တော်ကွာသွားပြီ။

အဲဒီလူမှုဖွံ့ဖြိုးမှုနဲ့ တလောက ဆီမီနာတခုသွားပြောဖြစ်တယ်။

အချက်အလက်တွေရှာရင်း လူကစိတ်မကောင်းဖြစ်လာတယ်။

အချက်အလက်ဆိုလို့ ကျနော်က ၂၀၁၀ တနှစ်ထဲ၊၂၀၀၉ တနှစ်ထဲကြည့်ပြီးဆုံးဖြတ်လေ့မရှိဘူး။

ဆုံးဖြတ်လို့လဲမသင့်တော်ပါဘူး။

(Time Series)၁၀နှစ် အနှစ် ၂၀ နီးပါးဒေတာမျိုး၊အချက်အလက်မျိုးနဲ့ ညှိပြီးမှ ပြောရင်ပိုကောင်းတာမို့

အဲဒီလိုလုပ်တတ်တယ်။

ကြည့်လိုက်တော့ဗျာ။

ကမ္ဘာလူဦးရေကို 20% စီ ခွဲရင်တဲ့ အချမ်းသာဆုံး 20% က အဆပေါင်း ၁၅၀ ချမ်းသာကြောင်းပါတဲ့။

အဲဒီတော့ဗျာ အချမ်းသာဆုံး 20% ကအသား၊ငါး 60% နီးပါးသူတို့အုပ်သတဲ့။(ကျန်တဲ့ 80%ကကျန်တာစား)

အဲဒီတော့ တနေ့ ဝင်ငွေ US 2 Dollar အောက် ရ ဖွံ့ဖြိုးဆဲ နိုင်ငံတွေငတ်တယ်ဆိုတာ ထင်ရှားနေပြီ။

အပေါ်ကဟာပြန်ပြောမယ်။

အဲဒီဟာကို Values of development (လူသား)ဖွံ့ဖြိုးမှုတန်ဖိုးများဆိုပြီး မှတ်သားဘူးတယ်။

နားထောင်ကြည့်နော်။ အဲဖတ်ကြည့်နော်။

၁။ အသက်ရှင်သန်နေနိုင်မှူ (Sustenance)

၂။ ကိုယ့်ကိုကိုယ်တန်ဖိုးထားနိုင်သောဘဝကိုပိုင်ဆိုင်မှူ (Self-esteem)

၃။ သူတပါးအသုံးချခံဘဝမှ လွတ်မြောက်မှု (Freedom from servitude)

လို့သုံးမျိုးရှိတယ်။

 

၁။အသက်ရှင်သန်နေနိုင်မှူ

ရှင်းပါတယ်။

ထမင်းစားဖို့လိုတာပေါ့။အဝတ်အစားရောလိုတယ်။ ကိုဘလက်ရေးတဲ့ “အိမ်” လေးလိုတယ်။

အပေါ်က (Food, Clothing and Shelter)သုံးချက်။အဓိက ကတော့ကိုယ်ဟာကိုလုပ်ရမှာပါ။

အဲ..လုပ်လို့မရတဲ့အနေအထားနဲ့ကျရင်တော့ ပြင်ပကူညီမှုလိုတယ်ဗျာ။

ဆိုတော့ ပြောခဲ့သလို မညီမျှတဲ့ ပုံစံနဲ့ ကိုယ်က (Green Lable) သောက်နေတယ်။

ဟို..ဆိုမာလီယာကလူတွေ ရေသောက်စရာမရှိလို့ နွားဖင်နားမှာ တန်းစီပြီး နွားသေးပေါက်တာကိုစောင့်နေတယ်။

ကဲ…..တော်ရောလားဗျာ။

ပြောဘူးတယ်နော်၊ ကလက်ရ်ှနီကော့ဗ်(အေကေ ၄၇) ရိုင်ဖယ် ကျည်တစ်ထောင့်ဟာ အာဖရိက

ကအိမ်ထောင်တစုအတွက် ခြင်ထောင်တလုံးကောင်းကောင်းဝယ်နိုင်တယ်၊ အဲဒီခြင်ထောင်တလုံးက

အနည်းဆုံးတော့ ကလေး ၂ယောက် ,၃ယောက် သွေးလွန်တုပ်ကွေးနဲ့သေမှာကို ကာကွယ်နိုင်တယ်ဆိုတာ။

ဆိုလိုတာက
(#) အခြေခံလိုအပ်ချက် (Food, Clothing and Shelter)တွေလည်း လိုတယ်။

(#)ကျန်းမာရေးစောင့်ရှောက်မှု၊အခြေခံပညာ၊တွေလည်းလိုတယ်ပေါ့။

ဂလိုဘယ် လိုက်ဇေးရှင်းကို အမှီမလိုက်နိုင်သူများ နစ်မြုပ်ကုန်တယ်လို့ပြောဘူးပါတယ်။။

ခုနကပြောခဲ့တဲ့ ကမ္ဘာလူဦးရေ20% လောက်ဟာ ကွန်ပြူတာမသိဘူး၊ကားမစီးဖူးဘူးတဲ့။

(Survival of the fittest =တော်သူကျန်တဲ့ခေတ်)လို့ပြောဘူးခဲ့တယ်။

ခုမဟုတ်တော့ဘူး။ တော်လည်း အခွင့်အရေးကို ယူနိုင်တဲ့ “လူလည်” မဟုတ်ရင် ကျန်ခဲ့တဲ့ခေတ်။

တော်တာထက် လူရည်လည်ပြီး အခွင့်အရေးယူတတ်ဘို့ ပိုအရေးကြီးသွားပြီ။

ဆိုးတာက အဲဒီမှာ အဲဒီ လူလည်ဆိုတဲ့ (Opportunist= အခွင့်အရေးသမား)တွေဆိုတာ

အများစု ကကိုယ်ကောင်းစားရေးဘဲ။ မျှမျှတတ မစဉ်းစားတတ်ဘူး.။တကိုယ်ကောင်းသမားက

အများစု ဖြစ်နေလို့ ဒီ ရလာဒ် ဖြစ်နေတာပေါ့ဗျာ။

ကဲ ဗျာ။ဒါဆိုရင် ဘာလုပ်လို့ရမလဲ?

ဟုတ်ကဲ့။ လူရည်လည်ပါ။အခွင့်အရေးကိုချောင်းပါ။အောင်မြင်အောင်လုပ်ပါ။

ပြီးတော့ လူမှုဘဝများကို “မျှဝေ” ပါလို့ သံချောင်းခေါက်ပါ၏ပေါ့ဗျာ။

တခုတော့ ပြောလိုက်မယ်နော်။ ခင်ဗျားထမင်းဝဘို့၊ခါးလှဘို့၊အမိုးအကာလေးအောက်နေဘို့

တာဝန်ရှိတာ “ခင်ဗျားကိုယ်တိုင်” လို့။

ဟိုဟိုဒီဒီ လက်ညိုးထိုးနေရင်းငတ်နေမှာစိုးလို့ဗျာ ။

 

၂။ကိုယ့်ကိုကိုယ်တန်ဖိုးထားနိုင်သောဘဝကိုပိုင်ဆိုင်မှူ

သိပ်အရေးကြီးတယ်နော်။

“ယဉ်ကျေးတယ်ဆိုတဲ့ အသိုင်းအဝိုင်းကြား၊~~~~~ကြင်နာသူအရိုင်းဖြစ်နေသလား၊

~~~~~လက်ညိုးတွေညွန်ကာလေ~~~~~ကဲ့ရဲ့တာ~~~ ကိုယ့်ကိုလိုဘဲ ~~ထင်ယောင်နေလား၊

~~~ရေတိမ်မှာမနစ်မြုပ်စေနဲ့မင်း၊~~~~~လူပုံအလယ်အရှက်~~~မကွဲစေနဲ့မင်း~~~

~~~ရာဇဝင်မှာမရှုံးနိမ့်စေနဲ့မင်း~~~~ရှင်းလင်းလိုက်စမ်းတော့မေရေ”

လို့ ဆရာခမ်းလိတ်ကြီးရေးခဲ့သလိုပါ။

“လူ့တန်ဖိုး”

စစ်မှန်တဲ့ ဂုဏ်သိက္ခာရှိရမယ်ဗျ။ဂုဏ်သိက္ခာရှိတဲ့ လူတယောက်အဖြစ်ရပ်တည်နေရမယ်ဗျ။

ဒီထက်ပြောရရင် ကိုယ့်ကိုကိုယ်တန်ဖိုးထားရမယ်။ ကိုယ့်ဘဝကိုတန်ဖိုးထားရမယ်။

ကိုယ့်ဘဝကိုယ်အထူးဂရုစိုက်ရမယ်ပေါ့ဗျာ။ အင်းဂျီဘရဲန်းဒဒ်လေးဝယ်လာရင်တော့ ဂရုစိုက်လိုက်တာ။

ကိုယ်ဟာကိုယ်ကျ “လေ”နေမယ်ဆိုရင် အဲဒါ လွဲနေပြီပေါ့ဗျာ။၊

နောက်တခုကသူတပါးကို အသိအမှတ်ပြူပေးတတ်ရတယ်။ ကိုယ်ချင်းစာတတ်ရတယ်တဲ့။အဲဒီဟာကတော့

နှလုံးသားအရည်အသွေးတွေကိုပြောတာဘဲဗျ။ပညာတတ်တာ၊မတတ်တာနဲ့မဆိုင်ဘူး။

အဲဒီမှာ ခုနက လူမျိုးတွေကြောင့် ကွာဟချက်ရှိမယ်ပေါ့ဗျာ။

ဘာဘဲဖြစ်ဖြစ် ကိုယ့်ကိုကိုယ်တန်ဖိုးရှိအောင် နေမယ်ပေါ့ဗျာ။

တန်ဖိုးဆိုလို့ဆရာမောင်စိန်ဝင်း(ပုတီးကုန်း)ရဲ့ တန်ဖိုး သုံးမျိုး ကိုသွားသတိယတယ်ဗျ။

ဆရာက တန်ဖိုး ၃ မျိုးရှိတယ်တဲ့။

(#1)ပကတိတန်ဖိုး

(စိန်တလုံး ဘယ်လောက်တန်တယ်ပေါ့ဗျာ)

(#2)အသုံးချတန်ဖိုး

(အဲဒီ စိန်ဝတ်ပြီး ကြွားလိုက်တာ “ဟိုကောင်မ မျက်တောင်မခပ်ဘူးတော့” ဆိုတာမျိုး)

(#3)ခံစားမှုတန်ဖိုး

(မဒမ်ဘလက်ချော Says : အဲဒီ စိန်က ကျမရဲ့အမျိုးသား ကိုဘလက်ချော မွေးနေ့လက်ဆောင်ပေးထားတာ

ဆိုတာမျိုး၊ စိန်ချင်း တန်ဖိုးချင်းတူရင်တောင်မလဲနိုင်ပါဘူး)

(#1) လူဆိုတော့ ပကတိတန်ဖိုးလဲ ရှိသင့်တယ်။

(#2) အသုံးကျအောင်နေတတ်ရင်အသုံးကျတယ်။ မိသားစုရေးရာဝန်ကြီးဆိုတာ

သဲ့သဲ့လေးမှမကြားဖူးဘူးလား။ အဲဒါမျိုး။

(#3) ခင်တယ်၊မင်တယ်၊သူငယ်ချင်းချင်း သူရှိကိုယ်စား၊ ကိုယ့်ရှိဖွက်ထား(^^)။

ခံစားပြီးတန်ဖိုးရှိသွားပြီ။၊ဟာ မတွေ့တာကြာပြီ။ အမွှာပူးမွေးတာလားဟင်။ခင်တာ။ သံယောဇဉ်။ (ဘယ်သူ့

ကိုမှမရည်ရွယ်ပါ)။

သူကြီး ဘာဖြစ်တယ် ညာဖြစ်တယ် ပြောနေတယ်။ သူကြီး မန်းဂေဇက်ပိတ်လိုက်ရင် ဘာဖြစ်မလဲ။

အဲဒါ ဘာတန်ဖိုးလဲ? (Right Answer=10 မှတ်)။

ကိုယ့်ကိုကိုယ်တန်ဖိုးရှိမယ်။

နောက်မိသားစု၊သူငယ်ချင်းအသိုင်းအဝိုင်းကြားတန်ဖိုးရှိမယ်။

လောကအတွက်တန်ဖိုးရှိမယ်။

{အမေစု၊ကိုသူရ၊ကိုမောင်(ကျော်သူ)}

အဲဒီလိုလူမျိုးတွေများလာရင်

အဲဒီ တန်ဖိုးထားတဲ့အလေ့အထလေးတွေရှိလာရင် လူမှုဘဝ ကောင်းမွန် ဖွံ့ဖြိုးမယ်ပေါ့။

 

၃။သူတပါးအသုံးချခံဘဝမှ လွတ်မြောက်မှု

ဟယ် ဆိုပြီးအော်လိုက်ချင်စရာကောင်းတယ်။

ပြောကိုမပြောချင်ဘူး။

ငယ်ငယ်က သခင်ဘသောင်းအကြောင်းဖတ်တုန်းကအသဲစွဲနေအောင်မှတ်မိတာတခုရှိတယ်။

အင်းဂလိပ်စာကောင်းတဲ့သခင်ဘသောင်းရန်ကုန်မှာအလုပ်ရတော့ ရုံးတက်ရုံးဆင်း

လက်မှတ်ထိုးခိုင်းတာကိုငါကသခင်ဘသောင်းကွ ကျွန်ဘသောင်းမဟုတ်ဘူး၊ မထိုးဘူး။ အလုပ်ထွက်တယ်တဲ့။

အင်း….ခုများတော့၊ပြောကိုမပြောချင်တော့ပါဘူး။

ဂျပန်မှာ ပရက်ရှာအနည်းဆုံးအလုပ်ကိုရှာလုပ်ထားတာ။တလောက ဋ္ဌာနအသစ်၊ဘာသာ

အသစ်တခု စ သင်ဘို့လုပ်တော့၊ဌာနမှူးဆရာ (အလွန်သဘောကောင်းသော ဂျပန်တောသား) က

ကျောင်းသားတွေကိုစိတ်မဆိုးဖို့၊သီးခံဖို့ ပြောတယ်။ ဪ ဖြစ်မှဖြစ်ရလေလို့။

လူဟာလွတ်လပ်တယ်ဆိုတဲ့အဓိပ္ပါယ်ဟာ ဘာလဲလို့ မေးရင် “ရွေးချယ်နိုင်တာ”။

ဘယ်သွားသွား၊ဘာလုပ်လုပ်OKဆိုရင် သွားစရာတွေကိုရွေးချယ်နိုင်တာ။

လုပ်စရာတွေကိုရွေးချယ်နိုင်တာပေါ့။

မန်းဂေဇတ်မှာ ဘာရေးရေး မရတော့ပါ၊ အယ်ဒီတာစစ်တော့မယ်ဆိုရင် ရွေးချယ်မှုနည်းသွားမယ်။အဲဒီလိုမျိုး။

အဲဒီတော့ ရွေးချယ်နိုင်လေလေ စိတ်ချမ်းသာမှု၊ကိုတိုးလေလေပေါ့နော်။

လွတ်လပ်စွာရေးသားပြောဆို ဟောပြောခွင့်တွေဆိုတာအဲဒီမှာ ပါလာပြီပေါ့။

Sir အာသာလူးဝစ်ဆိုတဲ့ စီးပွါးရေးပညာရှင်ပြောတာက ဖွံ့ဖြိုးတိုးတက်မှူရဲ့အကျိုးကျေးဇူးဆိုတာ

ငွေချမ်းသာလာတာမဟုတ်ဘဲ ရွေးချယ်နိုင်တာတွေတိုးပြီး ဘဝကိုကျေကျေနပ်နပ်ကြီး ဖြတ်သန်းနိုင်တာမျိုးတဲ့။

~~~~~~~~~~~~~~~~~~~~~

ချုပ်ရရင်တော့…………..

ဘဝမှာစားဝတ်နေရေးပြည့်စုံဖို့

ကိုယ့်ကိုကိုယ်တန်ဖိုး ၃မျိုးရှိအောင်နေဖို့

(တတ်နိုင်သလောက်)လွတ်လွတ်လပ်လပ် တစုံတယောက်ရဲ့လောင်းရိပ်ကိုမှီခိုနေတာမျိုးမဖြစ်နေဖို့

သို့မဟုတ် ကိုယ့်ရွေးချယ်နိုင်မှုကို “တိုးတက်အောင်”လုပ်ဖို့

ဆိုတဲ့အချက် ၃ ချက်ကိုတဦးချင်း၊ တမိသားစုချင်း၊ တရပ်ကွက်ချင်း၊ တမြို့ချင်း၊တနိုင်ငံချင်းပေါ့ဗျာ

လုပ်နိုင်ကြရင်ဖြင့် ဆိုတဲ့အတွေးလေးပါ။

“ငွေရှာပါ၊ခင်ဗျားတယောက်ထဲ အတွက်တော့ မဖြစ်ပါစေနဲ့” လို့။

~~~~~~~~~~~~~~~~~~~~~

(နိုင်ငံအဆင့်ဆိုရင်တော့…

အပေါ်ကအချက် ၃ ချက်လုပ်နိုင်ဘို့ Pillar=ပီလာ ၅ ချောင်းလိုပါတယ်။ နောက်မှဆက်ရှင်းပါအုန်းမယ်။)

~~~~~~~~~~~~~~~~~~~~~

 

လေးစားစွာဖြင့်

 

မောင် သစ်မင်း(^^)

thit min

About thit min

thit min has written 90 post in this blog.

No related posts.